ខេត្តកណ្តាល៖ លោកយាយវ័យ៧៣ឆ្នាំម្នាក់បានខ្យល់គ បណ្តាលឲ្យដួលដាច់ខ្យល់ស្លាប់ពេលកំពុងដើរនាំយកទេយ្យទានទៅប្រគេនប្រះសង្ឃ គ្រាដែលលោកយាយរងគ្រោះចូលរួមក្នុងពិធីបុណ្យកឋិនទាននៅវត្តជម្ពូវន្ត័ ហៅវត្តតាកុយ ស្ថិតក្នុងភូមិបារ៉ែនលើ ឃុំស្វាយប្រទាល ស្រុកស្អាង ខេត្តកណ្តាល កាលពីវេលាម៉ោង៨ និង៤០នាទី ថ្ងៃទី០៩ ខែវិច្ឆិកា ឆ្នាំ២០១៥ ។
មន្ត្រីនគរបាលស្រុកស្អាងបានឲ្យដឹងថា លោយាយរងគ្រោះឈ្មោះ សេម ពី អាយុ៧៣ឆ្នាំ ជនជាតិខ្មែរ មានទីលំនៅក្នុងភូមិពោធិ៍លើ ឃុំត្រើយស្លា ស្រុកស្អាង ។ នៅមុនពេលកើតហេតុលោកយាយរងគ្រោះត្រូវបានកូនដឹកចេញពីផ្ទះទៅចូលរួមក្នុងពិធីបុណ្យកឋិនទាននៅវត្តជម្ពូវន្ត័ ពេលមកដល់វត្តលោកយាយបានកាន់ទេយ្យទានមួយចំនួន ក្នុងគោលបំណងយកទៅប្រគេនព្រះសង្ឃនៅលើសាលាឆាន ខណៈកំពុងដើរសុខៗលោកយាយបានដួលទៅលើកម្រាលថ្មមួយទំហឹង បណ្តាលឲ្យស្លាប់បាត់បង់ជីវិតភ្លាមៗនៅកន្លែងកើតហេតុធ្វើឲ្យពុទ្ធបរិស័ទ្ធដែលចូលរួមបុណ្យកឋិនទានរន្ធត់ចិត្តគ្រប់ៗគ្នា ។
សមត្ថកិច្ចនគរបាលស្រុកស្អាងបានបញ្ជាក់ថា លោកយាយរងគ្រោះស្លាប់ដោយសារខ្យល់គពេលកំពុងដើរ បណ្តាលឲ្យដួលបោកទៅលើកម្រាលថ្មពេញមួយទំហឹង ។ ក្រោយពីពិនិត្យចប់សព្វគ្រប់ហើយនោះសមត្ថកិច្ចនគរបាលបានប្រគល់សពលោកយាយរងគ្រោះទៅឲ្យក្រុមគ្រួសារយកទៅធ្វើបុណ្យតាមប្រពៃណី ៕
ដោយ៖ ស្អាងជ័យ
