ឧត្តរមានជ័យ ៖ ក្រសួងធនធានទឹក និងឧតុនិយម បានប្រកាសថា សំណង់បង្ហៀរនៃទំនប់អាងទឹកថ្មី ដែលមានទីតាំងស្ថិតស្រុកអន្លង់វែង ខេត្តឧត្តរមានជ័យបានបញ្ចប់ការសាងសង់ជាស្ថាពរ។
គួររំលឹកជូនថា សំណង់បង្ហៀរនៃទំនប់អាងទឹកថ្មី ដែលរងការខូចខាតស្ទើរទាំងស្រុង ដោយសារគ្រោះទឹកជំនន់ជាបន្តបន្ទាប់ ត្រូវបានក្រសួងធនធានទឹក ធ្វើការសាងសង់ឡើងវិញប្រវែង ២៨០ ម៉ែត្រ ។
តាមរយៈការសាងសង់សំណង់បង្ហៀរថ្មីនេះ ទំនប់អាងទឹកថ្មី នឹងមានសមត្ថភាពស្តុកទឹកសម្រាប់ផ្គត់ផ្គង់ឱ្យការងារបង្កបង្កើនផលស្រូវលើផ្ទៃដីប្រមាណ ៦.០០០ ហិកតា ហើយនិងក្លាយទៅជាប្រភពទឹកដ៏សំខាន់មួយសម្រាប់ផ្គត់ផ្គង់ទឹកបន្ថែមទៅកាន់ប្រព័ន្ធធារាសាស្ត្រ ស្ទឹងស្រែង (ជំហានទី ២) ។
ក្រៅពីការផ្តល់អត្ថប្រយោជន៍ខាងលើ សំណង់នេះ ក៏នឹងក្លាយទៅជាផ្លូវគមនាគមន៍តភ្ជាប់ពីឃុំត្រពាំងតាវ ទៅកាន់ឃុំលំទង ស្រុកអន្លង់វែង ផងដែរ ៕ ប៉ែន នួន
