ខេត្តស្ទឹងត្រែង ៖ ឃាតកដែលសម្លាប់បុរសម្នាក់ដោយយកខ្សែចងដុំថ្មរួចទម្លាក់ចូលក្នុងទឹកទន្លេសេសានត្រូវបានសមត្ថកិច្ចស្រាវជាវឃើញនិងបានឃាត់ខ្លួនជនសង្ស័យដល់ទៅ៣នាក់ រួចហើយកាលពីថ្ងៃព្រហស្បត្តិ៍ ៣ កើត ខែមាឃ ឆ្នាំ ច សំរឹទ្ធិស័ក ព.ស.២៥៦២ ត្រូវនឹងថ្ងៃទី៧ខែកុម្ផៈឆ្នាំ២០១៩ ដែលឃាតកនោះ ជាប្រពន្ធនិងកូនរបស់ជនរងគ្រោះតែម្តង ។
មន្ត្រីនគរបាល ស្រុលសេសានបានឲ្យដឹងថា ជនរងគ្រោះដែលត្រូវប្រពន្ធនិងកូនព្រួតគ្នាសម្លាប់នោះ ឈ្មោះថង រិទ្ធី ភេទប្រុសអាយុ ៣៦ឆ្នាំ។ ចំណែកជនដៃដល់ជាកូនមាន១-ឈ្មោះ រិទ្ធី សុមុន្នី ភេទប្រុស អាយុ១៩ឆ្នាំ(កូន)២-ស្ត្រីជាប្រពន្ធឈ្មោះ ម៉េត អាប់អាយុ៣៣ឆ្នាំ(ប្រពន្ធ)និងអ្នកទី ៣-ឈ្មោះម៉េត គី ភេទប្រុសអាយុ២២ឆ្នាំ(ប្អូនថ្លៃ)ជនរងគ្រោះនិងជនដៃដល់មានទីលំនៅភូមិភ្លុកឃុំភ្លុកស្រុកសេសានខេត្តស្ទឹងត្រែងដូចគ្នា។
សមត្ថកិច្ចដដែលបានឲ្យដឹង ថាកាលពីថ្ងៃទី៤ខែកុម្ភៈឆ្នាំ២០១៩មានអ្នកនេសាទត្រីបានប្រទះឃើញសពបុរសម្នាក់អណ្តែតទឹកទន្លេសេសានដោយមានចងខ្សែជាមួយដុំថ្មផង នៅភូមិបានប៉ុងឃុំភ្លុកស្រុកសេសានខេត្តស្ទឹងត្រែង។ក្រោយពីឃើញសាកសពដែលសន្និដ្ឋានជាអំពើឃាតកម្មនោះសមត្ថកិច្ចជំនាញនគរបាលការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តសហការជាមួយនគរបាលស្រុកសេសានចុះស្រាវជ្រាវភ្លាមៗ និងបានរកឃើញលាតត្រដាងដឹងពីការពិតនៃអំពើឃាតកម្មនេះផងដែរ។
សមត្ថកិច្ចស្រាវជ្រាវដឹងថា នៅថ្ងៃកើតហេតុប្ដីស្រវឹងបានឈ្លោះនិងប្រពន្ធរួមទាំងកូនហើយពេលដែលឈ្លោះគ្នានោះឪពុកបានយកដំបងបម្រុងវាយទៅលើកូនតែកូនចាប់យកដំបងបានក៏វាយទៅលើឪពុកចំនួន២ដំបងចំក្បាលផ្នែកខាងក្រោយ។ មួយដំបងទៀតចំស្មាធ្វើឲ្យឪពុកដេកស្ដូកស្ដឹងស្លាប់ភ្លាមៗនៅលើផ្ទះតែម្ដង ។
ក្រោយឃាត់ខ្លួនស្ត្រីត្រូវជាប្រពន្ធជនរងគ្រោះសារភាពចំពោះមុខសមត្ថកិច្ចថា ក្រោយកើតហេតុជនដៃដល់ជាកូនបានយកអាវនិងខ្សែចងសពឪពុកស្លាប់សណ្ដូនជាមួយថ្មជាច្រើនដុំទម្លាក់ចូលទៅក្នុងទឹកទន្លេសេសានមួយថ្ងៃមុន។លុះដល់ថ្ងៃទី៤ខែកុម្ភៈត្រូវបានប្រជានេសាទប្រទះឃើញសាកសពអណ្ដែតក្នុងទន្លេដែលមានខ្សែចងដុំថ្មជាច្រើនដុំក៏បានរាយការណ៍ទៅដល់សមត្ថកិច្ចចុះស្រាវជ្រាវ។
បន្ទាប់មកសមត្ថកិច្ចធ្វើកោសល្យវិច័យរកឃើញថាសាកសពត្រូវបានគេសម្លាប់ចងនិងថ្មសណ្ដូនទម្លាក់ទឹកហើមស្អុយមិនត្រូវបានស្គាល់អត្តសញ្ញាណនោះទេ។ ក្រោយពីស្រាវជ្រាវ យ៉ាងល្អិតល្អន់មនុស្សបីនាក់ជាប់ពាក់ព័ន្ធក្នុងករណីនេះត្រូវបានឃាត់ខ្លួនក្នុងនោះមានកូនប្រុសស្ត្រីជាប្រពន្ធនិងប្អូនថ្លៃនាំខ្លួនមកអធិការដ្ឋាននគរបាលស្រុកសេសាននិងបញ្ជូនមកកាន់ស្នងការដ្ឋាននគរបាលខេត្តដើម្បីសាកសួរ។បន្ទាប់ពីមានការសាកសួរជនដៃដល់ជាកូនមិនត្រូវបានសារភាពថាខ្លួនបានសម្លាប់ឪពុកនោះទេ។ចំណែកម្ដាយបានសារភាពថា នៅថ្ងៃកើតហេតុប្តីរបស់គាត់ស្រវឹងឈ្លោះជាមួយគាត់និងកូនហើយប្តី បានយកដំបងបម្រុងវាយគាត់ធ្វើឲ្យកូនប្រុសខឹង បានស្ទុះទៅឆក់យកដំបងពីដៃឪពុកវាយទៅលើឪពុកចំនួន២ទៅ៣ដំបងបណ្ដាលឱ្យស្លាប់តែម្ដង។ក្រោយមកយកសពជនរងគ្រោះចុះទៅក្នុងទន្លេនិងចងសណ្តូនថ្មទម្លាក់ទឹកដើម្បីបំបាត់ភស្តុតាង។
ស្ត្រីជាប្រពន្ធបានសារភាពទៀតថាប្ដីគាត់ពិតជាត្រូវបានកូនវាយនឹងដំបងពិតប្រាកដមែន។នៅក្នុងហេតុការណ៍នោះក៏មានប្អូនថ្លៃរបស់គាត់ម្នាក់ពេលដែលឈ្លោះគ្នាក៏មានវត្តមាននៅទីនោះដែរតែមិនបានពាក់ព័ន្ធក្នុងករណីឃាតកម្មនោះទេ។ យ៉ាងណាជនសង្ស័យទាំងបីនាក់ជាប់ពាក់ព័ន្ធក្នុងករណីនេះត្រូវបានសមត្ថកិច្ចកំពុងសាកសួរនៅឡើយនិងបញ្ជូនសំណុំរឿងទៅតុលាការថ្ងៃទី៨ខែកុម្ភៈឆ្នាំ២០១៩ ដើម្បីចាតការតាមច្បាប់ ៕
