ភ្នំពេញ៖ យុវជនម្នាក់ដែលគេស្គាល់ថា ជាកម្មករក្រណាត់ ត្រូវបានក្រុមចោរប្លន់មានគ្នា៤នាក់ ជិះម៉ូតូ២គ្រឿងធុនធំមួយគ្រឿង បានមកធ្វើសកម្មភាពដេញតាមប្លន់ជនរងគ្រោះមកដល់មុខផ្ទះរបស់ថៅកែខ្លួន ពេលនោះជនរងគ្រោះមិនឲ្យក៏ជនសង្ស័យខឹង បានដកកាំភ្លើងខ្លីបាញ់មួយគ្រាប់ចំក្បាល បណ្ដាលឲ្យស្លាប់ភ្លាមៗហើយ យកម៉ូតូជិះគេចខ្លួនបាត់ ។
ករណីបាញ់ប្លន់ប្រដាប់អាវុធនេះ បានកើតឡើងកាលពីវេលាម៉ោង៥និង១៥នាទីព្រឹក ថ្ងៃទី១១ ខែធ្នូ ឆ្នាំ២០១៥ តាមបណ្ដោយផ្លូវលេខ៥៩៨ សង្កាត់បឹងកក់ទី២ ខណ្ឌទួលគោក ។
ជនរងគ្រោះឈ្មោះឌិន តារ៉ារិទ្ធិ ភេទប្រុស អាយុ២១ឆ្នាំ មុខរបរជាកម្មករក្រណាត់ ស្នាក់ផ្ទះលេខ២២B ផ្លូវលេខ៥៩៨ សង្កាត់បឹងកក់ទី២ ខណ្ឌទួលគោក ជិះម៉ូតូមួយគ្រឿង ម៉ាក សេ១២៥ ពណ៌ខ្មៅ សេរីឆ្នាំ២០១៥ ពាក់ស្លាកលេខ ភ្នំពេញ 1CR-0063 ត្រូវក្រុមចោរប្លន់បានសម្រេច ។
តាមប្រភពព័ត៍មានពីសាក្សីនៅកន្លែងកើតហេតុ បានឲ្យដឹងថា គេឃើញជនរងគ្រោះ កំពុងតែជិះម៉ូតូម្នាក់ចេញពីក្លិបនៅក្នុងទឹកដីខណ្ឌ សែនសុខ ហើយស្រាប់តែលេខមុខជនសង្ស័យមួយក្រុមមានគ្នា៤នាក់ ជិះម៉ូតូ២គ្រឿងមួយគ្រឿងជាម៉ូតូធុនធំមិនស្គាល់ម៉ាកនិង មួយគ្រឿងម៉ាក ស្កុបពី បានជិះតាមកៀរជនរងគ្រោះរហូតមកតាមផ្លូវលេខ៥៩៨ តែជនរងគ្រោះមិនឲ្យដោយព្យាយាមជិះម៉ូតូរត់គេចខ្លួនមកដល់មុខផ្ទះ ដែលខ្លួនធ្វើការនោះ ស្រាប់តែជនសង្ស័យបានដកកាំភ្លើងបាញ់ចំក្បាល ជនរងគ្រោះមួយគ្រាប់បណ្ដាលឲ្យស្លាប់ភ្លាមៗនៅនិងកន្លែងកើតហេតុតែម្តង រួចយកម៉ូតូរបស់ជនរងគ្រោះជិះគេចខ្លួនដោយ សុវត្ថិភាព។
ក្រោយកើតហេតុកម្លាំងនគរបាល ខណ្ឌទួលគោក បានចុះដល់កន្លែងកើតហេតុដើម្បីស្រាវជ្រាវរកមុខសញ្ញា ដើម្បីស្វែងរកចាប់ក្រុមចោរប្លន់ទាំងនោះយកមកដាក់ទោសតាមច្បាប់ ៕
ដោយ៖ ស ដារ៉ា
