ភ្នំពេញ៖ ហេតុការណ៍គ្រោះថ្នាក់ចរាចរណ៍មួយបង្កឡើងដោយសារតែយុវជនម្នាក់ទំនងជាស្រវឹងបើករថយន្តឡិចស៊ីសGS300មួយគ្រឿងក្នុងល្បឿនលឿនជ្រុលបុកទ្វារផ្ទះប្រជាពលរដ្ឋ ហើយរថយន្តបន្តទៅបុកបង្គោលភ្លើងបណ្តាលអោយបាក់អស់មួយដើមគៀបជាប់ទៅមុខលែងរួច ។
ហេតុការណ៍នេះបានកើតឡើងកាលពីវេលាម៉ោង២និង៥០នាទីរំលងអធ្រាត្រ ឈានចូលថ្ងៃទី១១ ខែវិច្ឆិកា ឆ្នាំ២០១៥ នៅចំណុចខងលិចច្រចូលផ្សារសំណង់១២ តាមបណ្តោយផ្លូវលេខ១៨២ ស្ថិតក្នុងសង្កាត់ទឹកល្អក់ទី៣ខណ្ឌទួលគោក ។
តាមសាក្សីនៅកន្លែងកើតហេតុបានអោយដឹងថា នៅមុនពេលកើតហេតុគេបានឃើញរថយន្តម៉ាកឡិចស៊ីសGS300 ពណ៍សគ្មានស្លាកលេខ បើកបរដោយយុវជនម្នាក់ ធ្វើដំណើរតាមបណ្តោយផ្លូវលេខ១៨២ ក្នុងទិសដៅពីកើតទៅលិច ក្នុងល្បឿនលឿន ខណៈមកដល់ចំណុចកើតហេតុបានរ៉េចង្កូតទៅបុកទ្វារផ្ទះប្រជាពលរដ្ឋហើយរថយន្តបង្កបន្តទៅបុកនិងបង្គោលភ្លើងបណ្តាលអោយបាក់អស់ចំនួនមួយដើមគៀបជាប់ទៅមុខលែងរួច។
ក្រោយពេលកើតហេតុ សមត្ថកិច្ចមូលដ្ឋានបានចុះមកដល់ចំណុចកើតហេតុ និងសហការជាមួយចំនាញស្ទួចយករថយន្តបង្ករួមទាំងឃាត់ម្ចាស់យកទៅការិយាល័យចរាចរណ៍ជើងគោលដើម្បីដោះស្រាយនៅពេលក្រោយ ៕
ដោយ៖ ភារ៉ា
