ទីក្រុងវ៉ាសុីនតោន៖ កាលពីថ្ងៃទី២៨ខែកុម្ភៈ ក្រសួងការបរទេសអាមេរិកបានប្រកាសផ្តល់ប្រាក់រង្វាន់ ១លានដុល្លារ
អាមេរិក ដល់បុគ្គលណាមួយដែលបាន​ផ្តល់ដំណឹងឈានដល់ការចាប់ខ្លួន​កូនប្រុស មេភេរវកម្ម អាលកៃដា គឺ លោក Hamza Bin Laden ​។
សារព័ត៌មាន​ Sputnik ​នៅថ្ងៃទី​១ខែមីនា បានបានដកស្រង ការប្រកាសរបស់ក្រសួងការបរទេសអាមេរិកថា កូនប្រុស អូស្មាប៊ិនឡាឌិន គឺ Hamza Bin Laden កំពុងតែ ល្បីល្បាញ ក្នុងនាមជាមេដឹកនាំថ្មីសម្រាប់ក្រុម​ភេរវកម្ម​ អាលកៃដា ។
នៅក្នុងសេចក្ដីថ្លែងការណ៍ចេញផ្សាយនៅថ្ងៃព្រហស្បតិ៍សប្ដាហ៍នេះ (ម៉ោងនៅអាមេរិក) ក្រសួងការបរទេសអាមេរិកបានបញ្ជាក់ទៀត​ថា Hamza គឺជាមេដឹកនាំម្នាក់របស់ក្រុមអាល់កៃដា ហើយចាប់តាំងពីខែសីហា ឆ្នាំ២០១៥មក គាត់បានបញ្ចេញខ្សែអាត់សម្លេង និងសារវីដេអូជាច្រើននៅលើបណ្ដាញអ៊ីនធឺណែតដោយអំពាវនាវឱ្យអ្នកស្មោះស័្មគ្ររបស់ខ្លួនបើកការវាយប្រហារប្រឆាំងនឹង​សហរដ្ឋអាមេរិក រួមទាំងបណ្ដាប្រទេសលោកខាងលិច។
គួររំលឹកថា អតីតមេដឹកនាំអាល់កៃដា Osama bin Laden ត្រូវបានកងកម្ម៉ង់ដូពិសេសអាមេរិកបាញ់សម្លាប់នៅថ្ងៃទី២ ខែឧសភា ឆ្នាំ២០១១ ក្នុងប្រទេសប៉ាគីស្ថាន ហើយសាកសពរបស់គាត់ត្រូវគេយកទៅបោះចោលនៅក្នុងសមុទ្រ។ រីឯ Hamza bin Laden ក៏បានចេញសារព្រមានផងដែរថានឹងតាមសងសឹកសហរដ្ឋអាមេរិកឱ្យឪពុករបស់លោកវិញ៕

ដោយ៖ មែវ សាធី