ខេត្តកណ្តាល៖ ផ្ទះប្រជាពលរដ្ឋមួយខ្នងនៅស្រុកកណ្តាលស្ទឹងត្រូវបានអគ្គីភ័យឆាបឆេះ បណ្តាលឲ្យខូចខាតសម្ភារៈប្រើប្រាស់មួយចំនួន , ប្រាក់ដុល្លារ១១.០០០ដុល្លារ និងប្រាក់រៀលចំនួន១០លានរៀលផងដែរ ។
ករណីគ្រោះអគ្គីភ័យនេះកើតឡើងកាលពីវេលាម៉ោង១០ និង៥០នាទី ថ្ងៃទី២៨ ខែវិច្ឆិកា ឆ្នាំ២០១៥ ស្ថិតក្នុងភូមិចំបក់ត្រប់ ឃុំព្រែករកា ស្រុកកណ្តាលស្ទឹង ។
លំនៅដ្ឋានដែលត្រូវបានអគ្គីភ័យឆាបឆេះខាងលើនេះមានទំហំ៦ម៉ែត្រគុណ៧ម៉ែត្រ ធ្វើពីឈើប្រក់សង្ក័សី មានម្ចាស់ឈ្មោះ សុខ សិរី ភេទប្រុស អាយុ៤៧ឆ្នាំ មុខរបរ ជាកសិករ មានប្រពន្ធឈ្មោះ ឆេង ស្រីលាង អាយុ៣៧ឆ្នាំ មានកូន១នាក់ស្រី បច្ចុប្បន្នរស់នៅក្នុងភូមិចំបក់ត្រប់ ឃុំព្រែករកា ស្រុកកណ្តាលស្ទឹង ។ ម្ចាស់ផ្ទះបានអះអាងថា ករណីគ្រោះអគ្គីភ័យខាងលើនេះបានបណ្តាលឲ្យខូចខាតលំនៅដ្ឋានមួយខ្នង ,សម្ភារៈប្រើប្រាស់ក្នុងផ្ទះមួយចំនួន ,ប្រាក់ដុល្លារ១១.០០០ដុល្លារ និងប្រាក់រៀលចំនួន១០លានរៀលផងដែរ ។
សមត្ថកិច្ចនគរបាលស្រុកកណ្តាលស្ទឹងបានបញ្ជាក់ថា ករណិគ្រោះអគ្គីភ័យខាងលើនេះបង្កដោយទុស្សេខ្សែភ្លើងដែលប្រើប្រាស់ក្នុងផ្ទះ ៕
ដោយ៖ ស្អាងជ័យ
