លោក សំ មឹប ជាប្រជាពលរដ្ឋម្នាក់ ក្នុងចំណោមប្រជាពលរដ្ឋជាច្រើននាក់ ទៀតរស់នៅក្នុងភូមិអូរ ឃុំថ្មី ស្រុក កំពង់រោទ៍ ខេត្ដស្វាយរៀង ដែលជា និច្ចកាលតែងយកលាមកគោទៅលក់ឱ្យឈ្មួញវៀតណាមនៅតំបន់ព្រដែនបាន និយាយថា លាមកគោ-ក្របីមានតម្រូវ ការច្រើនពីឈ្មួញវៀតណាមមិនថាមានប៉ុន្មានទេ គឺពួកគេទទួលទិញទាំងអស់ ក្នុងមួយបាវថ្លៃ៥០០០រៀលឬស្មើនឹង ៣ម៉ឺនដុង ។
កសិកររូបនេះបានរៀបរាប់ពីមូល ហេតុដែលនាំឱ្យគាត់សម្រេចចិត្ដលក់លាមកគោដោយមិនទុកធ្វើជីដាក់ស្រែ របស់ខ្លួននោះថា គឺបណ្ដាលមកពីលាមក គោដែលគាត់ប្រមូលបានមានចំនួនតិចតួចពេកមិនអាចដាក់ក្នុងស្រែបានគ្រប់ គ្រាន់នោះឡើយ ។ ដូច្នេះគាត់ក៏សម្រេច យកវាហាលឱ្យស្ងួតរួចដឹកទៅលក់ឱ្យឈ្មួញវៀតណាមតែម្ដងទៅ ។
ទោះជាយ៉ាងណាអ្នកភូមិអូរ ឃុំថ្មី ស្រុកកំពង់រោទ៍ភាគច្រើននៅរដូវប្រាំង តែងតែប្រមូលលាមកគោក្របីរបស់ខ្លួននៅជិតៗផ្ទះ និងពីវាលស្រែហើយហាល ឱ្យស្ងួតរួចដឹកយកទៅលក់ឱ្យឈ្មួញវៀតណាមដែលចាំទិញនៅច្រកព្រំដែន ។
ចំណែកអ្នកស្រី ខៀវ សំបូរ រស់ភូមិ ឃុំខាងលើនេះដែរបានលើកឡើងថា ភាគច្រើនអ្នកភូមិដែលយកលាមកគោទៅលក់គឺពួកគាត់ពុំមានដីស្រែឡើយ ។ ដូច្នេះឆ្លៀតពេលទំនេរពួកគាត់ក៏ប្រមូលលាមកគោក្របីយកមកហាលលក់ឱ្យ ឈ្មួញវៀតណាម ។
ប្រជាពលរដ្ឋរស់នៅស្រុកកំព់ងរោទ៍បាននិយាយថា ការលក់លាមកគោក្របី នេះ ដោយសារបញ្ហាជីវភាព និងកម្រិត នៃការចេះដឹងនៅទន់ទាប ។ នៅពេលដល់ រដូវធ្វើស្រែចម្ការពួកគាត់ត្រូវប្រមូលលុយយកទៅទិញជីគីមីពីឈ្មួញវៀតណាមដើម្បីយកមកដាក់ស្រែជំនួសវិញ ។ ប្រការ នេះធ្វើឱ្យដីខះរឹងខូចគុណភាព និងធ្វើឱ្យ ប៉ះពាល់សុខភាពប្រជាពលរដ្ឋប្រើប្រាស់កសិផលនោះទៀតផង ។
ដោយឡែកចំពោះអ្នកជំនាញផ្នែក កសិកម្មបាននិយាយថា ជាទូទៅលាមក សត្វពាហនៈដូចជា គោ ក្របី គឺមានសារ សំខាន់ណាស់សម្រាប់កសិករយកធ្វើជាជីដាក់ស្រែឬក៏ប្រើប្រាស់ក្នុងការដាំដំណាំផ្សេងៗដើម្បីឱ្យទទួលបានទិន្នផលខ្ពស់ ក៏ដូចជារក្សាគុណភាពដីស្រែចម្ការ ។ ប៉ុន្ដែផ្ទុយទៅវិញប្រជាពលរដ្ឋយើង បែរ ជាយកលាមកសត្វទាំងនេះទៅលក់ឱ្យ វៀតណាមហើយបែរជាទិញជីគីមីពីគេមកវិញនេះ ជាទង្វើខុសឆ្គងណាស់ ។ ជី ធម្មជាតិដូចជាលាមកសត្វនេះជាដើម ជាជីដ៏ល្អសម្រាប់ផ្ដល់ជីវជាតិដល់ដី កសិកម្មដែលធ្វើឱ្យគុណភាពដីកាន់តែល្អប្រសើរឡើង ។ ផ្ទុយទៅវិញប្រសិនបើ ពួកគាត់យកលាមកសត្វទាំងនេះទៅលក់ឱ្យវៀតណាម ហើយបែរជាទៅទិញជីគីមី ពីពួកគេវិញនោះមិនយូរទេគុណភាពដី របស់ពួកគាត់នឹងថយចុះហើយទិន្នផល ដំណាំក៏ថយចុះដែរ ។
ទាក់ទងនឹងបញ្ហានេះនគរវត្ដមិនអាចសុំការបំភ្លឺណាមួយពីខាងមន្ទីរកសិកម្មខេត្ដស្វាយរៀងបាននៅឡើយទេ ៕
ដោយ៖ សហការី
