ភ្នំពេញ៖ លោក ប៉ា ជាតិវង្ស អភិបាលរាជធានីភ្នំពេញ បានបញ្ជាក់ឲ្យដឹងក្នុងកិច្ចប្រជុំពិភាក្សាការងារ ជាមួយអង្គការ ចៃការ ជប៉ុន(jica)នៅសាលារាជធានីភ្នំពេញ កាលពីព្រឹកថ្ងៃទី១៧ ខែវិចិ្ឆកា ឆ្នាំ២០១៦នេះថា៖ នៅបំណាច់ឆ្នាំ២០១៦នេះ រដ្ឋាករស្វយ័តរថយន្តក្រុងដឹកជញ្ជូនសាធារណៈ សាលារាជធានីភ្នំពេញ និងត្រូវបន្ថែមរថយន្តចំនួន២៨០គ្រឿងទៀត ដោយក្នុងនោះមកពីរដ្ឋាភិបាលជប៉ុន ១៨០គ្រឿង និងពីចិនចំនួន១០០គ្រឿង ។

ការបញ្ជាក់របស់លោកអភិបាលរាជធានីភ្នំពេញនេះ ធ្វើឡើងនៅព្រឹកថ្ងៃទី១៧ ខែវិច្ឆិកា ឆ្នាំ២០១៥នេះ ក្នុងជំនួបរវាងអ្នកបច្ចេកទេសសាលារាជធានីភ្នំពេញ និងអង្គការចៃការជប៉ុនប្រចាំនៅកម្ពុជាJICA ដើម្បីបញ្ជាក់ពីការដំណើរការបណ្ដុះបណ្ដាលបច្ចេកទេស សិក្សាចំណត និងខ្សែរត់ ពីសំណាក់អ្នកបច្ចេកទេសជប៉ុន ដែលនឹងចាប់ផ្តើមនៅខែមករា ឆ្នាំ២០១៦ ខាងមុខនេះ ។

លោក ប៉ា សុជាតិវង្ស បានបញ្ជាក់ថា «រដ្ឋាករស្វយ័តរថយន្តក្រុងដឹកជញ្ជូនសាធារណៈ នឹងពង្រឹងសេវារបស់ខ្លួនកាន់តែប្រសើរ ដើម្បីដោះស្រាយបញ្ហាកកស្ទះចរាចរណ៍ ការតម្លើងថ្លៃពេលបុណ្យទានម្តងៗ បម្រើសេវាទាន់ពេលវេលា ជាមួយនឹងបច្ចេកទេសថ្មី និងរថយន្តថ្មីៗបន្ថែមទៀត (១៨០គ្រឿងពីរដ្ឋាភិបាលជប៉ុន និង១០០គ្រឿងពីប្រទេសចិន) នៅឆ្នាំ២០១៦ខាងមុខនេះ» ។

លោកបានឲ្យដឹងទៀតថា «យើងនឹងរៀបចំដាក់ម៉ាស៊ីនឈូតកាត នៅតាមរថយន្តទាំងអស់ ដើម្បីជាការងាយស្រួល ក្នុងការគ្រប់គ្រង។ សូមបងប្អូនប្រជាពលរដ្ឋ ចូលរួមទាំងអស់គ្នា តាមលទ្ធភាពរបស់ខ្លួន ហើយសាលារាជធានីភ្នំពេញ ក៏ខិតខំឱ្យអស់ពីលទ្ធភាពដែរ ដើម្បីបម្រើជូនបងប្អូន» ។

លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ បានបញ្ជាក់ថា៖ បច្ចុប្បន្នរដ្ឋាករស្វយ័តរថយន្ដក្រុង ដឹកជញ្ជូនសាធារណៈរាជធានីភ្នំពេញ មានរថយន្តកំពុងដំណើរការចំនួន ៥០គ្រឿង ហើយចំពោះការពង្រីកសេវាកម្មដឹកជញ្ជូននេះ កំពុងស្ថិតក្នុងផែនការ និងគម្រោងនៅឡើយ ដោយធ្វើឡើងតាមជំហ៊ានៗ ៕

ដោយ៖ សំរិត