ខេត្តកណ្តាល៖ បុរសម្នាក់បានស្លាប់បាត់បង់ពេលបញ្ជូនទៅសង្គ្រោះនៅមន្ទីរពេទ្យ រីឯម្នាក់ទៀតរងរបួសធ្ងន់កំពុងសម្រាកព្យាបាលរបួសនៅមន្ទីរពេទ្យប្រតិបត្តិស្រុកឧដុង្គ បន្ទាប់ពីបុរសទាំង២នាក់ខាងលើនេះជិះម៉ូតូបុកគ្នាពេញមួយទំហឹងនៅលើកំណាត់ផ្លូវលំ គ្រាដែលបើកបរក្នុងទិសដៅបញ្ច្រាស់គ្នា កាលពីវេលាម៉ោង១៩ និង២០នាទី ថ្ងៃទី២២ ខែវិច្ឆិកា ឆ្នាំ២០១៥ លើកំណាត់ផ្លូវលំក្រាលគ្រួសក្រហម ស្ថិតក្នុងភូមិត្រពាំវាល ឃុំជ្រៃលាស់ ស្រុកពញាឮ ។
បុរសស្លាប់បាត់បង់ជីវិតត្រូវគេស្គាល់ឈ្មោះ មាន បាន ហៅចាវ ភេទប្រុស អាយុ២២ឆ្នាំ មានទីក្នុងភូមិត្រពាំវាល ឃុំជ្រៃលាស់ ស្រុកពញាឮ ជាអ្នកបើកបរម៉ូតូម៉ាកហុងដាគុបមូល ធុនសេ៥០ ពណ៌ស្លែ គ្មានស្លាកលេខ ។ ចំណែកឯបុរសរងរបួសធ្ងន់ឈ្មោះ ភិន សុផា ភេទប្រុស អាយុ២៤ឆ្នាំ មានទីលំនៅភូមិត្រពាំវាល ឃុំជ្រៃលាស់ ស្រុកពញាឮ ជាអ្នកបើកបរម៉ូតូម៉ាកហុងដាស្គុបពី ពណ៌ស ពាក់ស្លាកលេខភ្នំពេញ1FB-1371 ។
សាក្សីនិយាយថា នៅមុនពេលកើតហេតុគេបានឃើញម៉ូតូម៉ាកហុងដាស្គុបពីបើកបរតាមបណ្តោយផ្លូវលំក្នុងទិសដៅពីត្បូងទៅជើងដោយល្បឿនលឿន ខណៈបើកដល់ចំណុចកើតហេតុមិនដឹងជាមានឧបសគ្គអ្វីនៅខាងមុខនោះទេ ទើបបណ្តាលឲ្យជ្រុលទៅបុកជាមួយម៉ូតូម៉ាកហុងដាគុបមូលដែលបើកបរក្នុងទិសដៅបញ្ច្រាស់គ្នាពេញមួយទំហឹង ធ្វើឲ្យភាគីទាំងពីររងរបួសយ៉ាងធ្ងន់ធ្ងរ ។ ភ្លាមៗនោះរថយន្តសង្គ្រោះបន្ទាន់បានដឹកជនរងគ្រោះទាង២នាក់ទៅកាន់មន្ទីរពេទ្យ តែជាអកុសលភាគីម៉ូតូគុបបានស្លាប់បាត់បង់ជីវិតពេលបញ្ជូនទៅដល់មន្ទីរពេទ្យ ។
បច្ចុប្បន្នម៉ូតូទាំង២គ្រឿងត្រូវបានសមត្ថកិច្ចប៉ូលិសធ្វើការវាស់វែង ដកហូតនាំយកទៅរក្សាទុកនៅអធិការដ្ឋាននគរបាលស្រុក ដើម្បីចាត់ការតាមច្បាប់ ។ ជំណែកឯសាកសពជនរងគ្រោះត្រូវបានក្រុមគ្រួសារយកទៅចាត់ចែងធ្វើបុណ្យតាមប្រពៃណី ៕
ដោយ៖ ស្អាងជ័យ
