ស្ថានភាពនៅក្នុងប្រទេសវេណេហ្ស៊ុយអេឡា កាន់តែធ្លាក់ក្នុងដាន់ចាស់របស់ប្រទេសស៊ីរី ដោយវិបត្តិមិនអាចដោះស្រាយបានភ្លាមៗនោះឡើយ។ នៅពេលនេះរដ្ឋាភិបាលរបស់ប្រធានាធិបតីម៉ឌូរ៉ូ បានរុះរើគណៈរដ្ឋមន្ត្រីដើម្បី រៀបចំរដ្ឋាភិបាលជាថ្មីឡើងវិញ ក្នុងគោលបំណង ការពារ វេណេហ្ស៊ុយអេឡា ។
ប៉ុន្តែនៅពេលនេះមន្ត្រីជាច្រើន ក៏ដូចជាកម្លាំងទាហាន ជាដើរចេញពីប្រធានាធិបតីម៉ាឌូរ៉ូជាបន្តបន្ទាប់ ។ មានប្រភពព័តឥមានបានផ្សាយថា ទាហានវេណេហ្ស៊ុយអេឡា ប្រមាណ១ពាន់នាក់ បានរត់ចោលជួរ ដោយភៀសខ្លួនចេញទៅកាន់ ប្រទេសកូឡុំប៊ី។
សារព័ត៌មាន AP បានផ្សាយកាលពីថ្ងៃទី១៩ ខែមីនា ឆ្នាំ២០១៩ថា ក្រសួងការបរទេសកូឡុំប៊ី បានចេញផ្សាយរបាយការណ៍ចុងក្រោយបញ្ជាក់ថា តាំងពីថ្ងៃទី២៣ ខែកុម្ភៈ ឆ្នាំ២០១៩ មកទល់នឹងបច្ចុប្បន្ននេះ កម្លាំងទាហាន ប៉ូលិស រដ្ឋាភិបាលវេណេហ្ស៊ុយអេឡា ប្រហែល១០០០ពាន់នាក់ បានបោះបង់អាវុធ ឯកសណ្ឋាន រួចនាំប្រព័ន្ធកូន រត់ឆ្លងដែន មកកាន់ប្រទេសកូឡុំប៊ី ។
ប្រភពបានបញ្ជាក់ថា នៅពេលនេះ ក្រុមអ្នករត់ចោលជួរទាំងនោះ អមដោយក្រុមគ្រួសារផងដែរ កំពុងត្រូវបានគាំពារសុខភាព របបអាហារ និងជំនួយផ្លូវច្បាប់ផងដែរ នៅក្នុងប្រទេសកូឡុំប៊ី ។
សូមបញ្ជាក់ថា កាលពីថ្ងៃទី២៣ ខែកុម្ភៈ ឆ្នាំ២០១៩ មេបក្សប្រឆាំងក្នុងប្រទេសវេណេហ្ស៊ុយអេឡា Juan Guaido បានប្រកាសតាំងខ្លួនឯងជាប្រធានាធិបតីបណ្តោះអាសន្ន ច្រានចោលលទ្ធផលបោះឆ្នោតរបស់រដ្ឋាភិបាលលោកប្រធានាធិបតី Nicolas Maduro ដោយសំអាងថា ការបោះឆ្នោតកាលពីឆ្នាំ២០១៨នោះពោរពេញដោយភាពមិនប្រក្រតី កេងបន្លំ និងខុសច្បាប់ ។
សហរដ្ឋអាមេរិកបានប្រកាសគាំទ្រ លោក Guaido រួមជាមួយប្រទេសដទៃផ្សេងទៀតចំនួនជិត៥០ប្រទេស និងបានប្រកាសផ្តល់ជំនួយ មនុស្សធម៌ ដល់ពលរដ្ឋវេណេហ្ស៊ុយអេឡា តាមការអំពាវនាវរបស់មេបក្សប្រឆាំងរូបនេះ។
ស្ថានការណ៍នយោបាយនៅក្នុងប្រទេសសម្បូរធនធានប្រេងតំបន់អាមេរិក-ឡាតីនមួយនេះ កំពុងតែផុយស្រួយបំផុត អូសបន្លាយពេលយូរថ្ងៃ យូរខែមកហើយ មិនទាន់រកច្រកដោះស្រាយណាមួយឃើញនៅឡើយ រវាងរដ្ឋាភិបាល និងក្រុមប្រឆាំង វេណេហ្ស៊ុយអេឡានោះ ។ លោក Maduro ចាត់ទុកសកម្មភាពរបស់លោក Guaido ដែលមានអាមេរិកនៅពីក្រោយខ្នងនេះ ជាការប៉ុនប៉ងរដ្ឋប្រហាររដ្ឋាភិបាលស្របច្បាប់របស់លោកយ៉ាងច្បាស់ក្រឡែត ហើយប្តេជ្ញាការពារឆន្ទៈពលរដ្ឋរហូតដល់ដង្ហើមចុងក្រោយ ។
លោក Guaido វិញបានទាមទារឲ្យលោក Maduroចុះចេញពីតំណែង រំលាយរដ្ឋាភិបាលមិនស្របច្បាប់នោះចោល ហើយរៀបចំការបោះឆ្នោតជាថ្មីឡើងវិញ ប្រកបដោយសេរី និងយុត្តិធម៌ គ្មានការគំរាមកំហែង ។ មេបក្សប្រឆាំងរូបនេះ បានអំពាវនាវកងកម្លាំងទាហានគាំទ្រសកម្មភាពរបស់ខ្លួនផងដែរ ។
ការប៉ះទង្គិចបានកើតឡើងជាបន្តបន្ទាប់រវាងក្រុមប្រឆាំង នឹងក្រុមគាំទ្ររដ្ឋាភិបាលបណ្តាលឲ្យស្លាប់ និងរងរបួសមនុស្សជាបន្តបន្ទាប់ ព្រមទាំងខូចខាតទ្រព្យ សម្បត្តិសាធារណៈ ធ្វើឲ្យសេដ្ឋកិច្ចប្រទេសជាតិធ្លាក់ដុនដាប ប្រជាជនរស់នៅក្រោមការភ័យខ្លាច ។
នៅពេលនេះដែរ ក្រុមប្រឆាំងរដ្ឋាភីបាលវេណេហ្ស៊ុយអេឡា ដឹកនាំដោយ លោក Juan Guaido ដែលបានតាំងខ្លួនជាប្រធានាធិបតី វេណេហ្ស៊ុយអេឡានោះ បានគ្រប់គ្រង អាគារ ស្ថានទូត រដ្ឋាភិបាននៅអាមេរិក ។
អាគាដែល ក្រុមបក្សប្រឆាំងវេណេស៊ុយអេឡា បានចូលគ្រប់គ្រងអគារការទូតចំនួន ០៣ របស់វេណេស៊ុយអេឡានៅលើទឹកដីសហរដ្ឋអាមេរិក ហើយមានគោលដៅនឹងបន្តព្យាយាមធ្វើបែបនេះទៀតនាពេលអនាគត ដោយរួមទាំងស្ថានទូតវេណេស៊ុយអេឡាផ្ទាល់។
នាថ្ងៃចន្ទសប្តាហ៍នេះ (ពេលវេលានៅអាមេរិក) លោក Vecchio បានប្រាប់ក្រុមអ្នកសារព័ត៌មាននានាយ៉ាងដូច្នេះថា «ថ្ងៃនេះយើងបានកាន់កាប់អគារការទូតវេណេស៊ុយអេឡាចំនួន ០៣កន្លែង ក្នុងនោះ០២កន្លែងស្ថិតនៅក្នុងរដ្ឋធានីវ៉ាស៊ីនតោនផ្ទាល់ និងមួយទៀតគឺជាកន្លែងផ្តល់សេវាកុងស៊ុល»។ លោក Vecchio បានបញ្ជាក់ថា អគារទាំង ៣ គឺជារបស់រដ្ឋាភិបាលវេណេស៊ុយអេឡា។ រដ្ឋាភិបាលទីក្រុងការ៉ាកាស់ក៏បានទទួលស្គាល់ផងដែរថា បណ្តាការិយាល័យតំណាងផ្នែកការទូតទាំងនេះនៅលើទឹកដីអាមេរិក ត្រូវបានក្រុមបក្សប្រឆាំងដណ្តើមកាន់កាប់ដោយខុសច្បាប់។
បើតាមបេសកជនរូបនេះ អគារមួយក្នុងចំណោមអគារទាំង ០២ នៅក្នុងរដ្ឋធានីវ៉ាស៊ីនតោន គឺអគារកិច្ចការយោធា ដែលជារបស់ក្រសួងការពារជាតិវេណេស៊ុយអេឡា ដោយអ្នកគ្រប់គ្រងនៃអគារនេះ គឺលោក ចូស ល្វីស ស៊ីលវ៉ា (Jose Luis Silva Silva) ជាតំណាងយោធារបស់វេណេស៊ុយអេឡាប្រចាំនៅវ៉ាស៊ីនតោន ដែលបានប្រកាសទទួលស្គាល់ លោក Guaido ជាមេដឹកនាំវេណេស៊ុយអេឡា។ ក៏ប៉ុន្តែលោក Vecchio មិនបានបង្ហើបឲ្យដឹងលម្អិតពីអគារទីពីរនៅក្រុងវ៉ាស៊ីនតោនឡើយ ខណៈអគារទីបីគឺជាអគ្គកុងស៊ុលវេណេស៊ុយអេឡានៅញូយ៉ក។ បើតាមលោក Vecchio ក្រុមបក្សប្រឆាំងនឹងបន្តព្យាយាមដណ្តើមកាន់កាប់ ស្ថានទូតវេណេស៊ុយអេឡាតែម្តង ក្នុងពេលប៉ុន្មានថ្ងៃខាងមុខ។
គួរជម្រាបថា សហរដ្ឋអាមេរិករួមជាមួយប្រទេស ៥៤ផ្សេងទៀតដែលជាសម្ព័ន្ធមិត្តជិតស្និទ្ធ បានប្រកាសទទួលស្គាល់លោក Guaido ពេញទំហឹងជាប្រធានាធិបតីស្តីទីនៃប្រទេសវេណេស៊ុយអេឡា និងអំពាវនាវឲ្យរដ្ឋាភិបាលលោក ម៉ាឌូរ៉ូ រៀបចំការបោះឆ្នោតឡើងវិញដោយមានបក្សប្រឆាំងលោក ហ្គៃដូ ចូលរួមផងដែរ៕
