មន្ត្រីបានបញ្ជាក់ថា ការវាយប្រហារកាលពីថ្ងៃទី១៣ ខែធ្នូ ឆ្នាំ២០១៥ ស្ថិតនៅភាគពាយព្យទីក្រុង Parachinar របស់ប៉ាគីស្ថាននោះ ជនរងគ្រោះបាត់បង់ជីវិតបានកើនដល់២៤នាក់ និង៧០នាក់ផ្សេងទៀតរងរបួសធ្ងន់ ស្រាល ។ ក្រុមរដ្ឋអិស្លាមកាន់និកាយសាន់នីបានប្រកាសទទួលស្គាល់ការវាយប្រហារបណ្តាលឲ្យមនុស្សស្លាប់ និងរងរបួសទាំងនោះ។
អ្នកនាំពាក្យរបស់ក្រុមឧទ្ទាម Lashkar-e-Jhangvi (LeJ) ឈ្មោះ Ali bin Sufyan ថ្លែងតាមទូរស័ព្ទជាមួយទីភ្នាក់ងារព័ត៌មានរ៉យទ័របញ្ជាក់ថា ការវាយប្រហារខាងលើរបស់ក្រុមខ្លួនជាសកម្មភាពសងសឹកចំពោះការសម្លាប់ទៅលើជនមូស្លីមទាំងឡាយដែលធ្វើឡើងដោយប្រធានាធិបតីស៊ីរី និងអ៊ីរ៉ង់ ។ ក្រុមឧទ្ទាម Lashkar-e-Jhangvi ជាក្រុមអិស្លាមជ្រុលនិយមដែលប្រកាន់ខ្ជប់ខ្ជួននូវទ្រឹស្តីសាសនាដូចក្រុមរដ្ឋអិស្លាមប្រកាន់ខ្ជាប់នោះផងដែរ ។
កាលពីពេលថ្មីៗកន្លងមកនេះ ប្រភពព័ត៌មានរ៉យទ័របានផ្សព្វផ្សាយ ក្រុមសកម្មប្រយុទ្ធប៉ាគីស្ថានមួយក្រុមមកពីកងពលស៊ីអ៊ីដ ឬដែលគេស្គាល់ថាជាក្រុម Zeinabiyoun នោះបានចូលរួមសកម្មភាពធ្វើសង្គ្រាមប្រឆាំងទៅលើក្រុមរដ្ឋអិស្លាម IS នៅក្នុងទឹកដីស៊ីរី ។ ពួកគេភាគច្រើនមកពីតំបន់ Parachinar ដែលមានពលរដ្ឋអិស្លាមកាន់សាសនានិកាយស៊ីអ៊ីដរស់នៅភាគច្រើនបំផុត ។ ប្រភពពីក្នុងតំបន់ក៏បានបញ្ជាក់ដែរថា ខ្មាន់កាំភ្លើងជាច្រើនរយនាក់ជាពលរដ្ឋប៉ាគីស្ថានចូលរួមធ្វើសង្គ្រាមនៅក្នុងទឹកដីស៊ីរី ។
ការវាយប្រហារដោយបំផ្ទុះគ្រាប់បែកកាលពីថ្ងៃអាទិត្យនេះ មន្ត្រីនៅក្នុងតំបន់បានបញ្ជាក់ថា ក្រុមជនវាយប្រហារបានគោលដៅទៅលើហ្វូងមនុស្សដែលកំពុងកកកុញនៅក្នុងទីផ្សារ ហើយរហូតមកដល់ពេលនេះ ជនរងគ្រោះបាត់បង់ជីវិតបានកើនដល់២៤នាក់ និង៧០នាក់ទៀតរងបួស ។ លោក Shafiq Hussain គ្រូពេទ្យប្រចាំតំបន់បញ្ជាក់ថា ក្នុងចំណោមអ្នករងរបួស មានមួយចំនួនរងរបួសធ្ងន់ ៕
ប្រែសម្រួល៖ ថាច់ យ៉ាត
