ភ្នំពេញ៖ នៅរសៀលថ្ងៃទី៨ ខែធ្នូ ឆ្នាំ២០១៥ កម្លាំងនគរបាលព្រហ្មទណ្ឌ នៃអធិការដ្ឋាននគរបាលខណ្ឌដង្កោ បានបង្ហាញមុខជនសង្ស័យប្រុស ស្រី មុខសញ្ញាក្នុងករណីវាយប្លន់យកម៉ូតូ សរុប០៨នាក់ ដែលបង្ក្រាបបានជាបន្តបន្ទាប់គ្នា ។
ប្រភពព័ត៌មានពីសមត្ថកិច្ចប្រាប់ឲ្យដឹងថា កាលពីវេលាម៉ោង៨ និង៣០នាទី ព្រឹកថ្ងៃទី៦ ខែឆ្នូ ឆ្នាំ២០១៥ នៅម្តុំហាងកាហ្វេមួយកន្លែង នៅតាមបណ្តោយផ្លូវ៣០ម៉ែត្រ ស្ថិតក្នុងភូមិព្រៃទីទុយ សង្កាត់ព្រៃស ខណ្ឌដង្កោ កម្លាំងនគរបាលប៉ុស្តិ៍រដ្ឋបាលព្រៃស សហការជាមួយកម្លាំងនគរបាលព្រហ្មទណ្ឌខណ្ឌដង្កោ ដឹកនាំដោយលោកវរសេនីយ៍ទោ ជឹម ស៊ីថា អធិការខណ្ឌដង្កោ បានធ្វើការឃាត់ខ្លួន ជនសង្ស័យ ប្រុស ស្រី ៣នាក់ ដែលជាមុខសញ្ញាវាយប្លន់យកម៉ូតូ ។
ជនសង្ស័យទាំង៣នាក់ ទី១ ឈ្មោះ ធឿន រ៉ាវី ហៅ រ៉ា ហៅ រិទ្ធ ហៅ ធូ ភេទប្រុស អាយុ២៩ឆ្នាំ មុខរបរមិនពិតប្រាកដ មានទីលំនៅភូមិសាមគ្គី២ សង្កាត់ត្រពាំងក្រសាំង ខណ្ឌពោធិសែនជ័យ ទី២ ឈ្មោះ នី និត ភេទប្រុស អាយុ៣០ឆ្នាំ មុខរបរមិនពិតប្រាកដ ស្នាក់នៅផ្ទះជួល ម្តុំក្តាន់ពីរ សង្កាត់មិត្តភាព ខណ្ឌ៧មករា និងទី៣ ឈ្មោះ សួង សុខនាង ហៅ ទូច ភេទស្រី អាយុ២២ឆ្នាំ មុខរបរមិនពិតប្រាកដ មានទីលំនៅផ្ទះជួល ភូមិព្រៃព្រីង សង្កាង់ចោមចៅ ខណ្ឌពោធិសែនជ័យ ដកហូតវត្ថុតាងម៉ូតូ ១គ្រឿង ម៉ាក ស្មាស់ រីវ៉ូ ពណ៍ខៀវ ពាក់ស្លាកលេខ កណ្តាល 1D-1767 និងសម្ភារៈសម្រាប់ធ្វើសកម្មភាពម៉ាឡេត ១ដើម។
ប្រភពដដែលបានប្រាប់បន្តឲ្យដឹងថា ជនសង្ស័យទាំង៣នាក់នេះ តែងតែប្រើល្បិចដោយអោយស្ត្រីឈ្មោះ សួង សុខនាង ជួលម៉ូតូឌុបជិះ លុះមកដល់កន្លែងស្ងាត់ នាងបានអោយឈប់ម៉ូតូរួចក៏មានបក្ខពួកវាយពីក្រោយខ្នងអ្នកម៉ូតូឌុបនោះ ដោយប្រើម៉ាឡេត ប្លន់យកម៉ូតូបានសម្រេចជាច្រើនដង ។ ជនសង្ស័យទាំ ៣នាក់ គឺជាមុខសញ្ញាវាយប្លន់យ៉ាងសកម្មនៅក្នុងរាជធានីភ្នំពេញ និងជាមុខសញ្ញាវាយប្លន់យកម៉ូតូពីប្រជាពលរដ្ឋបានសម្រេចចំនួន ២លើក កាលពីថ្ងៃទី២១ និងថ្ងៃទី២៥ ខែវិច្ឆិកា ឆ្នាំ២០១៥ នៅម្តុំផ្លូវ៣០ម៉ែត្រ សង្កាត់ព្រៃស ខណ្ឌដង្កោផងដែរ។
សមត្ថកិច្ចប្រាប់បន្តទៀតថា ក្រោយពីសួរនាំរហូតឈានដល់ការឃាត់ខ្លួនបក្ខពួក ជនសង្ស័យបាន៤នាក់បន្ថែមទៀត ឈ្មោះ រឿង សុវណ្ណ ភេទប្រុស ហៅ ភ្លើង ហៅ វុធ ភេទប្រុស អាយុ៣៤ឆ្នាំ មុខរបរមិនពិតប្រាកដ ស្នាក់នៅផ្ទះជួល ភូមិចំរើនផល សង្កាត់បឹងទំពុន ខណ្ឌមានជ័យ ឃាត់ខ្លួននាវេលាម៉ោង ១៥ និង២០នាទី រសៀលថ្ងៃខែដដែល នៅចំណុចហាងកាហ្វេបាកា សង្កាត់ទឹកល្អក់ទី២ ខណ្ឌទួលគោក ទី២ឈ្មោះ ស្រ៊ុន តឹកឡាយ ហៅ គឹម ភេទប្រុស អាយុ២៦ឆ្នាំ មុខរបរ និងស្នាក់នៅមិនពិតប្រាកដ មានស្រុកកំណើតនៅភូមិចារ ឃុំចារ ស្រុកព្រៃកប្បាស ខេត្តតាកែវ ឃាត់ខ្លួន នាវេលាម៉ោង ២២និង០០នាទី យប់ថ្ងៃខែដដែល នៅចំណុចហាងសាំង អេចអិល ផ្លូវជាតិលេខ៤ ភូមិព្រៃស្វាយ សង្កាត់ចោមចៅ ខណ្ឌពោធិសែនជ័យ ទី៣ឈ្មោះ គីង គឹមស៊ន ភេទប្រុស អាយុ៣១ឆ្នាំ មុខរបរមិនពិតប្រាកដ ស្នាក់នៅផ្ទះជួល ក្បែររោងចក្រ តេង ឡាយ សង្កាត់ចោមចៅ ខណ្ឌពោធិសែនជ័យ ឃាត់ខ្លួន នាវេលាម៉ោង ២៣ និង២០នាទី យប់ថ្ងៃខែដដែល នៅចំណុចមុខក្លឹប ហ្វរជូន ផ្លូវជាតិលេខ៤ ភូមិព្រៃស្វាយ សង្កាត់ចោមចៅ ខណ្ឌពោធិសែនជ័យ។ ដកហូតម៉ូតូ ២គ្រឿង ១គ្រឿង ម៉ាក សេ១២៥ ពណ៍ខ្មៅ ពាក់ស្លាកលេខ តាកែវ 1E-3921 និង ១គ្រឿង ទៀត ម៉ាក ស្មាស់ ពណ៍ក្រហមលាយខ្មៅ ពាក់ស្លាកលេខ ភ្នំពេញ 1Z-7344 ព្រមទាំងស្លាកលេខ១សន្លឹក ភ្នំពេញ 1CM-9553 និងវត្ថុតាងពាក់ព័ន្ធមួយចំនួនទៀត។ នៅក្នុងករណីនេះ សមត្ថកិច្ចបន្តឃាត់បានស្ត្រី ៣នាក់ទៀត ទី១ ឈ្មោះ វណ្ណ ដារ៉េត អាយុ២៩ឆ្នាំ ឃាត់ខ្លួននាវេលាម៉ោង១០និង៣០នាទី ថ្ងៃទី៧ ខែធ្នូ ឆ្នាំ ២០១៥ នៅចំណុចភូមិស្រះពោធិ៍ ឃុំភ្នំបាទ ស្រុកពញាឮ ខេត្តកណ្តាល និងទី២ឈ្មោះ មឿន គន្ធា ហៅ ចិន្តា អាយុ៣៣ឆ្នាំ មុខរបរមិនពិតប្រាកដ ការឃាត់ខ្លួនជនសង្ស័យទាំងនេះបានធ្វើឡើង នាវេលាម៉ោង១២និង៣០នាទី ថ្ងៃទី៧ ខែធ្នូ ឆ្នាំ ២០១៥ នៅចំណុចលើផ្លូវជាតិលេខ៦អា ស្ថិតក្នុងភូមិវត្តថ្មី ឃុំព្រែកដំបង ស្រុក មុខកំពូល ខេត្តកណ្តាល។
សមត្ថកិច្ចប្រាប់បញ្ជាក់ឲ្យដឹងថា ក្រោយពីសាកសួរតាមជំនាញជនសង្ស័យ បានឆ្លើយសារភាពថា ពួកគេធ្លាប់ធ្វើសកម្មភាពវាយប្លន់យកម៉ូតូ នៅក្នុងរាជធានីភ្នំពេញបានសម្រេចចំនួន៨លើករួចមកហើយ ក្នុងនោះខណ្ឌព្រែកព្នៅ៣លើក ខណ្ឌពោធិសែនជ័យ២លើក ខណ្ឌដង្កោ២លើក និងខណ្ឌជ្រោយចង្វារ១លើក ។
បច្ចប្បន្នជនសង្ស័យទាំង៨នាក់នេះ ត្រូវបានកម្លាំងសមត្ថកិច្ចនគរបាលព្រហ្មទណ្ឌខណ្ឌដង្កោ កំពុងកសាងសាណុំរឿងបញ្ចូនទៅតុលាការសាលាដំបូងរាជធានីភ្នំពេញដើម្បីចាត់ការតាមនីតិវិធីច្បាប់ ៕
ដោយ៖ ភារ៉ាដង្កោ
