ភ្នំពេញ៖ ដោយងុបងុលនិងល្បែកបុរសម្នាក់បានលួចខ្សែកប្រពន្ធយកទៅលក់លេងល្បែងចាញ់អស់ធ្វើអោយប្រពន្ធខឹងហើយបានរត់ចោលបាត់ ខណៈប្តីមកវិញមិនឃើញ ខឹងប្រពន្ធរត់ចោលទៅចាក់សោបន្ទប់ជួលរបស់កូនស្រីបង្ខាំងពីខាងក្រៅបង្កឲ្យមានការភ្ញាក់ផ្អើល ដល់ប្រជាពលរដ្ឋដែលនៅក្បែរ កាលពីវេលាម៉ោង៨និង៣០នាទីយប់ថ្ងៃទី១៧ ខែវិច្ឆិកា នៅផ្ទះជួលភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ ។
ប្រភពព័ត៌មានពីនារីរងគ្រោះបានឲ្យដឹងថា ម្តាយរបស់នាងជាស្ត្រីមេម៉ាយកូនស្រី២នាក់ ប្រមាណជាពីរបីឆ្នាំកន្លងមកនេះម្តាយរបស់នាងមានប្តីម្នាក់ទៀតដែលមានអាយុជាង៣០ឆ្នាំ ការងារមិនពិតប្រាកដ តែនាងមិនបានស្នាក់នៅជាមួយទេ គឺពួកនាង២នាក់បានជួលបន្ទប់ ស្នាក់នៅតែ២នាក់ ហើយម្តាយរបស់នាងនៅជាមួយប្តីក្រោយរបស់គាត់ ។ ៣ថ្ងៃកន្លងមកនេះម្តាយរបស់នាងខឹងប្តីក្រោយយកខ្សែករបស់គាត់យកទៅលក់លេងល្បែងអស់ មិនហ៊ានរករឿងឈ្លោះជាមួយប្តីទេ ខ្លាចប្តីទៅរករឿងកូន ក៏បានចាកចេញទៅបាត់ដោយមិន ប្រាប់ប្តីទេ ធ្វើឲ្យប្តីដើររកប្រពន្ធមិនឃើញ នៅវេលាម៉ោង៧និង៣០នាទីយប់ថ្ងៃទី១៧ ខែវិច្ឆិកា ឪពុកចុងបានទៅសួរកូនស្រីទាំង២នាក់ដែលមានសង្សារម្នាក់ទៅលេងក្នុងបន្ទប់ នោះទៅសួររកប្រពន្ធរបស់គាត់ កូនស្រីប្រាប់ថាអត់ដឹង ឪពុកខឹងបានគំរាមថាទុកពេលឲ្យកូនមួយម៉ោងរកម្តាយមកជួបគាត់ បើរកម្តាយមិនឃើញទេគាត់នឹងយកសាំងមកដុតបន្ទប់ជួលនេះសម្លាប់ចោលហើយ រួចហើយក៏ចាក់សោពីខាងក្រៅបន្ទប់ដើរចេញទៅបាត់ ។
បន្ទាប់មក ជនរងគ្រោះបានប្តឹងសមត្ថកិច្ចមកអន្តរាគមន៍ ខណៈសមត្ថកិច្ចមកដល់ឪពុកចុងរបស់នាងមិននៅបន្ទប់ជួលគាត់ទេ ដោយគេចចេញទៅក្រៅបាត់ ដោយចាក់សោបន្ទាប់នាងខាងក្រៅ ត្រូវបានម្ចាស់ផ្ទះយកម៉ូទ័រមកកាត់សោចោល ។ ក្រោយពេលកើតហេតុ នារី២នាក់បងប្អូនក៏មិនទាន់បានដាក់ពាក្យបណ្តឹងទេ ។
ជនរងគ្រោះដែលត្រូវឱពុងចុងចាក់សោបង្ខាំងនៅខាងក្រៅឈ្មោះសឿនធារី ភេទស្រី អាយុ១៧ឆ្នាំមុខរបរកម្មការិនីរោងចក្រស្នាក់នៅភូមិបន្ទប់ជួលជាន់ទី៣ បន្ទប់លេខ១៤ ភូមិត្រពាំងថ្លឹងសង្កាត់ចោមចៅខណ្ឌពោធិ៍សែនជ័យ មានស្រុកកំណើតនៅស្រុកត្រាំងកក់ខេត្តតាកែវរស់នៅជាមួយប្អូន ស្រីឈ្មោះ សឿនធីតា អាយុ16ឆ្នាំ ធ្វើការជាមួយគ្នា និងមានម្តាយឈ្មោះ សេនមុំ អាយុ៤៥ឆ្នាំមុខរបរមិនពិតប្រាកដស្នាក់នៅផ្ទះជួលក្បែរគ្នានោះ នៅល្វែងផ្សេងគ្នា ជាន់ទី២ បន្ទប់លេខ១១ ៕
...
ដោយ៖ សុខាសែនជ័យ