ភ្នំពេញ៖ មន្ត្រីនគរបាលចរាចរផ្លូវគោករាជធានីភ្នំពេញ២នាក់បន្ទាប់ពីចេញពីផឹកស៊ីស្រវឹងជោកជាំបានជិះរថយន្តឡើងខឿនសួនច្បារបុករលំដើមជ្រៃ១ដើម ហើយជ្រុលទៅបុកបង្គោលភ្លើងបំភ្លឺផ្លូវ អស់មួយដើមទៀតទើបទៅមុខលែងរួច ។
ឧប្បត្តហេតុនេះកើតឡើងកាលពីវេលាម៉ោង២និង២០នាទីរសៀលថ្ងៃទី២៧ខែវិច្ឆិកា២០១៥នៅលើកំណាត់ផ្លូវជាតិលេខ៦ ក្នុងភូមិកៀនឃ្លាំង សង្កាត់- ខណ្ឌ ជ្រោយចង្វា ។
សាក្សីបានឲ្យដឹងថា មុនពេលកើតហេតុមានរថយន្តបង្កមួយគ្រឿងម៉ាកតូយ៉ូតាហ៊ីលុច្ស វីហ្គោ ពណ៌ស្ករ ពាក់ស្លាកលេខ បាត់ដំបង 2A 5979 ជិះគ្នា២នាក់ដែលសុទ្ធជាមន្ត្រីនគរបាលចរាចរផ្លូវគោករាជធានីភ្នំពេញនិងមានស្ថានភាពស្រវឹងជោកជាំ បានធ្វើដំណើរតាមបណ្តោយផ្លូវជាតិលេខ៦ ទិសដៅពីជើងទៅត្បូង។លុះជិះ មកដល់ចំណុចកន្លែងកើតហេតុមិនដឹងរឿងអីស្រាប់តែរថយន្តនេះបានរេចង្កូតទៅបុកខឿនសួនច្បារពុះ ចែកផ្លូវនិងជ្រុលឡើងទៅលើសួនច្បារបុកដើមជ្រៃក្រឹមរលំអស់មួយដើមទៀត។បន្ទាប់មករថយន្តមិនទាន់អស់ ល្បឿនក៏បានជ្រុលទៅបុកផ្ទប់បង្គោលភ្លើងបំភ្លឺផ្លូវទើបទៅមុខលែងរួច ។
សាក្សីឲ្យដឹងទៀតថា បន្ទាប់ពីកើតហេតុរួចមន្រី្តនគរបាលចរាចរទាំងពីរនាក់បានចុះពីលើរថយន្តទាំងរាងកាយស្រវឹងទ្រេតទ្រោតរួចទូរស័ព្ទហៅរថយន្តស្ទួចមក ស្ទួចយករថយន្តរបស់ពួកគាត់ទៅរក្សាទុកនៅការិយាល័យនគរបាលចរាចរណ៍ផ្លូវគោករាជធានីភ្នំពេញ ដោយមិនរំខានសមត្ថកិច្ចមូលដ្ឋានឡើយ ៕
ដោយ៖ ប្រាថ្នា
