ខេត្តស្វាយរៀង៖ មានករណីគ្រោះថ្នាក់ចរាចរណ៏គួរអោយរន្ធត់លើកំណាត់ផ្លូវជាតិលេខ១បណ្ដាលអោយបុរសម្នាក់ស្លាប់ភ្លាមៗនឹងកន្លែង រីឯម្នាក់ទៀតរងរបួសធ្ងន់ខណៈជិះម៉ូតូមិនប្រកាន់ស្ដាំត្រូវរថយន្តបើកបញ្ច្រាសទិសគ្នាបុកយ៉ាងពេញទំហឹង ។

ហេតុការណ៍នេះកើតឡើងកាលពីវេលាម៉ោង១០ និង៥០នាទីយប់ថ្ងៃទី២៥ ខែវិច្ឆិកា ឆ្នាំ២០១៥ ស្ថិតនៅភូមិលៀប ឃុំកណ្តៀងរាយ ស្រុកស្វាយទាប ខេត្តស្វាយរៀង ។

យោងតាមសមត្ថកិច្ចនគរបាលស្រុកស្វាយទាបបានអោយដឹងថា មុនពេលកើតហេតុមាន ម៉ូតូមួយគ្រឿងម៉ាកគុបមូល សេ៥០ពណ៏ស្លែ អត់ស្លាកលេខ បើកបរដោយឈ្មោះ អាន រដ្ឋា ភេទប្រុស អាយុ៣១ឆ្នាំ មុខរបរកម្មករសំណង់ រស់នៅភូមិខាងកើត វត្តឃុំត្នោត ស្រុកកំពង់រោទ៍ ខេត្តស្វាយរៀង និងអ្នករួមដំណើរឈ្មោះនី មុំ ភេទប្រុស អាយុ២៤ឆ្នាំ មុខរបរកម្មករសំណង់មានទីលំនៅភូមិអង្គស្វាយ ឃុំប្រសូត្រ ស្រុកស្វាយទាប ខេត្តស្វាយរៀងធ្វើដំណើរពីលិចទៅកើតស្របពេលនោះស្រាប់តែមានរថយន្តមួយគ្រឿង ម៉ាកតាកូម៉ា ពាក់ស្លាកលេខភ្នំពេញ2Z-8727 ពណ៌ទឹកប្រាក់ បើកបរដោយឈ្មោះ ឆក់ បញ្ញា ភេទប្រុស អាយុ២៤ឆ្នាំ មុខរបរជានិស្សិត និងអ្នករួមដំណើរម្នាក់ឈ្មោះ ប៉ុន សំណាង អាយុ២៤ឆ្នាំ មុខរបរនិស្សិត ដោយអ្នកទាំង២មានទីលំនៅមានទីលំនៅក្នុងភូមិវាលយន្ត សង្កាត់ស្វាយរៀង ក្រុងស្វាយរៀង ទិសដៅបញ្ច្រាសគ្នាពីកើតទៅលិចក៏បុកលាន់សូដូចរន្ទះបាញ់បណ្ដាលអោយបុរសឈ្មោះ អាន រដ្ឋា ជាអ្នកបើកបរម៉ូតូស្លាប់ភ្លាមៗ រីឯអ្នករួមដំណើររងរបួសធ្ងន់ ។

ក្រោយកើតហេតុប្រជាពលរដ្ឋក៏បានរាយការណ៏មកសមត្ថកិច្ចនគរបាលមូលដ្ឋានមកអន្តរាគមន៍និងធ្វើការឃាត់ខ្លួនបានអ្នកបើកបររថយន្តមកអធិការដ្ឋាននគរបាលស្រុកស្វាយទាបដើម្បីចាត់ការតាមច្បាប់ ។ រីឯសាកសពត្រូវបានសមត្ថកិច្ចនគរបាលប្រគល់ទៅអោយក្រុមគ្រួសារយកទៅធ្វើបុណ្យតាមប្រពៃណី ។

សមត្ថកិច្ចនគរបាលបញ្ជាក់ថាមូលហេតុ គឺអ្នកបើកបរម៉ូតូបើកមិនប្រកាន់ស្តាំទើបកើតគ្រោះថ្នាក់ចរាចរណ៏នេះ ៕

ដោយ៖ យឹម សុថាន