សុីរី៖ យ៉ាងហោចណាស់ក៏មានមនុស្ស ២១៥នាក់ស្លាប់ និង១៨០នាក់រងរបួស ក្នុងការវាយប្រហារគ្រាប់បែកអត្តឃាត និងវាយប្រហារដោយកាំភ្លើង ក្នុងខេត្ត Suwayda ភាគខាងត្បូង ប្រទេសស៊ីរី ។
កាលពីថ្ងៃទី ២៥ខែកក្កដា ក្រោយការវាយប្រហារកើតឡើង ក្រុមភេរវកម្ម IS នៅក្នុងប្រទេសនេះបាន ចេញមុខទទួលស្គាល់ថាជាសកម្មភាពរបស់ខ្លួន។
ក្រុម IS បានប្រកាសថា ខ្មាន់កាំភ្លើងរបស់ខ្លួន បានបើកការវាយប្រហារទៅលើទីតាំង សន្តិសុខ និងគោលដៅនានារបស់រដ្ឋ នៅក្នុងទីក្រុង Suwayda ។ ក្រោយពេលអស់គ្រាប់ក្រុមភេរវកម្ម ក៏បានបំផ្ទុះគ្រាប់បែក ដែលដាក់នៅក្នុងអាវរបស់ខ្លួនតែម្តង។
ក្នុងពេលជាមួយគ្នានេះដែរ អង្គការឃ្លាំងមើលសិទ្ធិមនុស្សស៊ីរី SOHR បានប្រកាសថា ខ្មាន់កាំភ្លើង បានវាយប្រហារទៅលើភូមិជាច្រើននៅភាគខាងកើតខេត្ត Suwanyda ជាកន្លែងដែលប៉ះទង្គិចគ្នារវាងក្រុមភេរវកម្មនិង ទាហានរដ្ឋាភិបាល។
ក្នុងថ្ងៃជាមួយគ្នានេះដែរ មានការវាយប្រហារគ្រាប់បែកអត្តឃាត មួយផ្សេងទៀតនៅក្នុងផ្សារបន្លែ បណ្តាលឲ្យមនុស្ស ៣៨នាក់ស្លាប់និង ជាង ៣០នាក់រងរបួស ។ បណ្តាញទូរទស្សន៍ Ikhbariya បានផ្សព្វផ្សាយនៅរូបភាពនៃការវាយប្រហារ ឲ្យឃើញថាមានជនរងគ្រោះជាច្រើន ដែកស្លាប់និងរបួសពាសពេញដី ហើយ រថយន្តជាច្រើន រងការបំផ្លាញ។
កម្លាំងទាហានស៊ីរីក៏បានរារាំងការវាយប្រហារផ្សេងទៀត ២កន្លែងផងដែរនៅក្នុងខេត្ត As Suwayda ដោយកម្លាំងប៉ូលិសបានបាញ់សម្លាប់ ជនវាយប្រហារពីរនាក់ មុនពេលបំផ្ទុះ គ្រាប់បែកអត្តឃាតលាក់នៅក្នុងខ្លួន។
ក្រុមភេរវកម្ម IS បានបាត់បង់ទីតាំង ទាំងស្រុងនៅក្នុងប្រទេសស៊ីរី ក្រោយការវាយប្រហារ ពីកម្លាំងទាហានស៊ីរី ដែលមានការគាំទ្រពីរុស្ស៊ី។ ចាប់តាំងពីខែមិថុនា ឆ្នាំ២០១៨ កម្លាំងទាហានរដ្ឋាភិបាលស៊ីរី បានបោសសម្អាតក្រុម IS ដែលនៅសេសសល់ក្នុងទឹកដីស៊ីរី។
ក្រោយពេលបាត់បង់ទីតាំងដ៏សំខាន់នៅភាគខាងកើតស៊ីរី កាលពីចុងឆ្នាំ២០១៧ ក្រុមភេរវកម្ម IS បានចាប់ផ្តើម បើកការវាយប្រហារ ទៅលើតំបន់នៅវាលរហោស្ថានក្នុងប្រទេសស៊ីរី ហើយទីនោះជាតំបន់តែមួយគត់ដែលក្រុមភេរវកម្មនៅតែបន្តគ្រប់គ្រោង៕
ដោយ៖ ម៉ែវ សាធី
