ភ្នំពេញ៖ របាំងថ្មពុះចែកទ្រូងផ្លូវ៣កង់ បានរងការខូចខាតដួលរំ ដោយសាររថយន្តម៉ាកឡិចស៊ីសGX470មួយគ្រឿងដែលគេសង្ស័យអ្នកបើកបរស្រវឹងងងុយដេកលក់មួយភាំងបើកទៅបុកទាំងកំរោល ។
ឧប្បត្តិហេតុនេះបានកើតឡើងកាលពីវេលាម៉ោង៩ និង៣០នាទីយប់ថ្ងៃទី២០ ខែវិច្ឆិកា ឆ្នាំ២០១៥ ស្ថិតនៅមុខហាងកាត់សក់(តារាចន្ទ) ខាងជើងមន្ទីរពេទ្យព្រះកុសមៈតាមបណ្ដោយផ្លូវលេខ២៧១ ក្នុងសង្កាត់ទឹកល្អក់២ ខណ្ឌទួលគោក ។
តាមប្រភពពីកន្លែងកើតហេតុរាយករណ៏ឱ្យដឹងថាមុនពេលកើតហេតុ គេឃើញរថយន្តបង្កម៉ាកឡិចស៊ីសGX 470 ពណ៌សមួយគ្រឿង ពាក់ស្លាកលេខភ្នំពេញ2AG-0035 មានផ្ទុកមនុស្សជិះ២នាក់ ធ្វើដំណើរតាមបណ្តោយផ្លូវ២៧១ក្នុងទិសដៅពីជើងទៅត្បូងក្នុងស្ថានភាពស្រវឹង។ លុះមកដល់ចំណុចកើតហេតុខាងលើ ក៏រេចង្កូតទៅបុករបាំងថ្មរពុះចែកទ្រួងផ្លូវនោះ បណ្ដាលអោយរលំដួល១កង់និងវៀចចេញពីទំរង់ដើមចំនួន២កង់បណ្តាលឱ្យរថយន្តដាច់កាឡេកង់មុខខាងឆ្វេងទៅមុខលែងរួចតែមិនមានរងរបួសដល់អ្នកអ្នកជិះនោះទេ ។
ប្រភពព័ត៌មានដដែលបានឲ្យដឹងទៀតថា ភ្លាមៗនោះរថយន្តបង្កបានព្យាយាមបើករត់គេច ទៅដល់ចំណុចមុខឱសថស្ថាន (ហ្វាម៉ាតព្រះកុសះមះ) ទើបឈប់រួចគេចខ្លួនបាត់អស់ព្រោះមិនអាចបន្តដំណើរទៅមុខរួចទៀតបាន។ ក្រោយមក ត្រូវបានកម្លាំងនគរបាលចរាចរណ៍រាជធានីយករថយន្តមកស្ទូចយកទៅរក្សាទុកនៅការិយាល័យនគរបាលចរាចរណ៍ផ្លូវគោកក្រុងភ្នំពេញ ដើម្បីធ្វើការដោះស្រាយពេលក្រោយ ៕
ដោយ៖ ប្រាថ្នា
