ខេត្តកណ្តាល៖ លោកស្នងការរងខេត្តកណ្ដាល អ៊ុល ប៊ុនណា កាលពីម្សិលមិញថ្ងៃទី២០ ខែកុម្ភៈ ឆ្នាំ២០១៩ ត្រូវបានមជ្ឈដ្ឋានប្រជាជនក្នុងមូលដ្ឋានរិះគន់យ៉ាងខ្លាំង បន្ទាប់ពីគាត់យករថយន្តពន្លត់អគ្គីភ័យចំនួន២គ្រឿងមកបម្រើអោយការងារសាងសង់សំណង់ផ្ទាល់ខ្លួននៅឃុំត្រើយស្លា ស្រុកស្អាង ខេត្តកណ្តាល ។
ប្រជាជនបានផ្តិតយករូបភាពនេះបង្ហោះលើបណ្ដាញទំនាក់ទំនងសង្គម (ហ្វេសប៊ុក) ទើបនៅព្រឹកថ្ងៃទី២១ ខែកុម្ភៈ ឆ្នាំ២០១៩នេះនាយឧត្ដមសេនីយ៍ នេត សាវឿន ព្រមានដោយផ្ទាល់មាត់ ទៅលើស្នងការរងខេត្ដកណ្ដាលម្នាក់នេះ ក្រោយយករថយន្ដពន្លត់អគ្គិភ័យ ទៅប្រើប្រាស់ជាប្រយោជន៍ផ្ទាល់ខ្លួនពិតមែនដូចប្រជាជនលើកឡើងនោះ។
មន្ត្រីនគរបាលបានអោយដឹងថា ៖ នាយឧត្តមសេនីយ៍សន្ដិបណ្ឌិត នេត សាវឿន អគ្គស្នងការនគរបាលជាតិ បានប្រាប់ដោយផ្ទាល់មាត់ទៅ លោកឧត្ដមសេនីយ៍ទោ អ៊ាវ ចំរើន ស្នងការនគរបាលខេត្តកណ្ដាលឲ្យព្រមានទៅស្នងការរងខេត្តកណ្ដាលលោក អ៊ុល ប៊ុនណា ដែលបានយករថយន្ដពន្លត់អគ្គិភ័យ ទៅប្រើប្រាស់ជាប្រយោជន៍ផ្ទាល់ខ្លួន ដោយដឹកទឹកទៅលាយស៊ីម៉ង់ត៍ជូនសាច់ ញាតិ នៅមូលដ្ឋានស្រុកស្អាង ខេត្តកណ្តាល។
លោកឧត្តមសេនីយ៍ទោ អ៊ាវ ចំរើន ក៌បានប្រាប់អង្គភាពសារព័ត៍មាន នៅព្រឹកថ្ងៃទី២១ ខែកុម្ភៈ ឆ្នាំ២០១៩នេះថា អគ្គស្នងការនគរបាលជាតិ បានដាក់បញ្ជាមកលោកនៅក្នុងកិច្ចប្រជុំ ដោយឲ្យព្រមានផ្ទាល់មាត់ទៅស្នងការរងទទួលផែនបង្ការ និងពន្លត់អគ្គិភ័យ លោក អ៊ុល ប៊ុនណា ជុំវិញការយករថយន្ដរបស់អង្គភាពទៅប្រើប្រាស់ជាប្រយោជន៍ផ្ទាល់ខ្លួន ហើយប្រសិនបើ មានលើកក្រោយ នឹងត្រូវដាក់ពិន័យរបស់កងកម្លាំង។
លោកឧត្តមសេនីយ៍ អ៊ាវ ចំរើន បានបញ្ជាក់យ៉ាងដូច្នេះថា «ឯកឧត្តម អគ្គស្នងការនគរបាលជាតិ បានដាក់បទបញ្ជាខ្ញុំ ដោយឲ្យព្រមានដោយផ្ទាល់មាត់ទៅស្នង ការរងម្នាក់នៅក្នុងកិច្ចប្រជុំ ពាក់ព័ន្ធករណីរថយន្ដពន្លត់អគ្គិភ័យទៅប្រើប្រាស់ដោយគ្មានការអនុញ្ញាត និងជាប្រយោជន៍ផ្ទាល់ខ្លួន ហើយបើសិនមានលើកក្រោយទៀត នឹងអនុវត្តវិន័យរបស់កងកម្លាំងនគរបាលជាតិ»។
សូមជម្រាបថា ពាក់ព័ន្ធករណីនេះ នាយកដ្ឋានបង្ការ និងពន្លត់អគ្គិភ័យ នៃអគ្គស្នងការដ្ឋាននគរបាលជាតិ ក្រសួងមហាផ្ទៃ បានបញ្ជាឲ្យការិយាល័យជំនាញ តាមបណ្ដាស្នងការដ្ឋានរាជធានី-ខេត្តទាំងអស់ ត្រូវបិទស្ទីកគ័រឈ្មោះខេត្ត (ស្នងការដ្ឋាននគរបាលរាជធានី-ខេត្ត…) នៅលើរថយន្ដរបស់អង្គភាពរៀងៗខ្លួន ចៀសវាងមានការភ័ន្តច្រឡំពីសាធារណជន ក្រោយស្នងការរងខេត្តកណ្ដាលម្នាក់ បានយករថយន្ដពន្លត់អគ្គិភ័យទៅប្រើប្រាស់ផ្ទាល់ខ្លួន ដែលនាំឲ្យផ្ទុះការរិះគន់ពីមហាជន។
លោកឧត្តមសេនីយ៍ទោ នេត វន្ថា ប្រធាននាយកដ្ឋានបង្ការ និងពន្លត់អគ្គិភ័យ នៅថ្ងៃទី២១ ខែកុម្ភៈ ឆ្នាំ២០១៩នេះ បានបញ្ជាក់យ៉ាងដូច្នេះថា «លោកស្នងការរងទទួលផែន និងលោកនាយការិយាល័យ គ្រប់រាជធានី ខេត្ត ក្រុង ដែលមានរថយន្តពន្លត់អគ្គិភ័យកំពុងគ្រប់គ្រងដោយអង្គភាពខ្លួន ត្រូវកាត់បិតស្ទីកគ័រ (ស្នងការដ្ឋាននគរបាលខេត្ត…) បន្ថែមចំណុចសមស្របណាមួយលើ រថយន្តរបស់អង្គភាពខ្លួន។ ជៀសវាងសាធារណៈយល់ថា ជារបស់នាយកដ្ឋាន នៃក្រសួងមហាផ្ទៃ។ នាយកដ្ឋានគាំទ្រដល់ស្នងការដ្ឋាននគរបាលរាជធានី ខេត្ត ក្រុង មួយចំនួនបានរៀបចំល្អហើយ»។
មន្រ្តីនគរបាលខេត្តកណ្តាល បានបញ្ជាក់ថា ក្រោយពីសួរនាំមន្ត្រីទើបដឹងថា ឡានទឹកទាំងពីរគ្រឿងនោះ មានគេពឹងពាក់លោក អ៊ុល ប៊ុនណា ជាស្នងការរងទទួលបន្ទុកផ្នែករថយន្តពន្លត់អគ្គីភ័យ ពេលនោះលោកស្នងការរង បានបញ្ជាទៅលោក តោ សឿន ជាប្រធានការិយាល័យបង្ការ និងពន្លត់អគ្គិភ័យតែម្តង។
សូមបញ្ជាក់ថា កាលពីថ្ងៃទី២០ ខែកុម្ភៈ ឆ្នាំ២០១៩ មានការរិះគន់ចំពោះសកម្មភាពរបស់មន្រ្តីនគរបាល ដែលបានយករថយន្តពន្លត់ អគ្គីភ័យពីរគ្រឿងដឹកទឹកទៅលាយស៊ីម៉ង់ត៍ ដើម្បីធ្វើសំណង់ ខណៈក្រោយមកនោះ ក៏មានគ្រោះអគ្គិភ័យមួយបានកើតឡើង នៅក្នុងឃុំស្វាយរលំ ស្រុកស្អាង ខេត្តកណ្តាល បណ្តាលឲ្យផ្ទះប្រជាពលរដ្ឋមួយខ្នង ឆេះនៅសល់តែផេះផង់មិនអាចជួយបាន៕ ដោយ ៖ សុខខេមរា
