ខេត្ដព្រះសីហនុ៖ យុវជនម្នាក់ជិះម៉ូតូ តាមផ្លូវជាតិត្រូវរថយន្ដដឹកសាំងរបស់ ក្រុមហ៊ុនតេលាបុកនិងកិនបណ្ដាលឱ្យ ស្លាប់នៅល្ងាចថ្ងៃទី១៧ ខែវិច្ចិកា ឆ្នាំ ២០១៥ នៅផ្លូវជាតិលេខ៤ ចន្លោះគីឡូ ម៉ែត្រ១២៥-១២៦ ស្ថិតក្នុងភូមិក្រាំង អាត់ ឃុំកំពង់សិលា ស្រុកកំពង់សិលា ខេត្ដព្រះសីហនុ ។
មន្ដ្រីនគរបាលស្រុកកំពង់សិលាបានឱ្យដឹងថា ករណីគ្រោះថ្នាក់ចរាចរណ៍នេះ គឺបង្កដោយរថយន្ដដឹកសាំងរបស់ក្រុមហ៊ុនតេលាបើកទៅបុកម៉ូតូ១គ្រឿងចំ ពីមុខបណ្ដាលឱ្យមនុស្សប្រុសម្នាក់ស្លាប់នៅនឹងកន្លែងក្នុងទិសដៅបញ្ច្រាសទិស គ្នាហើយរថយន្ដដឹកសាំងនោះបានបើក គេចចម្ងាយប្រហែលជា១០គីឡូម៉ែត្រ ក៏ត្រូវកម្លាំងនគរបាល ស្រុកកំពង់សិលា ដេញតាមចាប់និងឃាត់បានតែអ្នកបើកបររថយន្ដរត់គេចខ្លួនបាត់ស្រមោល។
នគរបាលឱ្យដឹងទៀតថា រថយន្ដដឹកសាំង បង្កពាក់ស្លាកលេខភ្នំពេញ3-B1461 និងម៉ូតូ១ជនរងគ្រោះម៉ាកហុងដាវេវ ពណ៌ខ្មៅ គ្មានស្លាកលេខ ។ ជនរងគ្រោះ ដែលស្លាប់ឈ្មោះ ឌី គឺន ភេទប្រុស អាយុ២៨ឆ្នាំ ជាកសិករ មានលំនៅភូមិ ថ្មី ឃុំកំពង់សិលា ស្រុកកំពង់សិលា ខេត្ដព្រះសីហនុ។
សពជនរងគ្រោះត្រូវបានសមត្ថកិច្ច ប្រគល់ឱ្យក្រុមសារយកទៅធ្វើបុណ្យ តាមប្រពៃណី ។ ចំណែករថយន្ដនិងម៉ូតូ ត្រូវបាននគរបាលចរាចរណ៍ស្រុកកំពង់សិលាយកទៅរក្សាទុករង់ចាំដោះស្រាយតាមច្បាប់ ៕
ដោយ៖ ឆ្លាមសមុទ្រ