ខេត្តកណ្ដាលៈ ជនសង្ស័យលួចម៉ូតូម្នាក់ត្រូបាននគរបាលប៉ុស្តិ៍សណ្តារ សហការជាមួយកម្លាំងប៉ុស្ដិ៍ខ្ពបអាទាវ ធ្វើការចាប់ខ្លួន ក្រោយពីជនសង្ស័យខាងលើធ្វើសកម្មភាពលួចម៉ូតូបុរសម្នាក់ដែលទុកលើចិញ្ចើម ។

ករណីលួចម៉ូតូខាងលើនេះបានកើតឡើងនៅវេលាម៉ោង១៧និង១០នាទី ថ្ងៃទី១៩ ខែកញ្ញា ឆ្នាំ២០១៨ ស្ថិតក្នុងភូមិកណ្ដាល ឃុំសណ្ដារ ស្រុកលើកដែកខេត្តកណ្តាល។

មន្ត្រីនគរបាលស្រុកលើកដែកបានឲ្យដឹងថា ជនសង្ស័យចាប់ខ្លួនឈ្មោះ យ៉ុង​ ខ្មៅ ភេទប្រុស អាយុ៣០ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅភូមិជីប្រៃ ឃុំប្រាំយាំ ស្រុកស្រីសន្ធរ ខេត្តកំពង់ចាម ។ ចំណែកជនរងគ្រោះជាម្ចាស់ម៉ូតូឈ្មោះ ឆេង​ យ៉ូន អាយុ៦១ឆ្នាំ ជនជាតិខ្មែរ មុខរបរកសិករ មានទីលំនៅភូមិកណ្ដាល ឃុំសណ្ដារ ស្រុកលើកដែក ខេត្តកណ្តាល។ វត្ថុតាងដកហូតបានមានម៉ូតូម៉ាក់ហុងដា ធុនសេ១២៥ ស៊េរីឆ្នាំ២០០២ពណ៌ស្លែរ ពាក់ស្លាកលេខក.៦១៩៥ក្រ.ច លេខតួ៨០៣៦៣៣៤ លេខម៉ាស៊ីន ៨០៣៦៣៣៤ ចំនួន០១
គ្រឿង ។

ប្រភពដដែលបន្តថា នៅថ្ងៃកើតហេតុ វេលាម៉ោងខាងលើ ជនរងគ្រោះឈ្មោះ ឆេង យ៉ូន បានជិះម៉ូតូរបស់ខ្លួនទៅមើលជាងធ្វើម៉ាស៊ីននៅជិតគល់ស្ពានលេខ៣១ ដោយទុកម៉ូតូនៅក្បែរចិញ្ចើមផ្លូវ រួចក៏ដើរចូលក្នុងផ្ទះជាង ។ លុះពេលចេញមកវិញស្រាប់តែបាត់ម៉ូតូមិនឃើញ ក៏ស្រែកសួទៅម្ចាស់ផ្ទះថាឃើញម៉ូតូរបស់ខ្លួនទេ ភ្លាមនោះម្ចាស់ផ្ទះបានប្រាប់ថាមានក្មេងជិះចេញទៅមុននេះបន្តិច ។ ដោយសង្ស័យថាម៉ូតូត្រូវចោរលួច ភ្លាមនោះជនរងគ្រោះក៏បានរត់ទៅប្តឹងសមត្ថកិច្ច ឲ្យជួយអន្តរាគមន៍​ ។

ក្រោយពីនគរបាលប៉ុស្តិ៍សណ្ដារទទួលបានបណ្ដឹងជនរងគ្រោះ ភ្លាមនោះក៏ធ្វើការសហការ ជាមួយកម្លាំងប៉ុស្ដិ៍ខ្ពបអាទាវ ចុះធ្វើការស្រាវជ្រាវរហូតចាប់បានជនសង្ស័យឃាត់ រួមទាំងវត្ថុតាង បញ្ជូនមកអធិការដ្ឋាននគរបាលស្រុក ដើម្បីកសាងសំណុំរឿងចាត់ការតាមនីតិវិធីច្បាប់ ៕ស្អាងជ័យ