ខេត្តក្រចេះ៖ អ្នកភូមិចំនួន២ភូមិផ្សេងគ្នា នៅក្នុងស្រុកស្នួល ខេត្តក្រចេះ បានពុលស្រាសស្លាប់ជាបន្តបន្ទាប់ និងមានអ្នកភូមិប្រុស ស្រីជាច្រើននាក់ទៀតកំពុងស្ថិតនៅក្នុងការសង្គ្រោះ ពីក្រុមគ្រូពេទ្រ ។
អាជ្ញាធរស្រុកស្នួលបាននិយាយថា នេះជាបាតុភាពមួយផ្សេងទៀត ខណៈអ្នកពុលសាច់ឆ្កែនៅតែបន្តស្លាប់ តែអីឡូវចូលមកដល់អ្នកពុលស្រាស បង្កឱ្យស្ត្រី២នាក់ នៅភូមិផ្សេងគ្នាបានស្លាប់ជាបន្តបន្ទាប់ និងកំពុងសង្គ្រោះជាង២០នាក់ ។
ការភ្ញាក់ផ្អើលសារជាថ្មីមួយនេះបានកើតលើងកាលពីរសៀលថ្ងៃទី៨ ខែធ្នូ បន្ទាប់ពីមាន អ្នកភូមិប្រុស-ស្រី ជាច្រើននាក់ ត្រូវបាននាំមកសង្គ្រោះរណូករណែលនៅមន្ទីរពេទ្យស្នួល និងបញ្ជូនទៅមន្ទីរពេទ្យភ្នំពេញ ហើយអាការៈរបស់អ្នកភូមិទាំងនេះត្រូវបានអាជ្ញាធរដាក់ការ កំណត់ថា បណ្តាលពីពុលស្រា។
អធិការនគរបាលស្រុកស្នួល លោក ចាន់ សុខគីម បានឱ្យដឹងថា អ្នកភូមិដែលរងនូវការពុលស្រា.ស ទាំង២នាក់នេះ ១ឈ្មោះ ប្រលុង ធឿន ភេទស្រី អាយុ៣៤ឆ្នាំរស់នៅភូមិស្រែថ្មី ឃុំឃ្សឹម ស្រុកស្នួល និងម្នាក់ទៀតឈ្មោះ កន សារឿន ភេទស្រីអាយុ២៦ឆ្មាំ រស់នៅភូមិត្រពាំងល័ក្ខ ឃុំឃ្សឹម ស្រុកស្នួល បានស្លាប់កាលពីល្ងាចថ្ងៃទី៨ ខែធ្នូ ក្នុងនោះក៏មានអ្នកភូមិប្រុស-ស្រីជាង២០នាក់ផ្សេងទៀតក៏កំពុងរងនូវអការៈពុលធ្ងន់និងស្រាល។
អ្នកភូមិដែលបានស្លាប់និងរងនូវការពុលទាំងនេះ បានកើតមានឡើងក្រោយពីពួកគាត់បានទទួលទានស្រា.សត្រាំសំបកឈើនាងនួនដែលត្រាំជាមួយស្រា សរ ដាក់លក់នៅតៀមចាប់ហ៊ួយមួយកន្លែង ក្នុងភូមិ។
អភិបាលស្រុកស្នួល លោក គឹម គង់នី បានឲ្យដឹងថា ក្រោយ ពីមានអ្នកភូមិស្លាប់និងរងគ្រោះរណូករណេល ដែលអាជ្ញាធរបានកំណត់ថា បណ្តាលមកពី ពុលស្រានេះ នៅថ្ងៃទី៩ ខែធ្នូ កម្លាំងអាជ្ញាធរស្រុក បានចុះឃាត់ខ្លួនអ្នកធ្វើអាជីវកម្មផលិតស្រា មានចំនួន២នាក់ នៅស្រែថ្មី ឃុំឃ្សឹម ស្រុកស្នួល និងបានឃាត់ខ្លួនអ្នកផលិតស្រាម្នាក់ទៀត នៅភូមិត្រពាំងលាក់ ឃុំស្នួល ស្រុកស្នួល មកកាន់អធិការដ្ឋានដើម្បីសាកសួរ។
ជាមួយនិងបាតុភាពដែលផ្ទុះចេញដោយសារការពុលដូចជានិងពុលសាច់ឆ្កែ និងពុល ស្រានិងបានបង្កឲ្យមានអ្នកភូមិជាច្រើននាក់បានស្លាប់ និងចំនួនជាច្រើននាក់ទៀត បានរង គ្រោះដោយការពុលបាន ធ្វើឲ្យអ្នកស្រុក នៅស្រុកស្នួល កំពុងតែមានភាពរន្ឋត់តក់ស្លុត និងមានក្តីបារម្ភ ខ្លាចរអារ ទៅនិងបាតុភាពដែលពុំធ្លាប់កើតមានបែបនេះ ៕
ដោយ៖ កោះទ្រុង
