ការប្រកួតប្រជែងអាវុធជាថ្មី រវាងរុស្ស៊ីនិងអាមេរិក កំពុងតែចាប់ផ្តើមសាជាថ្មី ក្រោយពេលអាមេរិកដកខ្លួនចេញពីសន្ធិសញ្ញា INF ចំណែករុស្ស៊ីវិញក៏បានផ្អាករាល់ការអនុវត្តទៅលើ សន្ធិសញ្ញា INF ផងដែរ។
សកម្មភាពរបស់អាមេរិកនៅក្នុងការដកខ្លួនចេញពីសន្ធិសញ្ញាអាវុធ INF គឺជារឿងមិនសមហេតុផល ដោយអាមេរិកមិនអាចរកឃើញភស្តុតាងណាមួយថារុស្ស៊ីបំពានសន្ធិសញ្ញាអាវុធនោះឡើយ ។ កន្លងមក ក្រសួងការបរទេសរុស្ស៊ី បានបញ្ជាក់ថា អាមេរិក មិនទាន់អាចផ្តល់ភស្តុតាងណាមួយ អាចបញ្ជាក់ថាទីក្រុងមូស្កូបានបំពានលើសន្ធិសញ្ញាអាវុធបរមាណូរយៈចម្ងាយមធ្យម INF ។
នៅក្នុងសេចក្តីប្រកាសរបស់ក្រសួងការបរទេសរុស្ស៊ី បានបញ្ជាក់ថាអាមេរិក បានត្រឹមតែចោទប្រកាន់ រុស្ស៊ីផលិតមីស៊ីល 9M729 បំពានសន្ធិសញ្ញា INF ដោយមិនមានភស្តុតាង។អាមេរិក ពឹងផ្អែកទៅលើព័ត៌មានមិនច្បាស់លាស់។
នៅក្នុងសេចក្តីប្រកាស ទីក្រុងវ៉ាស៊ីនតោនមិនអាចកំណត់បាននៅរយៈចម្ងាយនៃមីស៊ីលរបស់រុស្ស៊ី ។ដូច្នេះក្រសួងការបរទេសរុស្ស៊ីបញ្ជាក់ថា អាមេរិកមិនមានភស្តុតាងបង្ហាញថារុស្ស៊ីបំពាន INF នោះឡើយ។
កន្លងមកថ្មីៗ រដ្ឋមន្ត្រីការបរទេសរុស្ស៊ីលោក Sergei Lavrov បានបញ្ជាក់ថា រុស្ស៊ីនឹងដកខ្លួនចេញពីសន្ធិសញ្ញា INF ក្នុងរយៈពេល ៦ខែ ខាងមុខ ដែលជាការឆ្លើយតបទៅនឹងអាមេរិកដែលបានដកខ្លួនចេញពីសន្ធិសញ្ញានេះ។ប្រធានាធិបតីពូទីន ក៏បានប្រកាសថា រុស្ស៊ីបានឈប់គោរពទៅលើសន្ធិសញ្ញា INF ហើយ។
INF ត្រុវបានចុះហត្ថលេខា រវាងអាមេរិក និងសហភាពស៊ូវៀត នៅថ្ងៃទី ៨ខែធ្នូឆ្នាំ១៩៨៧ ដោយចូលជាធរមាន នៅថ្ងៃទី១ខែមិថុនាឆ្នាំ១៩៨៨ ។ នៅក្នុងកិច្ចព្រមព្រៀង ភាគីទាំងពីរ មិនផលិតមីស៊ីល បំពាក់ក្បាលគ្រាប់បរមាណូ ដែលបាញ់បានចម្ងាយពី៥០០-៥៥០០គីឡូម៉ែត្រ ។ ប៉ុន្តែនៅខែតុលាឆ្នាំ២០១៨ប្រធានាធិបតីអាមេរិកដូណាល់ត្រាំបានចោទប្រកាន់រុស្ស៊ីថាបានបំពានដោយផលិតនៅមីស៊ីល Novator 9M729។
ការដកខ្លួនចេញពីសន្ធិសញ្ញាអាវុធមីស៊ីលបរមាណូរយៈចម្ងាយមធ្យម របស់អាមេរិកបានបង្កក្តីបារម្ភយ៉ាងខ្លាំង ដល់ប្រទេសក្នុងតំបន់ ពីការប្រកួតប្រជែងអាវុធសាជាថ្មីកើតឡើង អាចបង្កគ្រោះថ្នាក់ដល់ពិភពលោកទាំងមូលគ្រប់ពេល ។
ក្រោយអាមេរិកប្រកាសដកខ្លួនរុស្ស៊ីបានប្រកាស ផលិតមីស៊ីល ពីរប្រភេទទប់ទល់អាមេរិកដែលបានដកខ្លួនចេញពីINF ។ នៅពេលនេះដែរ រុស្ស៊ីក៏បាន សាកល្បងមីស៊ីល ឆ្លងទ្វីប RS-24 អាចបំផ្លាញទីក្រុងទាំងមូលបាន។
កាលពីរសៀលថ្ងៃទី៦ខែមករា កម្លាំងទាហាន រុស្ស៊ីបានបាញ់សាកល្បងកាំជ្រួចមីស៊ីលឆ្លងទ្វីប ប្រភេទ RS-24 Yark ពីអាកាសយានដ្ឋាន Plesetsk ។ ការបាញ់សាកល្បងខាងលើ ក្រោយពេលអាមេរិកប្រកាសដកខ្លួនចេញពីសន្ធិសញ្ញាអាវុធមីស៊ីលបរមាណូរយៈចម្ងាយមធ្យម INF ដែលបានចុះហត្ថលេខា ជាមួយអតីតសហភាពស៊ូវៀត ក្រោយបញ្ចប់សង្គ្រាមត្រជាក់ ។
តាមសេចក្តីប្រកាសរបស់ក្រសួងការពារជាតិរុស្ស៊ីបានបញ្ជាក់យ៉ាងច្បាស់ថា « កាំជ្រួចមីស៊ីលបានវាយប្រហារចំគោលដៅ នៅតំបន់ Kura លើកោះ Kamchatka »។ ការសាកល្បងខាងលើធ្វើឡើងក្រោយពេលប្រធានាធិបតីអាមេរិកដូណាល់ត្រាំចាប់ផ្តើម ដំណើរការដកអាមេរិកចេញពី INF នៅថ្ងៃទី២ខែកុម្ភៈ រហូតដល់ខែមិថុនាឆ្នាំ២០១៩នេះ ។
ប្រទេសជាច្រើនជុំវិញពិភពលោកបង្ហាញក្តីបារម្ភយ៉ាងខ្លាំង ពីការប្រឈមមុខតានតឹងជុំវិញបញ្ហា INF រវាងអាមេរិកនិងរុស្ស៊ី អាចជម្រុញឲ្យមានការប្រកួតប្រជែងអាវុធសាជាថ្មី។
ចំណែកកាំជ្រួចមីស៊ីល RS-24 Yark ដែលរុស្ស៊ីទើបសាកល្បងនេះ ជាប្រភេទអភិវឌ្ឍន៍ចេញពីមីស៊ីល Topol-M ដែលបានសាកល្បង នៅឆ្នាំ២០០៧ ។ មីស៊ីលខាងលើ មានសមត្ថភាពវាយប្រហារ ចំគោលដៅខ្ពស់ មានកម្លាំងបំផ្លាញខ្លាំង ។ មីស៊ីលនេះ អាចបំពាក់ក្បាលគ្រាប់បរមាណូ ៦គ្រាប់ ទៅកម្ទេចគោលដៅឯករាជ្យ ដាច់ដោយឡែកពីគ្នា ។ អាចនិយាយបានថាមីស៊ីលខាងលើ អាចកម្ទេច ទីក្រុងអាមេរិកទាំងមូលបានបំផុត។
នៅពេលនេះដែរ រុស្ស៊ីនឹងផលិតកាំជ្រួចមីស៊ីល ឆ្លងទ្វីបល្បឿនលឿនបំផុត នៅឆ្នាំ២០២១ ដើម្បីជាការឆ្លើយតបទៅនឹងការដកខ្លួនអាមេរិកចេញពីកិច្ចព្រមព្រៀងមីស៊ីលបរមាណូចម្ងាយមធ្យម INF ។
សារព័ត៌មាន RIa Novosti នៅថ្ងៃទី៥ខែកុម្ភៈបានដកស្រង់សម្តីរដ្ឋមន្ត្រីការពារជាតិ លោក Sergei Shoigu បានបញ្ជាក់ថា រុស្ស៊ីចាំបាច់ត្រូវតែផលិតមីស៊ីលល្បឿនលឿន ដែលបាញ់ពីទីតាំងនៅលើដី។
កន្លងមក កាលពីថ្ងៃទី២ខែកុម្ភៈ ប្រធានាធិបតីរុស្ស៊ីលោកពូទីន បានប្រកាសថារុស្ស៊ី បានផ្អាកអនុវត្តសន្ធិសញ្ញា INF ក្រោយពេលអាមេរិកបានសម្រេចដកខ្លួនចេញពីINF។ ទន្ទឹមនឹងនោះប្រធានាធិបតីពូទីនបានប្រកាសថានឹង ផលិតអាវុធទំនើបៗបន្ថែមទៀតដើម្បីជាការឆ្លើយតបទៅនិងសកម្មភាពរបស់អាមេរិក។
ក្រោយពេល ឱសានវាទ ៦០ថ្ងៃដែលអាមេរិក កំណត់ឲ្យរុស្ស៊ីត្រូវតែអនុវត្តទៅតាមសន្ធិសញ្ញា INF ផុតកំណត់ នៅថ្ងៃទី១ខែកុម្ភៈកន្លងមក ប្រធានាធិបតីអាមេរិកដូណាល់ត្រាំបានប្រកាសថា៖ ទីក្រុងវ៉ាស៊ីនតោនបានចាប់ផ្តើម ដំណើរការដកខ្លួនចេញពី INF ក្នុងរយៈ៦ខែខាងមុខ ។ ជាមួយគ្នានេះដែរ អគ្គរដ្ឋទូតអាមេរិកប្រចាំនៅទីក្រុងមូស្កូបានបញ្ជាក់ថា ប្រសិនបើរុស្ស៊ីគោរពសន្ធិសញ្ញាខាងលើ ដំណើរការដកអាមេរិកចេញពី INF និងត្រូវផ្អាក៕ សាធី
