ខេត្តក្រចេះ៖ បុរសម្នាក់បានស្លាប់ភ្លាមៗនៅនឹងកន្លែងកើតហេតុ ដោយសារតែរូបគាត់បានបើកម៉ូតូទៅបុករថយន្ដមួយគ្រឿងកាលពីវេលាម៉ោង៥ និង១៥នាទីថ្ងៃទី១៣ ខែវិច្ឆិកា ឆ្នាំ២០១៥ នៅចំណុចភូមិមានជយ័ ឃុំស្រែចារ ស្រុកស្នួល ខេត្តក្រចេះ ។
បុរសដែលបាត់បង់ជីវិតខាងលើត្រូវបានស្គាល់ថា ឈ្មោះពូ សៅ អាយុ៣២ឆ្នាំ រស់នៅក្នុងភូមិបេងកោង ឃុំទន្លូង ស្រុកមេមត់ ខេត្តត្បូងឃ្មុំ។
តាមប្រភពពីកន្លែងកើតហេតុបានឲ្យដឹងថា មុនពេលកើតហេតុ គេបានឃើញម៉ូតូមួយគ្រឿង ម៉ាកស៊ីរ៉ូត ពណ៌ខ្មៅ គ្មានស្លាកលេខ បើកបរដោយបុរសរងគ្រោះខាងលើ។ លុះមកដល់ចំណុចកើតហេតុ ម៉ូតូខាងលើក៏បានជ្រុលទៅប៉ះម៉ូតូមួយគ្រឿងម៉ាកហ្វុយហ្សូ ពណ៌ខៀវ ពាក់ស្លាកលេខ 3C 9053 បណ្ដាលឲ្យម៉ូតូដួល បោកបុរសអ្នកបើកបរទៅនឹងថ្នល់ ស្លាប់នៅនឹងកន្លែងតែម្ដង។ ចំណែកអ្នកបើកបររថយន្ដបានគេចខ្លួនបាត់ស្រមោល។
ក្រោយកើតហេតុ នគរបាលចរាចរណ៍បានចុះអន្តរាគមន៍ និងនាំយកម៉ូតូនិងរថយន្ដទៅកាន់បុស្ដិ៍នគរបាល ដើម្បីកសាងសំណុំរឿងចាត់ការបន្ដតាមនីតិវិធី។ ចំណែកសាកសពជនរងគ្រោះ ប្រគល់ឲ្យក្រុមគ្រួសារចាត់ចែងធ្វើបុណ្យតាមប្រពៃណី៕ សហការី
