ខេត្តកណ្តាល៖ រថយន្តមួយគ្រឿងមិនស្គាល់អត្តសញ្ញាបានបើកបោះពួយបុកម៉ូតូមួយគ្រឿងចំពីក្រោយពេញមួយទំហឹង បណ្តាលឲ្យមនុស្សប្រុស-ស្រី៣នាក់រងរបួសធ្ងន់ស្រាល កាលពីវេលាម៉ោង៦ និង៣០នាទី ថ្ងៃទី១៨ ខែវិច្ឆិកា ឆ្នាំ២០១៥ លើកំណាត់ផ្លូវជាតិលេខ២ ត្រង់ចំណុចចន្លោះគីឡូម៉ែត្រលេខ២៦-២៧ ស្ថិតក្នុងភូមិព្រែកអង្គុញ ឃុំសៀមរាប ស្រុកកណ្តាលស្ទឹង ។ ក្រោយពីមានហេតុការណ៍កើតឡើងរថយន្តមិនស្គាល់អត្តសញ្ញាណបានបើកគេចទៅទិសខាងត្បូងបាត់ស្រមោល រីឯជនរងគ្រោះត្រូវបានបញ្ជូនទៅសង្គ្រោះនៅមន្ទីរពេទ្យប្រតិបត្តិស្រុក ។
មន្ត្រីនគរបាលចរាចរណ៍ស្រុកកណ្តាលស្ទឹងបានឲ្យដឹងថា ជនរងគ្រោះទី១-ឈ្មោះ រុំ សុវណ្ណ ភេទប្រុស អាយុ៤៩ឆ្នាំ (ជាអ្នកបើកបរម៉ូតូរងរបួសធ្ងន់) ទី២-ឈ្មោះ វណ្ណ ស៊ីថា ភេទស្រី អាយុ២២ឆ្នាំ និងទី៣-ឈ្មោះ ផល្លី ស្រីលក្ខ័ ភេទស្រី អាយុ២១ឆ្នាំ ជនរងគ្រោះទាំង៣នាក់មានទីលំនៅក្នុងភូមិព្រែកស្លែង ឃុំព្រែកស្លែង ស្រុកកណ្ដាលស្ទឹង ជិះម៉ូតូធុនសេ១០០កូរ៉េ ពណ៌ក្រហម ពាក់ស្លាកលេខស្វាយរៀង1A-5264 ។ ចំណែកឯរថយន្តបង្កមិនស្គាល់អត្តសញ្ញាណក្រោយពីបង្កហេតុបានបើកគេចទៅទិសខាងត្បូងបាត់ស្រមោល ។
ប្រភពដដែលបានបន្តថា នៅមុនពេលកើតហេតុសាក្សីបានឃើញជនរងគ្រោះជិះម៉ូតូឌុបគ្នាតាមបណ្តោយផ្លូវជាតិលេខ២ ក្នុងទិសដៅពីជើងទៅត្បូង ខណៈជិះដល់កន្លែងកើតហេតុស្រាប់តែមានរថយន្តមិនស្គាល់អត្តសញ្ញាណបើកបុកម៉ូតូជនរងគ្រោះពីក្រោយ បណ្តាលឲ្យម៉ូតូដួលបោកទៅលើផ្លូវធ្វើឲ្យជនរងគ្រោះទាំង៣នាក់រងរបួសធ្ងន់-ស្រាលតែម្តង ៕
ដោយ៖ ស្អាងជ័យ