ភ្នំពេញ៖ នៅយប់ថ្ងៃទី១៩ ខែវិច្ឆិកា ឆ្នាំ២០១៥ នាវេលាម៉ោង២២និង៣០នាទី មានហេតុការណ៍ផ្ទុះគ្រាប់កាំភ្លើងអស់ជាច្រើនគ្រាប់ ដែលមានជនមួយក្រុមបានជិះម៉ូតូដេញតាមរថយន្តCRV មួយគ្រឿងជិះគ្នាពីរនាក់ទៅបីនាក់ និងបានយកកាំភ្លើងវាយកញ្ចក់រថយន្ត ហើយដកកាំភ្លើងខ្លីភ្ជង់ដាក់គ្នាទៅវិញទៅមក រហូតផ្ទុះការបាញ់ជាច្រើនគ្រាប់ ទៅលើដី រួចនាំគ្នាជិះចេញពីរកន្លែងកើតហេតុបាត់អស់តែម្តង។ទីតាំងបង្កហេតុនេះស្ថិតនៅចំណុចក្បែរនឹងភោជនីយដ្ឋាន តាមបណ្តោយផ្លូវលេខ៣៦០ ស្ថិតក្នុងសង្កាត់ បឹងកេងកងទី១ ខណ្ឌចំការមន ។
ប្រភពព័ត៌មានពីរប្រជាពលរដ្ឋដែលនៅក្បែរកន្លែងកើតហេតុបានឲ្យដឹងថា នៅមុនពេលកើតហេតុ គេបានឃើញរថយន្តCRV ពណ៍ទឹកប្រាក់មួយគ្រឿង មិនចាំស្លាកលេខ បើកបរតាមបណ្តោយផ្លូវលេខ៣៦០ ទិសដៅពីកើតទៅលិច ហើយក៏មានម៉ូតូ២គ្រឿងមានគ្នា៣នាក់ ស្លៀកពាក់ទំនងជាអង្គរក្សប្រដាប់ដោយកាំភ្លើងគ្រប់ដៃដេញតាមរថយន្តពីក្រោយ ហើយមកដល់កន្លែងកើតហេតុ បានជិះមកកាកពីមុខឃាត់រថយន្តឱ្យឈប់ ។
ប្រភពដដែលបានបន្តថា នៅពេលរថយន្តនោះឈប់ ពួកគេបាននាំគ្នាវាយបំបែកកញ្ចក់រថយន្ត និងបានឈ្លោះប្រកែកគ្នា ហើយម្ចាស់រថយន្តក៏បានដកកាំភ្លើងមកភ្ជង់គ្នា ទៅវិញទៅមក រហូតមានការផ្ទុះគ្រាប់នូវការបាញ់ភ្ជច់ដីជាច្រើនគ្រាប់ តែមិនបង្កឱ្យនរណាម្នាក់រងរបួសនោះទេ ហើយពួកគេក៏បានជិះគេចខ្លួនបាត់អស់រៀងៗខ្លួនតែម្តង ដោយបន្សល់ទុកគ្រាប់មិនទាន់បាញ់និងគ្រាប់ដែលបាញ់ហើយនៅលើដីជាច្រើនគ្រាប់នៅនិងកន្លែងកើតហេតុ ៕
ដោយ៖ ភារ៉ា ដង្កោ
