ភ្នំពេញ: ក្មេងស្ទាវពីរក្រុម ប្រដាប់ដោយដំបង ដុំថ្ម និងខ្សែក្រវាត់ ប្រយុទ្ធគ្នាតាមដងផ្លូវ បណ្តាលរងរបួសបែកក្បាល៣នាក់ ហើយត្រូវសមត្ថកិច្ច អន្តរាគមន៍ឃាត់ខ្លួនទាំងអស់៧នាក់ និងដកហូតម៉ូតូប្រាំគ្រឿង។ ហេតុការណ៍នេះបានកើតឡើងកាលពីម៉ោងជាង១២រំលងអធ្រាត្រឈានចូលថ្ងៃទី១២ ខែធ្នូ ឆ្នាំ២០១៨ នៅតាមបណ្តោយផ្លូវ២០០៤ ខាងមុខស្ថានីយប្រេងឥន្ធន: តូតាល់ ស្ថិតក្នុងសង្កាត់អូបែកក្អម ខណ្ឌសែនសុខ។
ប្រភពពត៌មានពៅសមត្ថកិច្ចមូលដ្ឋាន បានឲ្យដឹងថា នៅមុនពេលកើតហេតុ គឺមានប្រជាពលរដ្ឋបានរាយការណ៍មកប្រាប់ថា មានក្មេងទំនើងពីរក្រុម ដោយមួយក្រុមមានគ្នាប្រមាណជិត១០នាក់ ដដោយនៅនឹងដៃប្រដាប់ដោយដំបង ដុំថ្មនិងខ្សែក្រវាត់ បានកំពុងតែដេញវាយតប់គ្នា ។ ភ្លាមៗនោះ កម្លាំងសមត្ថកិច្ចបានចុះអន្តរាគមន៍ ឃាត់ខ្លួនបានក្មេងទំនើងបាន៧នាក់ ដែល៣នាក់បានរងរបួសបែកក្បាល និងដកហូតបានម៉ូតូប្រភេទម៉ូតូធំ ចំនួន៥គ្រឿង ។
បន្ទាប់ពីកើតហេតុក្រុមក្មេងទំនើងទាំង៧នាក់ រួមទាំងវត្ថុតាង ត្រូវបានកម្លាំងសមត្ថកិច្ចនាំខ្លួនយកទៅសាកសួរឃុំខ្លួនបណ្ដោះអាសន្ននៅអធិការដ្ឋាននគរបាលខណ្ឌសែនសុខ ដើម្បីចាត់ការជាបន្តតាមនីតិវិធី៕ជ្រោយពេជ្រ
