ភ្នំពេញ៖ បុរសពីរនាក់រងរបួសធ្ងន់ និងម្នាក់ទៀតរងរបួសស្រាល ខណៈដែលពួកគាត់ជិះម៉ូតូហុងដា ឌ្រីមសង់ C125 មួយគ្រឿងឌុបគ្នាក្នងល្បឿនលឿន ហើយជ្រុលទៅបុកជាមួយនឹងរ៉ឺម៉កម៉ូតូកង់បីពេញ ហើយរ៉ឺម៉កម៉ូតូកង់បីព្យាយាមបើករត់គេចខ្លួនបាត់ស្រមោល ដោយបន្សល់ទុកនៅតែជនរងគ្រោះនៅកន្លែងកើតហេតុ ។
ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង២២និង៣០នាទីថ្ងៃទី១៩ ខែវិច្ឆិកា ឆ្នាំ២០១៥ តាមបណ្ដោយយផ្លូវ ព្រះស៊ីសុវត្ថិ នៅចំណុចខាងមុខព្រះបរមរាជ្យេវាំង ស្ថិតក្នុងសង្កាត់ ជិះជំនះ ខណ្ឌដូនពេញ រាជធានីភ្នំពេញ ។
ប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុគេបានឃើញមានបុរសបីនាក់ជិះម៉ូតូមួយម៉ាក ហុងដា ឌ្រីមC125 ពណ៍ខ្មៅមួយគ្រឿងឌុបគ្នាបីនាក់ ពាក់ស្លាកលេខ ភ្នំពេញ 1BO-7726 ឌុបគ្នាក្នុងល្បឿនលឿនទិសដៅពីត្បូងទៅជើងលុះមកដល់ចំណុចកើតហេតុក៏ជ្រុលទៅបុករ៉ឺម៉កម៉ូតូកង់បីមួយគ្រឿងដែលធ្វើដំណើរបញ្ច្រាស់ទិសគ្នាពេញទំហឹងបណ្ដាលអោយបុរសម្នាក់រងរបួសបាក់ជើងខាងឆ្វេងនិងម្នាក់ទៀតសន្លប់ស្ដូកស្ដឹងនិងម្នាក់ទៀតរងរបួសស្រាល ។
ក្រោយកើតហេតុរ៉ឺម៉កម៉ូតូកង់បីបានព្យាយាមបើករត់គេចខ្លួនបាត់ ចំណែកជនរងគ្រោះទាំងបីនាក់ត្រូវបានកម្លាំងនគបាលជួយហៅរថយន្តសង្គ្រោះដឹកយកទៅសង្គ្រោះនៅមន្ទីរពេទ្យភ្លាមៗផងដែរ ចំណែកឯម៉ូតូរបស់ជនរងគ្រោះត្រូវបាននគបាល ជំនាញយកទៅរក្សាទុកនៅអធិការដ្ឋានខណ្ឌដូនពេញ ដើម្បីរងចាំក្រុមគ្រួសារមកទទួលយកទៅវិញផងដែរ ៕
ដោយ៖ ព្រែកជ័យ
