ភ្នំពេញ៖ ជនដ៏ជម្លើយនិយាយគ្មានគ្រប ជាបុរសតែងខ្លួនជាស្រី ជាប់គុកតាមបំណងរបស់គេ ខណៈមុននេះបន្តិចត្រូវបានចៅក្រមស៉ើបសួរនៃសាលាដំបូងរាជធានីភ្នំពេញ បានសម្រេចឃុំខ្លួនបណ្តោះអាសន្ន លើជនត្រូវចោទ ឈ្មោះ យិន ហេង ដែលមានរហស្សនាមថា «ចំប៉ីខ្មៅ» នៅពន្ធនាគារព្រៃ «ស» ជាប់ពាក់ព័ន្ធករណីបង្ហោះវីដេអូលើបណ្តាញសង្គម Facebook ដោយប្រើសំដីអសីលធម៍ មានចេតនាទុច្ចរិតហ៊ាន ប្រមាថជាតិសាសន៍ខ្មែរយ៉ាងធ្ងន់ធ្ងរ។ នេះបើយោងតាមមន្ត្រីតុលាការ បានបញ្ជាក់មកអង្គភាព សារព័ត៌មាន នៅព្រលប់ថ្ងៃទី៦ ខែមករា ឆ្នាំ២០១៩ មុននេះបន្តិច។
មន្ត្រីតុលាការបានបញ្ជាក់ថា ៖នៅរសៀលថ្ងៃទី០៦ ខែកុម្ភៈ ឆ្នាំ២០១៩នេះ ជនសង្ស័យ យិន ហេង ត្រូវបានលោក ពេជ វេជ្ជាធរ ដែលជាចៅក្រមស៉ើបសួរនៃសាលាដំបូងរាជធានីភ្នំពេញ សម្រេចឃុំខ្លួនបណ្តោះអាសន្ន នៅពន្ធនាគារព្រៃ «ស» ដោយរង់ចាំចាត់ការជំនុំជម្រះតាមនីតិវិធីបន្តទៀត តាមការចោទប្រកាន់របស់តំណាងអយ្យការ។
ប្រភពពីមន្ត្រីតុលាការបានបន្តថា ៖ព្រះរាជអាជ្ញា លី សុផាណា ក៏បានចោទប្រកាន់ជនសង្ស័យ យិន ហេង ពីបទ «ញុះញង់ឲ្យមានការរើសអើង» តាមមាត្រា៤៩៤ និងមាត្រា៤៩៦ នៃក្រមព្រហ្មទណ្ឌ ហើយបទល្មើសនេះ អាចមានទោសជាប់ពន្ធនាគារ ពី១ឆ្នាំ ទៅ៣ឆ្នាំ។
សូមបញ្ជាក់ផងដែរថា៖ ក្រោយពីផ្ទុះកំហឹង ពីប្រជាជន ពិសេសអ្នកនិយមហ្វេសប៊ុក និងថ្នាក់លើ សមត្ថកិច្ចនគបាលខណ្ឌដូនពេញ បានឃាត់ខ្លួនជនសង្ស័យ ធ្វើកំណត់ហេតុស្តាប់ចម្លើយ ហើយនៅរសៀលថ្ងៃទី០៦ ខែកុម្ភៈនេះ ក៏បានបញ្ជូនខ្លួនឈ្មោះ យិន ហេង ទៅកាន់សាលាដំបូងរាជធានីភ្នំពេញ ដើម្បីប្រគល់ជូនតំណាងអយ្យការបើកការស៉ើបសួរ និងចោទប្រកាន់តាមផ្លូវច្បាប់ ក្នុងសំណុំរឿងបង្ហោះជាសាធារណៈ តាមបណ្តាញសង្គម Facebook ដោយបានជេរប្រមាថមកលើ ប្រជាពលរដ្ឋខ្មែរទូទាំងប្រទេស ក្នុងន័យមើលងាយមើលថោក សម្រាប់ប្រជាជាតិកម្ពុជាទាំងមូល។
យុវជនដែលតែងខ្លួនជាស្រី និងល្បីក្នុងបណ្ដាញសង្គម Facebook ឈ្មោះ «ចំប៉ីខ្មៅ» ត្រូវបានកម្លាំងនគរបាលឃាត់ខ្លួន នៅខណ្ឌដូនពេញ នាល្ងាចថ្ងៃទី០៥ ខែកុម្ភៈ ឆ្នាំ២០១៩នេះ ដោយកម្លាំងនាយកដ្ឋានប្រឆាំងបទល្មើសបច្ចេកវិទ្យា សហការជាមួយកម្លាំងនគរបាលខណ្ឌដូនពេញ និងស្នងការដ្ឋាននគរបាលរាជធានីភ្នំពេញ។
លោកឧត្តមសេនីយ៍ឯក ជា ពៅ ប្រធាននាយកដ្ឋាននគរបាលប្រឆាំងបទល្មើសបច្ចេកវិទ្យា នៃក្រសួងមហាផ្ទៃ បានប្រាប់ សារព័ត៍មានឲ្យដឹងថា ការចាប់ខ្លួនយុវជនរូបនេះ ក្រោមការបញ្ជាផ្ទាល់ពីសម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ និងនាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ និងលោកឧត្តមសេនីយ៍ឯក ស ថេត ស្នងការនគរបាលរាជធានីភ្នំពេញ។
លោកឧត្តមសេនីយ៍ បានបញ្ជាក់ថា ក្រោយទទួលបានបទបញ្ជា កម្លាំងនគរបាលជំនាញបានសហការគ្នា ស្រាវជ្រាវនិងឈានដល់ការឃាត់ខ្លួន យិន ហេង ជាក់ស្ដែងតែម្ដង។ ក្រោយឃាត់ខ្លួន ពេលនេះជនសង្ស័យត្រូវបានកម្លាំងនាយកដ្ឋាន ប្រគល់ជូនកម្លាំងជំនាញនៃស្នងការដ្ឋាន នគរបាលរាជធានីភ្នំពេញ ដែលជាម្ចាស់ករណី ដើម្បីបន្ដសួរនាំ និងចាត់ការនីតិវិធីជាធរមាន ចំពោះអ្វីដែលបានប្រព្រឹត្ត។
គួរបញ្ជាក់ថា ការឈានទៅដល់ការឃាត់ខ្លួន យិន ហេង ដែលមានគណនី Facebook ឈ្មោះ «ចំប៉ីខ្មៅ» ធ្វើឡើងបន្ទាប់ពីយុវជនរូបនេះ បានបង្ហាញវីដេអូនៅលើបណ្ដាញសង្គម នៅខាងមុខព្រះបរមរាជវាំង ដោយប្រើប្រាស់នូវពាក្យពេចន៍ធ្ងន់ៗ ដោយប្រមាថទៅដល់ជាតិសាសន៍ខ្មែរ។ វីដេអូនោះ បានធ្វើឲ្យមានការខឹងសម្បារយ៉ាងខ្លាំង ពីសំណាក់ប្រជាពលរដ្ឋខ្មែរទូទាំងប្រទេស និងថ្កោលទោសឲ្យសមត្ថកិច្ច ចាត់ការចំពោះបុគ្គលភេទទី៣នេះផងដែរ។
តាមចម្លើយសារភាពរបស់ជនសង្ស័យរូបនេះ មូលហេតុដែលធ្វើឲ្យខ្លួនប្រមាថជាតិសាសន៍ខ្មែរ ដោយសារតែមានជនអនាមិកចំនួន៣នាក់ បានជិះម៉ូតូមកខោកក្បាលខ្លួនចំនួន៣ដង (៣ក្រញ៉) ដោយមិនដឹងមូលហេតុ។ ជនសង្ស័យថា សកម្មភាពខោកក្បាលពីជនអនាមិក បានធ្វើឲ្យខ្លួនមានការឈឺចាប់ជាខ្លាំង ក៏បង្កឲ្យខ្លួនបង្ហោះវីដេអូជេរប្រមាថខ្មែរ ព្រោះតែកំហឹងមួយឆាវតែម្តង។
ការប្រឹងប្រែងដោយថ្នាក់លើ ក៏ដូចសមត្ថកិច្ចនគរបាលខណ្ឌដូនពេញ គឺមានការគាំទ្រ និងតាមដានពីប្រជាជន ដោយយកចិត្តទុកដាក់បំផុត ។ ចុងក្រោយរូបគេចូលដេកគុក តាមបំណងរបស់គេ ហើយសមនិងពាក្យប្រជាជន និយាយថា៖ «សមតែដេកគុក ទីបំផុតគុកមែន»៕

ដោយ៖ សិលា