ភ្នំពេញ ៖ កាលពីយប់មិញថ្ងៃទី៥សីហា តារាសម្ដែង លោក ញ៉ែម សុគន្ធ បានបើកបរ រថយន្តបុករបាំងពុះចែកទ្រូងពេញមួយទំហឹង បណ្តាលឲ្យរបាំងថ្មបាក់បែក និងលោកបានរងរបួសធ្ងន់ ។ ហេតុការណ៍នេះកើតឡើងកាលពីវេលាម៉ោង១១និង៥០នាទី យប់ថ្ងៃទី៥ ខែសីហា ឆ្នាំ២០១៨ ត្រង់ចំណុចផ្លូវបំបែកជាបួន លើមហាវិថីម៉ៅសេទុង កែងផ្លូវលេខ ១៩៣ ស្ថិតក្នុងសង្កាត់ទួលស្វាយព្រៃទី២ ខណ្ឌចំការមន រាជធានីភ្នំពេញ ។
សាក្សីថា មុនពេលកើតហេតុ សិល្បករ ឈ្មោះ ញ៉ែម សុគន្ធ បានបើករថយន្តម៉ាកហាយឡេនឌ័រ ១គ្រឿង ពណ៌ស្ករ ពាក់ស្លាកលេខ ភ្នំពេញ 2AK-5321 ធ្វើដំណើរតាមបណ្ដោយមហាវិថីម៉ៅសេទុង ទិសដៅពីកើតទៅលិចក្នុងល្បឿនយ៉ាងលឿន។ លុះមកដល់ចំណុចកើតហេតុ ដោយមិនដឹងមានមូលហេតុអ្វី ស្រាប់តែគេឃើញរថយន្តរបស់លោក ញ៉ែម សុគន្ធ បានរេចង្កូតទៅបុកក្បាលនាគកណ្ដាលទ្រូងផ្លូវយ៉ាងពេញទំហឹង បណ្ដាលឱ្យតារាសម្ដែងរូបនេះ រងរបួសធ្ងន់ ដោយបានហោះប្លោងទៅបុកផ្ទប់នឹងកញ្ចក់រថយន្ត ហើយត្រូវបានគេដឹកបញ្ជូនទៅសង្គ្រោះនៅមន្ទីរពេទ្យភ្លាម។ ចំណែករថយន្តវិញ បានផ្ទុះពោងសុវត្ថិភាពទាំងអស់ និងខនិងខូចខាតផ្នែកខាងមុខយ៉ាងដំណំ ខណៈរបាំងថ្មជាច្រើនកង់បានបាក់របាត់រប៉ាយ។
មធ្យោបាយធ្វើដំណើររបស់លោក ត្រូវបានសមត្ថកិច្ចស្ទូចយកទៅរក្សាទុកនៅការិយាល័យចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញ ដើម្បីរង់ចាំភាគីម្ចាស់រថយន្តចូលខ្លួនដោះស្រាយសំណងខូចខាតទ្រព្យសម្បត្តិរដ្ឋ ៕ ស រស្មី
