ភ្នំពេញ៖រហូតមកទល់ល្ងាចថ្ងៃទី១៤ ខែមេសា ឆ្នាំ២០១៩ នេះ លោក សឿន មុនីរ័ត្ន ព្រះរាជអាជ្ញារងអមសាលាដំបូងរាជធានីភ្នំពេញ ទេីបសាកសួរជនសង្ស័យបាន២នាក់ប៉ុណ្ណោះ ក្នុងចំណោមជនសង្ស័យ៦នាក់ ករណីគ្រឿងញៀនដ៏ធំនៅក្លិបកម្សាន្ត”ម៉ៃ អាមី”។
ប្រភពព័ត៌មានច្បាស់ការណ៍ បញ្ជាក់ថា នៅថ្ងៃទី១៥ ខែមេសា ឆ្នាំ២០១៩ ស្អែកនេះ តុលាការនឹងបន្តការសាកសួរទៀត ។
សូមបញ្ជាក់ថា នគរបាលព្រហ្មទណ្ឌកំរិតស្រាលនៃស្នងការដ្ឋាននគរបាលរាជធានីភ្នំពេញ នៅព្រឹកថ្ងៃទី១៤ ខែមេសា ឆ្នាំ២០១៩ នេះ បញ្ជូនឈ្មោះ ស្រេង វីរៈ ហៅលក្ខណ៍ ម្ចាស់ក្លិបកម្សាន្ត”ម៉ៃ អាមី”និងបក្ខពួក៦នាក់មកអយ្យការអមសាលាដំបូងរាជធានីភ្នំពេញ ដេីម្បីចាត់ការតាមច្បាប់ ។
ទីតាំងក្លិបកម្សាន្ត”ម៉ៃ អាមី”ជាកន្លែងផលិតគ្រឿងញៀន ដែលដំបូងឡើយឃាត់ខ្លួនមនុស្ស៥០នាក់ និង គ្រឿងញៀនជាច្រើន ។ ប៉ុន្តែក្រោយមក សល់តែជនសង្ស័យ៧នាក់ប៉ុណ្ណោះដែលត្រូវបញ្ជូនមកតុលាការ ។
ដោយឡែកលោក ម៉េត មាសភក្ដី អ្នកនាំពាក្យសាលារាជធានីភ្នំពេញ ថ្លែងថា ក្លិបកម្សាន្ត”ម៉ៃ អាមី”ក្នុងខណ្ឌចំការមន ដែលស្នងការនគរបាលរាជធានីភ្នំពេញ អះអាងថា ជាទីតាំងផលិតគ្រឿងញៀន ត្រូវបានបិទហើយ មិនឱ្យដំណេីរការទៀតទេ ។
បេីតាមលោកឧត្ដមសេនីយ៍ឯក ស ថេត ស្នងការនគរបាលរាជធានីភ្នំពេញ គឺ ក្លិបកម្សាន្ត”ម៉ៃ អាមី” ជាកន្លែងលួចលាក់ផលិតសារធាតុញៀនខុសច្បាប់នៅ ដោយឃាត់មនុស្សបានចំនួន៥០នាក់ ក្នុងនោះស្រី១២នាក់ និងដកហូតម៉ាស៉ីនផលិតគ្រឿងញៀនមួយចំនួន និងសារធាតុញៀនមួយចំនួន។
ស្នងការរាជធានីភ្នំពេញ រូបនេះ បន្តថា កិច្ចការសម្រេចទៅបាន ដោយមានការអនុញ្ញាតពីលោក លី សុផាណា ព្រះរាជអាជ្ញារងនៃអយ្យការសាលាដំបូងរាជធានីភ្នំពេញ និងមានការសហការពីការិយាល័យនគរបាលព្រហ្មទណ្ឌកម្រិតស្រាលរាជធានីភ្នំពេញ អធិការដ្ឋាននគរបាលខណ្ឌចំការមន ព្រមទាំងកម្លាំងប៉ុស្តិ៍នគរបាលដ្ឋានបឹងកេងកង។
សេចក្តីរាយការណ៍បឋម បានឱ្យដឹងថា ទីតាំងមួយនេះអាជ្ញាធរបានចុះមកធ្វេីការហាមឃាត់ចំនួន៣ដងមកហេីយ ថែមទាំងបានបិទលែងឱ្យដំណេីរការទៀតផងតែមិនបានយូរប៉ុន្មានក៏បេីកវិញ ។
សូមបញ្ជាក់ថា ការបង្ក្រាបទ្រង់ទ្រាយធំលេីកនេះ ប្រហាក់ប្រហែលនឹងការបង្ក្រាបនៅរ៉ុក របស់អ្នកឧកញ៉ាគិត ធាង ម្ចាស់មជ្ឈមណ្ឌលកម្សាន្តរ៉ុក ផងដែរ ៕
ដោយ៖ ចេស្តា
