ខេត្តកណ្តាល៖ បុរស-ស្ត្រី២នាក់ប្តីប្រពន្ធជិះម៉ូតូឌុបគ្នាឆ្លងផ្លូវជាតិលេខ៥ដោយខ្វះការប្រុងប្រយ័ត្ន បណ្តាលឲ្យរថយន្តទួរីសបុកចំទទឹងម៉ូតូរងរបួសស្រាល កាលពីវេលាម៉ោង៧ និង១០នាទី ថ្ងៃទី២៤ ខែវិច្ឆិកា ឆ្នាំ២០១៥ ត្រង់ចំណុចចន្លោះគីឡូម៉ែត្រលេខ៣៣-៣៤ ស្ថិតក្នុងភូមិសង្វរ ឃុំកំពង់លួង ស្រុកពញាឮ ។
បុរសជាប្តីមានឈ្មោះ ស សារិន ភេទប្រុស អាយុ២៧ឆ្នាំ (ជាអ្នកបើកបរម៉ូតូ) ស្ត្រីជាប្រពន្ធឈ្មោះ ប៉ែន សុខគី អាយុ២៧ឆ្នាំ ។ ជនរងគ្រោះទាំង២នាក់ខាងលើនេះមានទីលំនៅក្នុងភូមិត្រពាំងព្នៅ ឃុំជ្រេស ស្រុកកំពង់ត្រឡាច ខេត្កកំពង់ឆ្នាំង ជិះម៉ូតូម៉ាកហុងដាឌ្រីម ធុនសេ១២៥ ពណ៌ខ្មៅ ស៊េរីឆ្នាំ២០១៥ ពាក់ស្លាកលេខកំពង់ឆ្នាំង1E-4108 ។ ចំណែកឯរថយន្តម៉ាសាំយ៉ុង ១៥កៅអី ពណ៌ស ពាក់ស្លាកលេខភ្នំពេញ2AC-4570 បើកបរដោយឈ្មោះ ឌុច សុផា ភេទប្រុស អាយុ២៤ឆ្នាំ មានទីលំនៅក្នុងភូមិតាជេស ឃុំតាជេស ស្រុកកំពង់ត្រឡាច ខេត្តកំពង់ឆ្នាំង ។
សាក្សីនិយាយថា នៅមុនពេលកើតហេតុគេបានឃើញរថយន្តទួសរីសខាងលើនេះបើកបរតាមបណ្តោយផ្លូវជាតិលេខ៥ ក្នុងទិសដៅពីកើតទៅលិចដោយល្បឿនលឿន ខណៈបើកជិតដល់ចំណុចកើតហេតុខាងលើនេះក៏ស្រាបតែមានម៉ូតូ២នាក់ប្តីប្រពន្ធបើកឆ្លងផ្លូវ ធ្វើឲ្យអ្នកបើកបររថយន្តជាន់ហ្វ្រាំងយ៉ាងគំហុកអូសប្រមាណ១០ម៉ែត្រនៅតែមិនជាប់ បណ្តាលឲ្យទៅបុកចំទទឹងម៉ូតូធ្វើឲ្យអ្នកជិះម៉ូតូ២នាក់ប្តីប្រពន្ធរងរបួសស្រាល ។
ក្រោយពីមានហេតុការណ៍កើតឡើងជនរងគ្រោះត្រូវបានបញ្ជូនទៅសង្គ្រោះនៅមន្ទីរពេទ្យឯកជនប្រាក់សំអនដែលមានទីតាំងក្បែរនោះ ។ ដោយឡែកមធ្យោបាយពាក់ព័ន្ធទាំង២គ្រឿងត្រូវបានសមត្ថកិច្ចនគរបាលចរាចរណ៍ធ្វើការវាស់វែង ដកហូតនាំយកទៅរក្សាទុកនៅអធិការដ្ឋាននគរបាលស្រុក ដើម្បីចាត់ការតាមច្បាប់ ៕
ដោយ៖ ស្អាងជ័យ
