ភ្នំពេញ៖ លោក សួស គង់ រដ្ឋលេខាធិការ តំណាងឲ្យលោករដ្ឋមន្ត្រីក្រសួងអភិវឌ្ឍន៍ជនបទ បានចូលរួមចុះហត្ថលេខាលើ អនុស្សារណៈយោគយល់គ្នា (MOU) ចំនួនពីរ (02) ជាមួយបណ្ឌិត Shihiru Date ប្រធានក្រុមបេសកកម្ម ADB បន្ទាប់ពីកិច្ចប្រជុំបូកសរុប (Wrap-Up Meeting) ការងារក្រុមបេសកកម្មធនាគារអភិវឌ្ឍន៍អាស៊ី ដែលដឹកនាំដោយលោករដ្ឋមន្ត្រីក្រសួងអភិវឌ្ឍន៍ជនបទត្រូវបានបញ្ចប់ ។
MOU ទី១÷ ក្រុមបេសកកម្ម បានពិនិត្យឃើញជោគជ័យជារួមដោយគ្មានការពន្យារពេល ក្នុងការអនុវត្តសមាសភាគនៃគម្រោងកែលម្អផ្លូវជនបទជំហានទី១ (RRIP I) ចាប់ពីចុងឆ្នាំ ២០១០ ដល់ពាក់កណ្តាលឆ្នាំ ២០១៦ ដោយក្រាលកៅស៊ូពីរជាន់ប្រភេទ DBST ចប់ជាស្ថាពរប្រកបដោយគុណភាព លើខ្សែរផ្លូវប្រវែង ៥០៥.៤ គម ក្នុងខេត្តគោលដៅចំនួន ៨ គឺខេត្តកំពង់ចាម ត្បូងឃ្មុំ កំពង់ធំ សៀមរាប បាត់ដំបង ពោធិសាត់ កំពង់ឆ្នាំង និងកំពង៉ស្ពឺ ។
MOU ទី២÷ ក្រុមបេសកកម្ម បានពិនិត្យឃើញវឌ្ឍនភាពល្អប្រសើរ ក្នុងការអនុវត្តគម្រោងកែលម្អផ្លូវជនបទជំហានទី២ (RRIP II) ដែលបានចាប់ផ្តើមអនុវត្តពីឆ្នាំ ២០១៥ ដល់ឆ្នាំ ២០២០ ដោយក្រាលកៅស៊ូពីរជាន់ប្រភេទ DBST លើផ្លូវក្រាលក្រួសក្រហមដែលមានស្រាប់ ប្រវែង ១.២០០ គម ក្នុងខេត្តចំនួន ១០ គឺខេត្ត កំពង់ចាម ត្បូងឃ្មុំ តាកែវ កំពង់ស្ពឺ កំពង់ឆ្នាំង ពោធិសាត់ បាត់ដំបង បន្ទាយមានជ័យ សៀមរាប និងកំពង់ធំ ក្នុងថវិកាសរុបចំនួន ១៩២.៧១ លានដុល្លារអាមេរិក ។
សូមបញ្ជាក់ថា ឈ្មោះស្ថាប័នដែលផ្តល់ហិរញ្ញប្បទាន សម្រាប់ការអនុវត្តគម្រោង RRIP II នេះ គឺ ៖
1- រាជរដ្ឋាភិបាលកម្ពុជា (បដិភាគលើពន្ធនិងអាករ) 17.79 លានដុល្លារ
2- ធនាគារអភិវឌ្ឍន៍អាស៊ី (ADB)54.00 លានដុល្លារ
3- ធនាគារអហរ័ណ នីហរ័ណកូរ៉េ(KEXIM BANK) 41.00 លានដុល្លារ
4- មូលនិធិអភិវឌ្ឍន៍ណ័រឌីក (NDF)05.40 លានដុល្លារ
5- រដ្ឋាភិបាលអូស្ត្រាលី (AustralianGovernment) 18.52 លានដុល្លារ
6- ទីភ្នាក់ងារបារាំងសម្រាប់ការអភិវឌ្ឍ(AFD) 40.00 លានដុល្លារ
7- មូលនិធិអាកាសធាតុជាយុទ្ធសាស្ត្រ (Strategic Climate Fund)16.00 លានដុល្លារ
សរុបរួម៖ 192.71 លានដុល្លារអាមរិក ៕
ដោយ៖ ហេង សូរិយា
