ភ្នំពេញ៖ បុរសម្នាក់ស្រវឹងស្រាបានបើករថយន្តក្នុងល្បឿនយ៉ាងលឿន ហើយបានបែកកង់មុខផ្នែកខាងស្ដាំ បានរ៉េចង្កូតជ្រុលទៅបុកចូលផ្ទះប្រជាពលរដ្ឋ បណ្ដាលឲ្យរងការខូចខាតយ៉ាងដំណំ ។

បង្កការភ្ញាក់ផ្អើលដល់ម្ចាស់ផ្ទះនិងប្រជាពលរដ្ឋដែលរស់ក្បែរកន្លែងកើតហេតុកាលពីវេលាម៉ោង១០និង៣០នាទី យប់ ថ្ងៃទី១៣ ខែធ្នូ ឆ្នាំ២០១៥ នៅតាមបណ្ដោយផ្លូវ៣៧១ ផ្ទះលេខ៤០៦ ស្ថិតក្នុងភូមិត្នោតជ្រុំ សង្កាត់បឹងទំពុន ខណ្ឌមានជ័យ ។

បើតាមប្រភពព័ត៌មានពីប្រជាពលដ្ឋដែលនៅក្បែរកន្លែងកើតហេតុបានអោយដឹងថា មុនពេលកើតហេតុគេឃើញមានរថយន្តTUNDRA ពណ៌ស គ្មានស្លាកលេខ បើកបរដោយបុរសម្នាក់ដែលស្រវឹងស្រាជោគជាំ បើកក្នុងទិសដៅពីកើតទៅលិចតាមបណ្ដោយផ្លូវ៣៧១ ហើយក្នុងល្បឿនយ៉ាងលឿន ខណះមកដល់ចំណុចកើតហេតុស្រាប់តែរថយន្តបង្កបានបែកកង់មុខផ្នែកខាងស្ដាំ បណ្ដាលឲ្យរេចង្កូតទៅបុកចូលផ្ទះប្រជាពលរដ្ឋអស់២ខ្នង និងខូចខាតទ្រព្យសម្បត្តិមួយចំនួនធំ ។ ភ្លាមនោះម្ចាស់រថយន្តបង្កបានរងរបួសស្រាល និងបើកទ្វេគេចខ្លួនបាត់ពីកន្លែងកើតហេតុភ្លាមៗ ។ តែក្នុងហេតុការណ៍គ្រោះថ្នាក់ចរាចរណ៍ខាងលើនេះមិនបង្កឲ្យប្រជាពលរដ្ឋដែលរស់នៅក្នុងផ្ទះ និងអ្នកនៅក្បែរកន្លែងកើតហេតុរងរបួសនោះទេ ។

ក្រោយពេលកើតហេតុសមត្ថកិច្ចមូលដ្ឋាន និងជំនាញបានចុះមកធ្វើការវាស់វែង រួចស្ទួចរថយន្តបង្កយកទៅរក្សាទុកនៅឯស្នងការដ្ឋាននគរបាលចរាចរណ៍ក្រុងភ្នំពេញ រងចាំដោះស្រាលតាមនីតិវិធីច្បាប់ ៕

ដោយ៖ ភារ៉ា ដង្កោ