ខេត្តស្ទឹងត្រែង៖ ពលរដ្ឋជិត៤០០គ្រួសារ រស់នៅភូមិ ញើនឃុំស្តៅស្រុកសេសាន្តសំណូមពរឲ្យអាជ្ញាធរពាក់ព័ន្ធថ្នាក់ខេត្តជួយឈូសឆាយ សំរួលផ្លូវចូលទៅភូមិនេះ ឲ្យបានស្រួលធ្វើចរាចរណ៍ និងដឹកនាំកសិផលយកមកលក់នៅទីផ្សារ ដើម្បីយកប្រាក់កម្រៃដោះស្រាយនឹងជីវភាពគ្រួសាររស់នៅប្រចាំថ្ងៃ តែក្រោយពីអាជ្ញាធរខេត្ត ដាក់គ្រឿងចក្រឈូសឆាយផ្លូវ ត្រូវបានអាជ្ញាធរថ្នាក់ស្រុករារាំង ថាខេត្តធ្វើការងារគ្មានជូនដំណឹងជាមុននិងគ្មានច្បាប់ទំលាប់ ។
លោក សុខ ហោ អាយុ៣៥ឆ្នាំ រស់នៅភូមិ-ឃុំខាងលើនេះបានអះអាងថាៈ ប្រជាពលរដ្ឋខិតខំប្រឹងប្រែង ដាំដំណាំបានបន្តិចបន្តួច គ្រាន់ចិញ្ចឹមជីវិត តែ ជួបអកុសលជាង១០ឆ្នាំមកហើយ មិនដែលមានផ្លូវចេញចូលបានស្រួលនោះ ទេពិបាកធ្វើចរាចរណ៍ ដោយខែប្រាំរណ្តៅជ្រៅៗខែ វស្សាទឹកដក់ភក់ជិះកង់ម៉ូតូមិនកើតធ្វើឲ្យពួកគាត់ព្រួយបារម្ភណ៏សព្វបែបយ៉ាងទាំងការដឹកកសិផលទៅលក់ រឺមានជំងឺ ឈឺស្កាត់ក៏ពិបាកទៅកាន់មន្ទីពេទ្យ ដែរជួនកាលស្ត្រីមានផ្ទៃពោះសំរាលកូនតាមផ្លូវក៏មានដែរ ។
លោកសំណូមពរឲ្យអាជ្ញាធរខេត្តស្រុកជួយឈូសឆាយសំរួលផ្លូវនេះឡើងវិញស្រួលធ្វើចរាចរណ៍ទៅវិញទៅមក ដើម្បីកាត់បន្ថយធ្វើចរាចរណ៍តាមទឹក ដោយប្រើទូកតូចៗចំណាយពេលយូរអស់ថវិការច្រើន និងជួបគ្រោះថ្នាក់ថែមទៀតផង ។
លោក នួយ ប៊ុនធួយ មេឃុំស្តៅ បានអះអាងថាៈ ការដោះស្រាយបញ្ហាផ្លូវនេះអាជ្ញាធរខេត្តបាន ដាក់គ្រឿងច្រកមកធ្វើការឈូសឆាយម្តងរួចមកហើយនៅសប្តាហ៍មុននេះ តែលោកពន្លឺ មង្គលអភិបាលស្រុកសេសាន្ត បានធ្វើការរារាំងក្រុមហ៊ុនឈូសឆាយផ្លូវនេះ ដោយចោទប្រកាន់ថាខេត្តធ្វើការងារ គ្មានច្បាប់ទំលាប់ មិនជូនដំណឹងឲ្យស្រុកដឹង ហើយធ្វើការឈូសឆាយផ្លូវនោះប្រយោជន៏ឲ្យឈ្មួញដឹកឈើទៅវិញ ។
លោកមេឃុំបញ្ជាក់ថាៈ រឿងការឃាត់ឃាំងគ្រឿងច្រកនេះលោកមិនបានដឹងហេតុផលណាមួយបានច្បាស់លាស់នោះទេបំណងលោកចង់បានផ្លូវល្អស្រួលប្រជាពលរដ្ឋធ្វើដំណើរតែប៉ុណ្ណោះ ។
បញ្ហានេះបើតាមប្រសាសន៏លោកកុលសំអុលអភិបាលខេត្តបានបញ្ជាក់ថារឿងនេះលោកអភិបាលស្រុកសេសាន្តត្រូវគិតពីសុខទុក្ខរបស់ប្រជាពលរដ្ឋពីព្រោះខេត្តបានសន្យាជាមួយប្រជាពលរដ្ឋកាលពីខែឧសភាធ្វើផ្លូវនេះជូនពួកគាត់ទើបខេត្តអនុញ្ញាតឲ្យគ្រឿងចក្រចូលទៅឈូសឆាយតែលោកស្រុកធ្វើការរារាំងដំណើរការមិនពេញចិត្តជាមួយខេត្ត ទំនងដូចជាខ្វះតែនិងស្កហើយទើបទៅបង្អាក់ការងារធ្វើឲ្យខូចប្រយោជន៏ប្រជាពលរដ្ឋខ្លួនទៅវិញ ។
សូមបញ្ជាក់ថាផ្លូវនេះមានប្រវែងជាង២០គឺឡូម៉ែត្រចូលពីផ្លូវជាតិលេខ៧ទៅកាន់ភូមិញើននៅក្នុងឃុំស្តៅ ស្រុកសេសាន្តខេត្តស្ទឹងត្រែងត្រូវប្រជាពលរដ្ឋសំណូមពរជាយូរឆ្នាំមកហើយ ការឈូសឆាយបានផ្អាកដំណើរការទៅវិញ ដោយអាជ្ញាធរស្រុក ចោទប្រកាន់ថាធ្វើផ្លូវសម្រាប់ឲ្យឈ្មួញដឹកឈើទៅវិញ ៕
ដោយ៖ សាវុទ្ធ
