ភ្នំពេញ៖ យុវជនម្នាក់បានរងរបួសធ្ងន់សន្លប់ស្ដូកស្ដឹងនៅនឹងកន្លែងដោយសារតែត្រូវរថយន្ដកាមរីបានឡែនបើកគៀកៀរបោកទៅនឹងថ្នល់ ។

កាលពីវេលាម៉ោង០១រំលងអធ្រាត ឈានចូលថ្ងៃទី១០ ខែវិច្ឆិកា ឆ្នាំ២០១៥ នៅខាងមុខសួនកំសាន្ដ ឌ្រីមលែន ខាងកើតរង្វង់មូលសម្ដេចជួនណាត ស្ថិតក្នុងសង្កាត់ចតុមុខ ខណ្ឌដូនពេញ ។

សាក្សីនៅកន្លែងកើតហេតុបានអោយដឹងថា នៅពេលកើតហេតុគេឃើញយុវជនម្នាក់ជិះម៉ូតូមួយគ្រឿងម៉ាកឌ្រីមC125 ពណ៍ខ្មៅ ពាក់ស្លាកលេខ ភ្នំពេញ1CV-1885 ធ្វើដំណើរក្នុងទិសដៅពីកើតទៅលិច លុះមកដល់ចំណុចកើតហេតុមានរថយន្ដមួយគ្រឿងម៉ាកកាមរីបាឡែន ពណ៍ខ្មៅ ពាក់ស្លាកលេខ ភ្នំពេញ2M-2923 បើបរដោយបុរសម្នាក់ទិសដៅស្របទិគ្នា បានមកគៀរម៉ូតូបណ្ដាលអោយដួលបោកទៅថ្នល់រងរបួសធ្ងន់សន្លប់ឈឹង។

ប្រភពព័ត៌មានដដែលបានបន្តថាក្រោយកើតហេតុរថយន្ដបានធ្លាក់កាងខាងមុខនៅកន្លែងកើតហេតុ ហើយបានព្យាយាមបើករត់គេចខ្លួនរហូតដល់ផ្លូវលេខ៣១០កែងនិងផ្លូវលេខ៥៧ស្ថិតក្នុងសង្កាត់បឹងកេងកងទី១ ទើបសមត្ថកិច្ចតាមឃាត់បានភ្លាមៗតែម្ដង។

បន្ទាប់មករថយន្ដបង្កនិងម៉ូតូត្រូវបានកម្លាំងជំនាញចុះធ្វើការវាស់វែងយកទៅការិយាល័យចរាចរណ៍រាជធានីភ្នំពេញ ដើម្បីរង់ចាំដោះស្រាយនៅពេលក្រោយបន្តទៀត៕

ដោយ៖ ព្រែកជ័យ