ខេត្តឧត្តរមានជ័យ ៖ ភ្លៀងមួយមេនៅក្បាលព្រលប់ល្ងាចមិញថ្ងៃទី២៦ ខែមិថុនា ម្សិលមិញនេះ បានបណ្តាល ឲ្យមនុស្ស២នាក់ ត្រូវបានស្លាប់ និងម្នាក់ទៀតត្រូវសន្លប់ ដោយសាររន្ទះបាញ់ នៅចំណុចគោកច្រឹកលិច ភូមិព្រៃធំ ឃុំចុងកាល់ ស្រុកចុងកាល់។
នគរបាលស្រុកចុងកាល់បានឲ្យដឹងថា រន្ទះបាញ់ល្ងាចមិញនេះ បានបណ្តាយឱ្យត្រូវមនុស្សស្លាប់២នាក់ ទី១៖ ឈ្មោះ ច្រុច ហ៊ីង ភេទស្រី អាយុ៤៩ឆ្នាំ ទី២៖ ឈ្មោ ម៉ា សឿម ភេទស្រី អាយុ៦៧ឆ្នាំ។ ចំណែកជនរងគ្រោះទី៣ដែលសន្លប់ ឈ្មោះ ហ៊ា សាវុធ ហៅ ប៉ាក់ ភេទប្រុស អាយុ៥៣ឆ្នាំ។
មុនកើតហេតុជនរងគ្រោះទាំង៣នាក់ បានដេញគោពីព្រៃ ហើយក៏ត្រូវរន្ទះបាញ់តែម្តង។
សពជនរងគ្រោះត្រូវបានក្រុមគ្រួសារយកទៅធ្វើបុណ្យតាមប្រពៃណី ៕ ប៉េន នួន
...
