ភ្នំពេញ ៖ ជាការផ្តល់កិត្តិយសនិងទទួលស្គាល់នូវស្នាដៃរបស់ស្ត្រីកម្ពុជាដែលបានចូលរួមយ៉ាងសកម្មនាពេលកន្លងមកក្នុងការអភិវឌ្ឍវិស័យបច្ចេកវិទ្យាគមនាគមន៍និងព័ត៌មានក្រសួងប្រៃសណីយ៍និងទូរគមនាគមន៍បានរៀបចំកម្មវិធីស្ត្រីកម្ពុជាក្នុងវិស័យបច្ចេកវិទ្យាជាលើកទី២សម្រាប់ឆ្នាំ២០១៩បន្តទៀត។កម្មវិធីនេះនឹងបើកឱកាសដល់សាធារណជនទូទៅស្នើបេក្ខភាពស្រ្តីគ្រប់រូបដែលខ្លួនទទួលស្គាល់ថាជាស្រ្តីគំរូជាស្ត្រីឆ្នើមនិងសកម្មបានចូលរួមច្រើនក្នុងការអភិវឌ្ឍវិស័យប.គ.ពក្នុងប្រទេសដើម្បីទទួលពានរង្វាន់កិត្តិយសជា ” ស្រ្តីឆ្នើមក្នុងវិស័យបច្ចេកវិទ្យាប្រចាំឆ្នាំ២០១៩” ពីក្រសួងប.ទ។

បេក្ខនារីក៏អាចស្នើបេក្ខភាពផ្ទាល់ខ្លួនដើម្បីចូលរួមលើកកម្ពស់វិស័យនេះនិងជំរុញការចូលរួមរបស់ស្រ្តីផ្សេងទៀតផងដែរ។ក្រសួងប.ទនឹងជ្រើសរើសសម្រិតសម្រាំងបេក្ខនារីទាំងនោះហើយផ្តល់ពានរង្វាន់កិត្តិយសដល់ស្រ្តីឆ្នើមក្នុងកម្មវិធីតាំងបង្ហាញបច្ចេកវិទ្យាដ៏ធំដំបូងបង្អស់មួយនៅកម្ពុជា “Digital Cambodia”  ដែលនឹងប្រព្រឹត្តិទៅនាថ្ងៃទី១៥ខែមិនាឆ្នាំ២០១៩។

កម្មវិធីឆ្នាំនេះផ្តោតលើប្រធានបទ“ស្រ្តីកម្ពុជាសម្រាប់ការផ្លាស់ប្តូរទៅជាឌីជីថល”នឹងប្រកាសរកបេក្ខភាពជាស្ត្រីចាប់ពីថ្ងៃទី២៥ខែមករារហូតដល់ថ្ងៃទី២៥ខែកុម្ភ: ឆ្នាំ២០១៩។បន្ទាប់មកក្រសួងនឹងធ្វើការជ្រើសរើសហើយវាយតម្លៃរកស្រ្តីឆ្នើមលេចធ្លោដែលមានគុណសម្បត្តិគ្រប់គ្រាន់។ជ័យលាភី០៥ (ប្រាំ) រូបនឹងត្រូវផ្តល់កិត្តិយសទទួលពានរង្វាន់នៅថ្ងៃទី១៥ខែមិនាឆ្នាំ២០១៩ខាងមុខ។

ពាក់ព័ន្ធនឹងការផ្តួចផ្តើមឱ្យមានកម្មវិធីនេះឡើងលោក ត្រាំអុីវតឹករដ្ឋមន្ត្រីក្រសួងប្រៃសណីយ៍និងទូរគមនាគមន៍ប្រធានក្រុមប្រឹក្សាមូលនិធិស.អ. បានមានប្រសាសន៍ថា  “ការផ្លាស់ប្តូរទៅជាឌីជីថល (Digital Tran sformation) គឺជារបត់នៃការប្រែប្រួលក្នុងយុគសម័យឌីជីថលនេះដែលបច្ចេកវិទ្យាត្រូវបានប្រើប្រាស់ជាមធ្យោបាយឬឧបករណ៍ដើម្បីផ្លាស់ប្តូររបៀបរបរការងារការធ្វើអាជីវកម្មនិងការគ្រប់គ្រងក្នុងគោលបំណងបង្កើនប្រសិទ្ធភាពកំណើនផលចំណេញនិងពង្រីកឱកាសផ្សេងៗទៀត។ដើម្បីអាចអភិវឌ្ឍប្រទេសឆ្ពោះទៅរកសេដ្ឋកិច្ចឌីជីថលនិងបដិវត្តឧស្សាហកម្មជំនាន់ទី៤យើងគ្រប់គ្នាត្រូវចូលរួមជំរុញនិងត្រៀមខ្លួនសម្រាប់ការផ្លាស់ប្តូរទៅជាឌីជីថលស្របតាមយុទ្ធសាស្រ្តចតុកោណតំណាក់កាលទី៤របស់រាជរដ្ឋាភិបាលអាណត្តិទី៦។ ”

ចំពោះការរៀបចំកម្មវិធីនេះលោកកានច័ន្ទមេត្តារដ្ឋលេខាធិការនៃក្រសួងប្រៃសណីយ៍និងទូរគមនាគមន៍និងជាអនុប្រធានទី១នៃក្រុមប្រឹក្សាមូលនិធិស.អ. បានមានប្រសាសន៍ថា“ នាពេលបច្ចុប្បន្នស្ត្រីដើរតួនាទីយ៉ាងសំខាន់ក្នុងការចូលរួមអភិវឌ្ឍសង្គមនិងសេដ្ឋកិច្ចរបស់កម្ពុជា។ស្ត្រីភាគច្រើនជាអាជីវករអភិបាលក្រុមហ៊ុនខ្នាតតូចនិងមធ្យម។ក្នុងការជំរុញTech Start Up និងនវានុវត្តន៍នាពេលកន្លងមកយើងសង្កេតឃើញមានស្រ្តីចូលរួមច្រើនជាលំដាប់ពីមួយឆ្នាំទៅឆ្នាំ។ម្យ៉ាងវិញទៀតការរៀបចំកម្មវិធីនេះក៏ជាការកៀរគរការចូលរួមពីគ្រប់តួអង្គដើម្បីសម្រេចនូវគោលដៅផ្លាស់ប្តូរទៅជាឌីជីថលនិងគោលដៅយុទ្ធសាស្រ្តកំណត់ក្នុងគោលនយោបាយអភិវឌ្ឍន៍វិស័យទូរគមនាគមន៍និងបច្ចេកវិទ្យាគមនាគមន៍ព័ត៌មានឆ្នាំ២០២០។

យើងសូមលើកទឹកចិត្តឱ្យស្រ្តីចូលរួមកាន់តែច្រើនឡើង។ “កម្មវិធីឆ្នាំ២០១៩នេះមានពានរង្វាន់រហូតដល់០៥ (ប្រាំ)  ប្រភេទគឺសហគ្រិនឆ្នើមស្រ្តីក្នុងបច្ចេកវិទ្យា (Cambodian Woman ICT Entrepreneur Award)  វិស្វករស្រ្តីជោគជ័យក្នុងជំនាញប.គ.ព (Cambodian Woman ICT Engineer Award)ស្រ្តីដែលបានចូលរួមជំរុញនូវការប្រើប្រាស់បច្ចេកវិទ្យាសម្រាប់ការអភិវឌ្ឍសង្គមឬសហគមន៍ (Cambodian Woman ICT For Community Award), ស្ត្រីដែលបង្កើតមាតិកាព័ត៌មានច្នៃប្រឌិត (Creative Digital Content Award) និងចុងក្រោយគឺពន្លកថ្មី ( Girl Innovator ) ។

សូមបញ្ជាក់ថាស្រ្តីឆ្នើមនៅកម្ពុជាទាំង០៥(ប្រាំ)ប្រភេទដែលត្រូវបានជ្រើសរើសត្រូវតែជាក្រុមស្ត្រីកម្ពុជាដែលមានសក្តានុពលក្នុងផ្នែកបច្ចេកវិទ្យាមានភាពជាអ្នកដឹកនាំខ្ពស់ព្រមទាំងបានប្រើប្រាស់នូវជំនាញរបស់ខ្លួនដើម្បីបម្រើការក្នុងស្ថាប័នរបស់ខ្លួនក៏ដូចជានៅក្នុងសហគមន៍របស់ខ្លួនរហូតមកដល់ពេលបច្ចុប្បន្ននេះ។

ក្រៅពីនេះពួកគាត់ក៏ត្រូវតែជាស្រ្តីកម្ពុជាដែលបានលះបង់នូវពេលវេលានិងកម្លាំងកាយចិត្តរបស់ខ្លួនដោយស្ម័គ្រចិត្តដើម្បីចូលរួមយ៉ាងសកម្មនៅក្នុងការចូលរួមស្វែងរកដំណោះស្រាយផ្នែកណាមួយក្នុងវិស័យបច្ចេកវិទ្យាសម្រាប់យកមកបម្រើផលប្រយោជន៍ក្នុងសង្គមកម្ពុជាជារួម។សាធារណៈជនអាចចូលរួមក្នុងកម្មវិធីនេះបានដោយស្នើបេក្ខភាពស្រ្តីដែលលោកអ្នកគិតថាជាស្រ្តីឆ្នើមឬស្រ្តីគំរូក្នុងវិស័យនេះ។ការស្នើបេក្ខភាពអាចធ្វើឡើងតាមប្រព័ន្ធអនឡាញដោយគ្រាន់តែចូលទៅក្នុងតំណភ្ជាប់http://cbrd.gov.kh/nominations ឬអាចទំនាក់ទំនងតាមសារអេឡិកត្រូនិក[email protected] ឬទូរស័ព្ទលេខៈ012 717 318ឬ086 47 87 72៕ ដោយ វឌ្ឍនា