ខេត្តកណ្តាល៖ ស្ត្រីវ័យ ជាង៤០ម្នាក់បានស្លាប់យ៉ាងអាណោចអាធ័មក្នុងករណីទ្វារដែករបងផ្ទះរបស់ខ្លួនរលំសង្កត់ពីលើ នៅគ្រាដែលស្ត្រីរងគ្រោះដើរចេញពីក្នុងផ្ទះមកទាញទ្វារបងបិទ ស្រាប់តែដាច់ត្រចៀក ខាងលើរលំសង្កត់តែម្តង ។
ករណីគ្រោះថ្នាក់នេះបានកើតឡើងនៅវេលាម៉ោង៧និង៣០នាទីយប់ ថ្ងៃទី២ ខែធ្នូ ឆ្នាំ២០១៥ នៅក្នុងភូមិស្តៅ កន្លែង២ ឃុំដីឥដ្ឋ ស្រុកកៀន ស្វាយ ខេត្តកណ្តាល លុះនៅ វេលាម៉ោង៩និង៣០នាទីព្រឹក ថ្ងៃទី៣ ខែធ្នូ ឆ្នាំ២០១៥ ទើប ភ្ញាក់ផ្អើលដល់សមត្ថកិច្ចចុះទៅពិនិត្យនៅផ្ទះកើតហេតុ ។
ស្ត្រីរងគ្រោះពៅ ដាវី អាយុ៤៩ឆ្នាំ ជាស្ត្រីមេម៉ាយ មានទីលំនៅ ក្នុងភូមិ-ឃុំ កើតហេតុ ។
នគរបាលប៉ុស្តិ៍ដីឥដ្ឋ បានអោយដឹងថា តាមសម្តីក្រុមគ្រួសារ ស្ត្រីរងគ្រោះបានចេញពីក្នុងផ្ទះដើរមកទាញទ្វាររបងដែកដើម្បីបិទព្រោះយប់ហើយ ។ ពេលទាញជិតដល់បង្គោលម្ខាងទៀតស្រាប់តែដាច់ក្រចាប់ទ្វានៅខាងលើរលំសង្កត់ស្ត្រីរងគ្រោះតែម្តង បណ្តាលអោយស្ត្រីរងគ្រោះដួលបោកក្បាលទៅក្រោយផ្ទប់ជាថ្ម ។ ភ្លាមៗនោះក្រុមគ្រួសារបានស្ទុះមកលើកទ្វាដែកចេញ ដើម្បីសង្គ្រោះស្ត្រីរងគ្រោះនិងទូរស័ព្ទហៅរថយន្តសង្គ្រោះរបស់មន្ទីរពេទ្យបង្អែកស្រុកទៅដឹកមកសង្គ្រោះ ពេលទៅដល់គ្រួពេទ្យប្រាប់ថា ស្ត្រីរងគ្រោះស្លាប់បាត់ទៅ ។
លោកវង សែ អធិការរងទទួលការងារព្រហ្មទណ្ឌស្រុកកៀនស្វាយបានអោយដឹងថា ករណីនេះកើត ហេតុតាំងពីយប់ថ្ងៃទី២ ខែធ្នូ លុះព្រឹកឡើងថ្ងៃទី៣ ខែធ្នូ ឆ្នាំ២០១៥ ទើបអ្នកភូមិរាយ ការណ៍ប្រាប់សមត្ថកិច្ច ចំណែកម្ចាស់ផ្ទះមានបំណងបិទបាំងរឿងនេះទំនងជាយល់ថា គ្រោះថ្នាក់ដោយខ្លួនឯង ។
បន្ទាប់ពីទទួលបានពត៍មាននគរបាលបច្ចេកទេសស្រុកនិងគ្រូពេទ្យចុះទៅធ្វើកោសល្យវិច័យ ពិនិត្យឃើញថាជនរង គ្រោះត្រូវទ្វាររបងដែករលំសង្កត់ពីលើបណ្តាលអោយបោកក្បាលខាងក្រោយផ្ទប់និងថ្មចាក់សាបនៅមុខផ្ទះ ស្លាប់តែម្តង នេះជាឧបត្ទហេតុដោយខ្លួនឯង ៕
ដោយ៖ សណ្តោស
