ភ្នំពេញ៖ អភិបាលរាជធានីភ្នំពេញលោកប៉ា សុជាតិវង្សបានសម្ដែងការខកចិត្តយ៉ាងខ្លាំងចំពោះក្រុមហ៊ុន ដែលគ្រប់គ្រងផ្សារអូរឫស្សី ដោយហេតុថា ផ្សារនេះទាំងសោភណ្ឌភាពខាងក្នុងខាងក្រៅ ការរៀបចំសណ្ដាប់ធ្នាប់មិនសមជាផ្សារ នៅកណ្តាលក្រុងនោះទេ វាអន់ជាងផ្សារនៅតាមជនបទថែមទៀតផង ដែលបញ្ហានេះក្រុមហ៊ុន គួរតែកែសម្រួលឡើងវិញ មិនអាចធ្វើដូច្នេះបន្តទៀតទេ ។
ការសម្តែងការខកចិត្ត ចំពោះក្រុមហ៊ុនគ្រប់គ្រងផ្សារអូរឫស្សីនេះ លោកប៉ា សុជាតិវង្សបានសម្ដែងឲ្យឃើញ គឺក្នុងខណៈដែលលោកអភិបាល អភិបាលរង រួមនិងមន្ត្រីមួយចំនួនទៀត ចុះមកពិនិត្យការរៀបចំសណ្ដាប់ធ្នាប់នៅក្នុងផ្សារអូរឫស្សី កាលពីព្រឹកថ្ងៃទី២១ វិច្ឆិកា ហើយតំណាងក្រុមហ៊ុន គ្រប់គ្រងផ្សារមួយនេះក៏បានអមដំណើរផងដែរ ។
លោកប៉ា សុជាតិវង្ស បានមានប្រសាសន៍លើកឡើងថា បើយើងមើលពីសោភណ្ឌភាពទាំងស្រុងនៃផ្សារទាំងមូល គឺមិនសមជាផ្សារនៅកណ្ដាលក្រុងនោះទេ វាអន់ជាងផ្សារនៅតាមជនបទថែមទៀតផង។ ក្រុមហ៊ុនគិតតែពីយកលុយ មិនគិតពីការអភិវឌ្ឍន៍ផ្សារអោយសមជាផ្សារនៅកណ្ដាលក្រុងសោះ ។ លើបញ្ហានេះលោកប៉ា សុជាតិវង្ស បានណែនាំអោយក្រុមហ៊ុន ធ្វើការកែសម្រួលឡើងវិញ ទាំងការរៀបចំសោភណ្ឌភាពផ្សារ ការរៀបចំសណ្ដាប់ធ្នាប់ បរិស្ថាននិងការៀបចំចំណតជាដើម។លើការរៀបចំចំណតនេះជាការងារ ដែលត្រូវតែធ្វើឲ្យបានស្អាត ជាចំណតបង់ប្រាក់ ។
លោកប៉ា សុជាតិវង្សក៏បានបញ្ជាក់ផងដែរថា នៅក្នុងការចុះមកពិនិត្យនេះ មានចំណុច២ ដែលលោកចាប់អារម្មណ៍ខ្លាំង និងតម្រូវឲ្យកែប្រែ ទី១.ត្រូវរៀបចំទីស្នាក់ការផ្សារឡើងវិញ ដើម្បីងាយស្រួលក្នុងការបំពេញការងារទាំងការថែរក្សាសន្តិសុខ និងការរៀបចំសណ្ដាប់ធ្នាប់ជាដើម ព្រោះមានលក្ខណៈតូចចង្អៀតពិបាកធ្វើការ ទី២.ឲ្យមានការរៀបចំហេដ្ឋារចនាសម្ព័ន្ធសណ្ដាប់ធ្នាប់សាធារណៈទាំងខាងលើ ខាងក្រោយនិងខាងក្រៅឲ្យបានល្អ ដោយបច្ចុប្បន្ននេះ ឃើញថា សណ្ដាប់ធ្នាប់មិនទាន់រៀបរយនៅឡើយទេ ។
លោកប៉ា សុជាតិវង្សមានប្រសាសន៍បន្តទៀតថា នៅពេលខាងមុខនេះ ជាទិសដៅរបស់សាលារាជធានីភ្នំពេញ ផ្សារអូរឫស្សីត្រូវតែធ្វើការកែសម្រួលជាចាំបាច់ ដូច្នេះក្រុមហ៊ុនលឹម ហេង គ្រុមដែលជាក្រុមហ៊ុនទទួលសិទ្ធិគ្រប់គ្រងផ្សារអូរឫស្សីត្រូវតែគូរប្លង់ជាថ្មី ហើយយកមកឆ្លងសាលារាជធានីភ្នំពេញ ដើម្បីពិនិត្យនិងសម្រេចជាក្រោយ ។ ជាងនេះទៅទៀតសាលារាជធានីភ្នំពេញនឹងបង្កើតជាអង្គប្រជុំមួយ មុននឹងឈានទៅដល់ការរៀបឧបសម្ពន្ធ ដើម្បីធ្វើយ៉ាងណាអោយផ្សារអូរឫស្សី សមជាផ្សារនៅកណ្ដាលក្រុង ។
សូមបញ្ជាក់ថា៖ ផ្សារអូរឫស្សី ត្រូវបានវិនិយោគដោយក្រុមហ៊ុនឯកជន លឹម ហេងគ្រុបចំនួន៧០ឆ្នាំ ដោយចាប់ផ្តើមកាលពីឆ្នាំ២០០០ តែមកដល់ពេលនេះបានរយៈពេលត្រឹមតែ១៥ឆ្នាំប៉ុណ្ណោះ ពិដាននៃតួផ្សារមួយចំនួន ត្រូវបានពុកផុយចេញសរសៃដែកទៅហើយ ហើយជុំវិញបញ្ហានេះលោកប៉ា សុជាតិវង្សក៏បានណែនាំអោយក្រុមហ៊ុនយកចិត្តទុកដាក់ឲ្យបានខ្លាំងក្លាផងដែរ ៕
ដោយ៖ សំរិត
