ភ្នំពេញ៖ ក្មេងទំនើងម្នាក់ត្រូវបាននគរខណ្ឌសែនសុខឃាត់ខ្លួន ខណៈដែលរូបគេបានរក្សាទុកនៅឧបករណ៍ដែកកែឆ្នៃសម្រាប់ឆ្កិះសោកម៉ូតូនៅក្នុងកាបូបរបស់ខ្លួន ។
ករណីឃាត់ខ្លួននេះបានធ្វើឡើងកាលពីវេលាម៉ោង០៥និង៣០នាទីទៀបភ្លឺ ថ្ងៃទី២១ ខែវិច្ឆិកា ឆ្នាំ២០១៥នៅចំណុចផ្លូវ២៧១ភូមិត្រពាំងឈូក សង្កាត់ទឹកថ្លា ខណ្ឌសែនសុខ រាជធានីភ្នំពេញ ។
ជនសង្ស័យជាក្មេងទំនើងនោះ មានឈ្មោះ រ៉ា ល៉ីន ភេទប្រុស អាយុ២២ឆ្នាំ មុខរបរធ្វើសំណង់ ស្នាក់នៅផ្ទះជួល ក្រុម១០ ភូមិត្រពាំងឈូក សង្កាត់ទឹកថ្លា ខណ្ឌសែនសុខ រាជធានីភ្នំពេញ ។
សមត្ថកិច្ចបានអោយដឹងថា មុននឹងឃាត់ខ្លួនជនសង្ស័យខាងលើគឺកំលាំងមានសមត្ថកិច្ចបានល្បាតនៅក្នុងមូលដ្ឋានដើម្បីការពារសុវត្តិភាពជួនប្រជាពលរដ្ឋ លុះមកដល់ចំណុចខាងលើ ស្រាប់តែឃើញជនសង្ស័យរូបនេះបានឈរស្ពាយកាបូបនៅលើផ្លូវ២៧១ ម្តុំមុខពេទ្យលោកសង្ឃ មានការសង្ស័យ ក៏ឃាត់ឆែកឆេរហើយរកឃើញនៅក្នុងកាបូបមានដែកកែឆ្នៃសម្រាប់ឆ្កិះសោកម៉ូតូចំនួន១ សោចិញ្ជៀនចំនួន២ដើមទើបឃាត់ខ្លួនយកមកសួរនាំនៅប៉ុស្តិ៍នគរបាលទឹកថ្លាតែម្តង។
បច្ចុប្បន្ន ជនសង្ស័យ រួមនឹងវត្ថុតាងកំពុងឃាត់ខ្លួននៅអធិការនគរបាលខណ្ឌសែនសុខដើម្បីចាត់ការតាមផ្លូវច្បាប់៕
ដោយ៖ តុង សីហា
