ខេត្តបន្ទាយមានជ័យ៖ យុវជនម្នាក់ត្រូវបានគេស្គាល់ថាជានិស្សិតឆ្នាំទី១រៀននៅសាកលវិទ្យាល័យUME ខេត្តបន្ទាយមានជ័យបានជិះម៉ូតូក្នុងល្បឿនលឿនហើយបើកជ្រុលទៅបុកគោយន្តពីក្រោយពេញទំហឹង បណ្តាលឱ្យដួលបោកក្បាលនិងថ្នល់ជាតិស្លាប់មួយរំពេចនៅកន្លែងកើតហេតុខណៈជនរងគ្រោះ បើកម៉ូតូតែម្នាក់ឯងនៅលើកំណាត់ផ្លូវជាតិលេខ៦ ត្រង់ចំណុចខាងកើតស្ពានទី១ ប្រហែល៤០០ម៉ែត្រ ស្ថិតក្នុងភូមិ១ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ ។
កាលពីវេលាម៉ោង៧និង១៥យប់ថ្ងៃទី១៧ ខែវិច្ឆិកា ឆ្នាំ២០១៥ទំនងធ្វើដំណើរទៅបឹងឈូក។ ជនរងគ្រោះមានឈ្មោះ តាំង ស៊ីវថុង ភេទប្រុស អាយុ១៩ឆ្នាំ រស់នៅភូមិសូភី សង្កាត់កំពង់ស្វាយ ក្រុងសិរីសោភ័ណ ។
ជុំវិញនៃហេតុការខាងលើ លោកវរសេនីយ៍ត្រី សួន នីប៉ូ នាយរងការិយាល័យនគរបាលចរា ចរណ៍ខេត្តប្រាប់ដឹងថាមុនពេលកើតហេតុគឺជនរងគ្រោះបានជិះម៉ូតូម្នាក់ឯងក្នុងទិសដៅ ពីលិចទៅកើតចេញពីកើត។ លុះបើកម៉ូតូមកដល់ចំណុចកើតហេតុខាងលើយប់ងងឹតមិនឃើញគោយន្តបើកនៅខាងមុខគ្មានភ្លើងបំភ្លឺខាងក្រោយ ជនរងគ្រោះក៏បើកជ្រុលទៅបុកគោយន្តពីក្រោយពេញទំហឹងបណ្តាលឱ្យស្លាប់នៅកន្លែងកើតហេតុ។ ក្រោយពីកើតហេតុនោះភ្លាម អ្នកបើកគោយន្តក៏បើករត់គេចខ្លួនបាត់។ បន្ទាប់មកទើបមានការភ្ញាក់ផ្អើលដល់ប្រជាពលរដ្ឋ រស់នៅក្បែរនោះ និងសមត្ថកិច្ច ចុះទៅដល់កន្លែងកើតហេតុ ។ សមត្ថកិច្ចស្វែងតាមចាប់គោយន្តនោះដែរក៏ប៉ុន្តែរកមិនឃើញគោយន្តនោះឡើយ ។
នៅកន្លែងកើតហេតុគេឃើញក្រុមគ្រួសារជនរងគ្រោះបានមកទទួលសព ក្រោមការស្រែកទ្រហោយំសោកស្តាយរៀបរាប់ពីសំណាក់ម្តាយជនរងគ្រោះដែលបាត់បង់ជីវិតកូនប្រុស មានតែម្នាក់នៅក្នុងក្រុមគ្រួសារ ។
ពាក់ព័ន្ធគ្រោះថ្នាកចរាចរណ៍ខាងលើ សមត្ថកិច្ចធ្វើការសន្និដ្ឋានថាបង្កឡើងដោយគោយន្តបើកនៅពេលយប់គ្មានភ្លើងបំភ្លឺខាងក្រោយចំណែកអ្នកបើកម៉ូតូបើកបរក្នុងល្បឿនលឿន ។
សូមបញ្ជាក់ថា នៅខេត្តបន្ទាយមានជ័យបើតាមរបាយការណ៍របស់ការិយាល័យនគរបាលចរាចរណ៍ខេត្តបានបង្ហាញឱ្យដឹថាក្នុងរយៈពេល១ខែចុងក្រោយនេះគ្រោះថ្នាក់ចរាចរណ៍ទូទាំងខេត្តបានកើតឡើង៣៥ករណីបណ្តាលឱ្យជនរងគ្រោះចំនួន២០នាក់ស្លាប់ និងអ្នកទទួលរងរបួសធ្ងន់ស្រាលសរុប៤៤នាក់។ អត្រាគ្រោះថ្នាក់ចរាចរណ៍នៅខេត្តបន្ទាយមានជ័យត្រូវគេនិយាយថាបានកើនឡើងជាបន្តបន្ទាប់គួរឱ្យព្រួយបារម្មណ៍ប្រើប្រៀបធៀបពីមួយខែទៅមួយខែនោះ ។
បញ្ហាគ្រោះថ្នាក់ចរាចរណ៍នេះដែរ ត្រូវបាននគរបាលចរាចរបង្ហាញឱ្យដឹងទៀតថាបង្កឡើងភាគច្រើនដោយកត្តាមនុស្សបើកបរមិនគោរពច្បាប់ចរាចរណ៍ខណៈដែល គេមើលឃើញថាអ្នកបើកបរយាន្តគ្រប់ប្រភេទនៅខេត្តបន្ទាយមានជ័យមួយភាគធំមិនបានអនុវត្ត ច្បាប់ចរាចរណ៍ឱ្យបានខ្ជាប់ខ្ជួននៅឡើយនោះទេ ជាពិសេសទៅលើរថយន្តដឹកសំពីងសំពោង រថយន្តកែច្នៃខុសបច្ចេកទេស អ្នកបើកម៉ូតូអត់ពាក់មួកសុវត្ថិភាព ជាដើមនោះ ៕
ដោយ៖ សំ វិច្ឆិកា