ភ្នំពេញ៖ ម៉ូតូ២គ្រឿងបានបើកបុកគ្នាពេញទំហឹងបណ្តាលឲ្យរបួសធ្ងន់ និងស្រាលរដូករណែលទាំងសងខាងកាលពីវេលាម៉ោង២២និង៤០នាទី ថ្ងៃទី០៩ ខែវិច្ឆិកា ឆ្នាំ២០១៥ នៅចំណុចផ្លូវលេខ១៨២កែងនិងផ្លូវព្រះមុន្នីវង្ស ស្ថិតក្នុងសង្កាត់ បឹងរាំង ខណ្ឌដូនពេញ ។
ប្រភព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុគេឃើញមានយុវជនម្នាក់ជិះម៉ូតូមួយគ្រឿងម៉ាក អាយខន ពណ៍លឿង ពាក់ស្លាកលេខ ភ្នំពេញ 1AZ-0533 បានធ្វើដំណើរតាមបណ្ដោយផ្លូវព្រះមុន្នីវង្សទិសដៅពីត្បូងទៅជើងលុះមកដល់ចំណុចកើតហេតុក៏មានម៉ូតូមួយគ្រឿងម៉ាកស៊ុយស៊ូគី ស្មាក ពណ៍ខ្មៅ ពាក់ស្លាកលេខ កណ្ដាល1G-5972 ជិះដោយបុរសម្នាក់និងឌុបនារីពីរដោយជិះបញ្ច្រាសទិសចរាចរណ៍បានបុកគ្នាពេញទំហឹងបណ្ដាលអោយរងរបួសបុរសខាងម៉ូតូស្មាកបែកមុខបែកមាត់និងនារីពីនាក់រងរបួសស្រាល ចំណែកខាងម៉ូតូអាយខនរងរបួសស្រាល ។
ប្រភពព័ត៌មានបានបន្តទៀតថា ក្រោយកើតហេតុភាគីទាំងសងខាងបានចែកផ្លូវគ្នាទៅព្យាបាលរបួសរៀងៗខ្លួន ដោយមិនមានកម្លាំងសមត្ថកិច្ចចុះមកដល់កន្លែងកើតហេតុនោះទេ ៕
ដោយ៖ ព្រែកជ័យ
