ភ្នំពេញ៖ យុវជន៣នាក់ ត្រូវបានកម្លាំងនគរបាល ខណ្ឌពោធិ៍សែនជ័យ ឃាត់ខ្លួនបានកាលពីវេលាម៉ោង១រំលងអធ្រាត្រឈានចូលថ្ងៃទី១០ ខែធ្នូ ឆ្នាំ២០១៥ ស្ថិតនៅក្នុងសហគមន៍ ក្រពាំងអញ្ចាញ សង្កាត់ត្រពាំងក្រសាំង ខណ្ឌពោធិ៍សែនជ័យ បន្ទាប់ពីពួកគេនាំគ្នាសំងំ ប្រើប្រាស់គ្រឿងញៀននៅក្នុងសហគមន៍។
មន្ត្រីនគរបាលខណ្ឌពោធិ៍សែនជ័យបានឲ្យដឹងថា ជនសង្ស័យដែលឃាត់ បាននោះទី១ ឈ្មោះ រី ពិសី ភេទប្រុស អាយុ១៩ឆ្នាំ មានមុខរបរមិនពិតប្រាកដ, ទី២ឈ្មោះ សុខ ចន្ធី ភេទប្រុស អាយុ២៣ឆ្នាំ មានមុខរបរមិនពិតប្រាកដ និងទី៣.ឈ្មោះ ឯម ផេត ភេទប្រុសអាយុ១៩ឆ្នាំ មានមុខរបរមិនពិតប្រាកដ។ អ្នកទាំង ៣ស្នាក់ នៅសហគមន៍ត្រពាំងក្រសាំង សង្កាត់ត្រពាំងក្រសាំង ខណ្ឌពោធិ៍សែនជ័យ ហើយពេលនោះសមត្ថកិច្ច ដកហូត បានវត្ថុតាងថ្នាំញៀន២កញ្ចប់តូច និងសម្ភារៈប្រើប្រាស់មួយចំនួនទៀត ។
ប្រភពព័ត៌មានដដែលឲ្យដឹងទៀតថា មុនពេលឈានដល់ឃាត់ខ្លួនជនសង្ស័យទាំង៣នាក់នេះគឺដោយសារតែមានការសហការល្អពីប្រជាពលរដ្ឋមូលដ្ឋានដែលបានដឹងអំពីសកម្មភាពពួកគេកំពុងជក់ថ្នាំញៀនក្នុងសហគមន៍ ទើបរាយការណ៍មកកម្លាំងនគរបាលខណ្ឌពោធិ៍សែនជ័យ ហើយពេលនោះកម្លាំងបានចុះទៅឆ្មក់ចាំមើលរហូត ឃើញមុខសញ្ញាកំពុងធ្វើសកម្មភាពក៏ឃាត់ខ្លួនរួមនឹងវត្ថុតាងតែម្តង ។
ជនសង្ស័យទាំង៣នាក់ត្រូវបាននាំយកមកកាន់អធិការដ្ឋាននគរបាលខណ្ឌពោធិ៍សែនជ័យ ដើម្បីកសាងសំណុំបញ្ជូនទៅសាលាដំបូងរាជធានីភ្នំពេញចាត់ការទៅតាមច្បាប់ ៕
ដោយ៖ ប្រាថ្នា
