ខេត្តបាត់ដំបង៖ នគរបាលខេត្តបាត់ដំបងនៅព្រឹកថ្ងៃទី២៣ ខែវិច្ឆិកា ឆ្នាំ២០១៥ បានចាប់បញ្ជូននាយទាហានម្នាក់បំរើការងារនៅក្នុងអង្គភាពបញ្ជាការដ្ឋានរថក្រោះបាញ់បោះសេរីនៅហាងខារ៉ាអូរខេព្រីនសេស ទៅកាន់តុលាការដើម្បីយកទៅចាត់ការតាមផ្លូវច្បាប់នោះហើយ។
នាយទាហានម្នាក់ដែលគេស្គាល់ឈ្មោះ រ័ត្ន សេរីបញ្ញាអាយុ៣៥ឆ្នាំ ជាមន្ត្រីយោធាក្នុងអង្គភាពបញ្ជាការដ្ឋានរថក្រោះ បានផឹកស្រាស្រវឹងក្នុងហាងខារ៉ាអូរខេហើយប្រើប្រាស់កាំភ្លើងខ្លីម៉ាកឡុកផលិតនៅប្រទេសចិនចំនួន១ដើម បាញ់បោះសេរីដោយ ខឹងបាញ់ទូរស័ព្ទដៃទំនើប១គ្រឿងម៉ាកអាយហ្វូនតម្លៃរាប់រយដូល្លា នៅក្នុងបន្ទប់ខារ៉ាងូរខេ ព្រីនសេសស្ថិតក្នុងភូមិរំចេក៤ សង្កាត់រតនៈ ក្រុងបាត់ដំបង ខេត្តបាត់ដំបងកាលពីថ្ងៃទី២២ខែវិច្ឆិកា ឆ្នាំ២០១៥ វេលាម៉ោង១០និង៤៥នាទីយប់បង្កឱ្យមានការភ្ញាក់ផ្អើលដល់ភ្ញៀវ និងនារីបំរើការងារក្នុងហាងខារ៉ាអូរខេនោះនាំគ្នារត់ចេញពីបន្ទប់បាតជើងសព្រៀតដើម្បីរកទីសុវត្ថិភាព ។
ក្រោយពីបង្កហេតុនោះភ្លាមកម្លាំងនគរបាលខេត្តបាត់ដំបងក្រោមការបញ្ជាផ្ទាល់របស់លោកឧត្តមសេនីយ៍ ស ថេត ស្នងការនគរបាលខេត្ត បានចាត់លោកឧត្តមសេនីយ៍ត្រី ជេត វណ្ណី ស្នងការរងទទួលផែនកណ្តាលព្រហ្មទណ្ឌ ដឹកនាំកម្លាំងចេញទៅចាប់ឃាត់ខ្លួនខ្លួននាយទាហានរូបនោះបានទាន់ពេលវេលា ហើយបញ្ចូនមកកាន់ស្នងការដ្ឋាននគរបាលខេត្តបាត់ដំបង ដើម្បីយកមកសាកសួរនិងបំពេញសំណុំរឿងអនុវត្តតាមផ្លូវច្បាប់ ។
ជុំវិញនៃហេតុការណ៍ខាងលើបើតាមប្រភពព័ត៌មានពីនគរបាលខេត្តបាត់ដំបងប្រាប់ឱ្យដឹងថា មុនពេលកើតហេតុមន្ត្រីយោធាខាងលើដោយមានគ្នា៣នាក់បាននាំគ្នាចូលផឹកស៊ីនិងច្រៀងខារ៉ាអូរខេ ហើយហៅស្រីៗបំរើការងារនៅទីនោះមកអង្គុយលេង ផឹកស៊ីនិងច្រៀងកំសាន្តលេង។លុះការផឹកស៊ីបានជិត១ម៉ោង ស្រាប់តែមន្ត្រីយោធារូបនោះស្រែកឆោឡោថាបាត់ទូរស័ព្ទដៃ១គ្រឿងក្នុងចំណោមទូរស័ព្ទ២គ្រឿងដែលគេដាក់លើតុក្នុងបន្ទប់ខារ៉ាអូរខេ មិនដឹងទៅណាក្រោយពីមានការចេញចូលពីសំណាក់មេកានិងនារីបំរើការងារនៅក្នុងបន្ទប់ខារ៉ាអូរខេ ។
ក្រោយពីបាត់ទូរស័ព្ទនោះហើយសួរនាំគ្មានអ្នកណាដឹង ក៏ធ្វើឱ្យមន្ត្រីយោធារូបនោះខឹង ហើយក៏ទាញកាំភ្លើងខ្លីបាញ់១គ្រាប់ឡើងលើក្នុងបន្ទប់ខារ៉ាអូរខេបង្កឱ្យមានការភ្ញាក់ផ្អើល។ហេតុការណ៍នោះបើតាមការស្រាវជ្រាវរបស់សមត្ថកិច្ចរកឃើញថាមន្ត្រីយោធារូបនោះពិតជាបាត់ទូរស័ព្ទដៃម៉ាកអាយហ្វូននោះមែន។ជុំវិញបញ្ហានេះ សមត្ថកិច្ចកំពុងតែបន្តការតាមដានស្រាវជ្រាវបន្ថែមទៀត ។
សូមបញ្ជាក់ថាកាលពីមួយសប្ដាហ៍មុនជននេះបានមកផឹកស៊ី និងច្រៀងខារ៉ាអូខេនៅទីនោះម្តងរួចមកហើយ។ប៉ុន្តែដោយសារតែមានការខ្វះលុយមួយចំនួនទើបគេធ្វើជាភ្លេចកាំភ្លើងខ្លីម៉ាកឡុកចិននៅបន្ទប់ខារ៉ាអូខេហើយក៏ត្រូវបានម្ចាស់ហាងខារ៉ាអូរខេយករក្សាទុកឱ្យ។ លុះល្ងាចឡើងទើបគេមកសួររកកាំភ្លើងហើយត្រូវបានថៅកែហាងប្រគល់កាំភ្លើងឱ្យវិញនិងថែមទាំងសងប្រាក់ថ្លៃជំពាក់នោះទៀតផង។នៅថ្ងៃកើតហេតុខាងលើជននេះមកចូលច្រៀងម្តងទៀត បង្កឱ្យកើតហេតុការណ៍មានការផ្ទុះអាវុធបែបនោះតែម្តង ៕
ដោយ៖ សំ វិច្ឆិកា
