ខេត្តកំពង់ស្ពឺ៖ បុរសម្នាក់ជាមុខសញ្ញាលួចម៉ូតូយ៉ាងសកម្មប្រចាំស្រុកឱរ៉ាល់ ត្រូវបាននគរបាលចាប់ខ្លួន ខណៈដែលធ្វើសកម្មភាពលួចម៉ូតូបានហើយរត់គេចខ្លួនពេលត្រឡប់ចូលផ្ទះវិញ ។
ហេតុការណ៍ឃាត់មុខសញ្ញាលួចម៉ូតូខាងលើបានកាលពីវេលាម៉ោង២និង៣០នាទីរសៀល ថ្ងៃទី៥ ខែធ្នូ ឆ្នាំ២០១៥ ស្ថិតនៅក្នុងឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ ។
លោក ប៊ុត ប៊ុនធឿន អធិការនគរបាលបាននិយាយឱ្យដឹងថា ជនសង្ស័យដែលឃាត់ខ្លួនបានមានឈ្មោះ ហ៊ន រឹមហៅខុម ភេទប្រុសអាយុ២៩ឆ្នាំ មុខរបរមិនពិតប្រាកដរស់នៅក្នុងភូមិ ឃុំខាងលើ ។
លោកអធិការបន្តថាបានជាឃាត់ខ្លួនជនសង្ស័យរូបនេះគឺតាមដីកាបង្គាប់របស់តុលាការណ៍ខេត្តកំពង់ស្ពឺ លេខ១៦៧ ចុះថ្ងៃទី៦ ខែសីហា ឆ្នាំ២០១៤ ពាក់ពន្ធ័នឹងករណីលួចម៉ូតូបន្ទាប់ពីទទួលបានដីកាបង្គាប់រួចមក លោកក៏បានដាក់កំលាំងជំនាញតាមដានរយៈពេលជិត១ខែ មុខសញ្ញាក៏ឃាត់បានតែម្តង ។
ក្រោយពីឃាត់ខ្លួនបាន ជនសង្ស័យត្រូវបានកសាងសំណុំរឿងបញ្ជូនបន្តដើម្បីចាត់ការតាមផ្លូវច្បាប់ ៕
ដោយ៖ សេនា សក្តិ
