ខេត្តប៉ៃលន៖ ការភ្ញាក់ផ្អើលមួយបានធ្វើឲ្យមនុស្សម្នាជាច្រើននាំគ្នាចោមរោម ដោយពលរដ្ឋប្រទះឃើញការ៉ុងដេរមាត់ជិត ស្មានថាជាសាកសពមនុស្ស ត្រូវគេសម្លាប់រួច យកទៅបោះចោលនៅទីនោះក៏បានរាយការណ៍ ជូនសមត្ថកិច្ចឲ្យមកត្រួតពិនិត្យ លុះកម្លាំងកងរាជអាវុធហត្ថយកកាំបិតវះការ៉ុងមើល ស្រាប់តែឃើញសាកសពសត្វជ្រូក ដែលមានទម្ងន់ជាង១០០គីឡូក្រាមទៅវិញ ។
ហេតុការណ៍បង្កឲ្យមានការភ្ញាក់ផ្អើលខាងលើនេះ បានកើតឡើងកាលពីវេលាម៉ោង៨ និង៣០នាទីព្រឹកថ្ងៃ១១ ខែធ្នូ ឆ្នាំ២០១៥ ស្ថិតនៅក្បែរផ្លូវក្រវ៉ាត់ក្រុង ក្នុងភូមិទឹកថ្លា សង្កា ត់ប៉ៃលិន ក្រុងប៉ៃលិន។
ប្រភពព័ត៌មានពីប្រជាពលរដ្ឋបានឱ្យដឹងថា មុនពេលកើតហេតុ ម្ចាស់ស្រែបានចុះ ទៅច្រូតស្រូវនៅក្នុងស្រែម្ខាងទៀត។ ពេលដើរកាត់ទីនោះក៏មានធុំក្លិនស្អុយ។ លុះក្រឡេកមើលឃើញការ៉ុងពីរចងមាត់ទល់គ្នាយ៉ាងវែងទំនងដូចជាសាកសពមនុស្ស ទើបរត់ទៅរាយការណ៍ជូនទៅមេភូមិ ហើយលោកមេភូមិក៏រាយការណ៍បន្តទៅសមត្ថកិច្ចឱ្យចុះទៅពិនិត្យ ។ ពេលនោះសមត្ថកិច្ចកងរាជអាវុធហត្ថក៏បានចុះទៅដល់កន្លែងកើតហេតុ ហើយក៏វះការ៉ុងដើម្បីត្រួតពិនិត្យមើល ឃើញថាមិនជាសាកសពមនុស្សទេ គឺជាសាកសពសត្វជ្រូកចិញ្ចឹម ត្រូវគេយកទៅបោះចោលនៅទីនោះ ។
មន្ត្រីសមត្ថកិច្ថនគរបាលប៉ុស្តិ៍អូរតាវ៉ៅបានឱ្យដឹងថា បើតាមការសន្និដ្ឋានជ្រូកមួយក្បាលដ៏ធំនេះ មិនមែនជាជ្រូកឈឺងាប់ត្រូវម្ចាស់យកទៅបោះចោលទេ សង្ស័យជាករណី ចោរចូលលួចជ្រូក ដោយខ្លាចម្ចាស់តាមទាន់ ក៏យកទៅបោះចោលនៅក្នុងវាលស្រែតែម្តង ។
បច្ចុប្បន្នខ្មោចជ្រូកនេះ ត្រូវសមត្ថកិច្ចឱ្យម្ចាស់ដីរៀបចំជីករណ្តៅកប់ចោល ដើម្បីកុំឱ្យជះក្លិនស្អុយអាសោចិ៍ប៉ះពាល់ដល់បរិស្ថាន និងការរស់នៅរបស់ប្រជាពលរដ្ឋ ៕
ដោយ៖ សហការី
