ខេត្ដព្រះសីហនុ៖ ក្រសួងរៀបចំដែនដី នគរូបនីយកម្ម និងសំណង់ចេញលិខិត ផ្អាករាល់ការសាងសង់សំណង់រឹងមាំ និង ផ្អាកចេញបណ្ណកម្មសិទ្ធិដីធ្លីនៅជុំវិញ តំបន់ជាប់មាត់បឹងព្រែកទប់ ដែលជា ប្រភពស្ដុកទឹកស្អាត ឬទឹកសាប ទុកប្រើ ប្រាស់ទូទាំងក្រុងព្រះសីហនុ ។
វិធានការនេះត្រូវប្រជាពលរដ្ឋរិះគន់ថា អាជ្ញាធរខេត្ដពាក់ព័ន្ធខេត្ដព្រះសីហនុ អនុវត្ដមិនមានប្រសិទ្ធភាពនិងមិនបានផ្សព្វផ្សាយឱ្យបានទូលំទូលាយនោះទេ ។ លិខិតអន្ដរាគមន៍នេះចុះហត្ថលេខា និង បោះត្រាដោយរដ្ឋលេខាធិការក្រសួង រៀបចំដែនដីនគរូបនីយកម្ម និងសំណង់ លោក លឹម វាន់ ចុះថ្ងៃទី១១ ខែវិច្ឆិកា ឆ្នាំ២០១៥ ជម្រាបជូនលោកប្រធាន មន្ទីររៀបចំដែនដីនគរូបនីយកម្ម សំណង់ និងសុរិយោដី ខេត្ដព្រះសីហនុ ឱ្យទប់ស្កាត់ រាល់ការសាងសង់សំណង់រឹងផ្សេងៗ និង ពន្យារពេលផ្ដល់បណ្ណកម្មសិទ្ធិដីជូនប្រជាពលរដ្ឋជាបណ្ដោះអាសន្ននៅជុំវិញមាត់បឹងព្រែកទប់ ។
វិធានការនេះដើម្បីរង់ចាំការពិនិត្យ ដោះស្រាយឬអនុវត្ដឱ្យបានពេញលេញតាមគោលការណ៍របស់រាជរដ្ឋាភិបាល ដែលបានកំណត់ក្នុងលិខិតចុះថ្ងៃទី១១ ខែ ឧសភា ឆ្នាំ២០១២របស់ទីស្ដីការគណៈ រដ្ឋមន្ដ្រី ។ លិខិតរបស់ក្រសួងរៀបចំដែន ដីនគរូបនីយកម្ម និងសំណង់ពេលនេះ ធ្វើឡើងដើម្បីឆ្លើយតបទៅនឹងសំណើ របស់ក្រសួងឧស្សាហកម្ម និងសិប្បកម្ម ដែលសុំកិច្ចអន្ដរាគមន៍ជំរុញការអនុវត្ដវិធានការទប់ស្កាត់ការសាងសង់សំណង់ ផ្សេងៗនិងពន្យារពេលបណ្ដោះអាសន្ន នៃការផ្ដល់បណ្ណកម្មសិទ្ធិជូនប្រជាពលរដ្ឋ ដែលស្ថិតនៅជុំវិញតំបន់បឹងព្រែកទប់ ដើម្បីពិនិត្យដោះស្រាយការថែរក្សានូវ បរិស្ថាននិងប្រភពទឹកសាបសម្រាប់ផ្គត់ផ្គង់ជូនប្រជាពលរដ្ឋនៅទូទាំងក្រុងព្រះ សីហនុតាមគោលការណ៍ណែនាំរបស់ រាជរដ្ឋាភិបាល ។
ប្រជាពលរដ្ឋបានឱ្យដឹងថា ការចេញ លិខិតផ្អាកសង់សំណង់រឹងមាំរបស់ក្រសួងរៀបចំដែនដីនៅតំបន់ជាប់មាត់បឹងព្រែកទប់អាជ្ញាធរខេត្ដព្រះសីហនុ អនុវត្ដមិន ទាន់មានប្រសិទ្ធភាពទេ ។ រាល់ថ្ងៃនេះ ឃើញមានបុគ្គលនិងមន្ដ្រីមានអំណាចមួយចំនួនបានបន្ដសង់វីឡា ភូមិគ្រឹះ និងសង់ការដ្ឋានក្រុមហ៊ុនក្រឡុកស៊ីម៉ងត៍ ជាដើមបន្ដធ្វើសកម្មភាពរាល់ថ្ងៃដោយគ្មានអាជ្ញាធរហាមឃាត់ទេ ។
បរិស្ថាន នៅជុំវិញមាត់បឹងព្រែកទប់ ឬផ្ទៃរងទឹកភ្លៀងបឹងស្ដុកទឹកសាបមាន ទីតាំងនៅក្បែរឆ្នេរឯករាជ្យខេត្ដព្រះ សីហនុ គួរត្រូវរាជរដ្ឋាភិបាលថែរក្សាឱ្យ បានគង់វង្សដោយមិនត្រូវឱ្យមានសកម្មភាពរំលោភដីចំណីមាត់បឹងធម្មជាតិ មួយនេះធ្វើកម្មសិទ្ធិហើយអនុញ្ញាតឱ្យ មានសំណង់ផ្ទះ វីឡាធំស្កឹមស្កៃ និងការ ដ្ឋានក្រុមហ៊ុនបន្ដកើតមានដូចរាល់ថ្ងៃ នេះទៀតទេ ។ ផ្ដើមពីបញ្ហានេះប្រជាពល រដ្ឋបានទទូចឱ្យរដ្ឋាភិបាលដកហូតដីចំណីមាត់បឹងព្រែកទប់ដែលជាបឹងធម្មជាតិស្ដុកទឹកសាបដ៏សំខាន់ទុកប្រើប្រាស់នៅ ទូទាំងក្រុងទេសចរណ៍មួយនេះមកដាក់ ជាសម្បត្ដិរដ្ឋគ្រប់គ្រង និងអភិរក្សដោយ មិនត្រូវអនុញ្ញាតឱ្យបុគ្គលមានអំណាច ឬឈ្មួញមួយចំនួន បន្ដសង់វីឡា ភូមិគ្រឹះ និងសំណង់រឹងមាំផ្សេងទៀតនៅជាប់មាត់បឹងនេះទៀតទេ ។
បទបញ្ជារបស់សម្ដេច ស ខេង រដ្ឋ មន្ដ្រីក្រសួងមហាផ្ទៃ ពិសេសគោល ការណ៍ណែនាំផ្សេងៗដែលសម្ដេចតេជោនាយករដ្ឋមន្ដ្រី ហ៊ុន សែន បានដាក់ឱ្យ អនុវត្ដទាក់ទងវិធានការទប់ស្កាត់ការ ទន្ទ្រានកាន់កាប់ដីចំណីមាត់បឹងព្រែក ទប់ គឺអាជ្ញាធរខេត្ដនេះអនុវត្ដមិនទាន់ មានប្រសិទ្ធភាពទេ ។ សំណង់វីឡាធំៗ សំណង់ភូមិគ្រឹះនិងសំណង់ការដ្ឋានក្រុមហ៊ុនលាយស៊ីម៉ងត៍កំពុងបន្ដសាងសង់នៅផ្នែកខាងលើមាត់បឹងព្រែកទប់ ដោយមិន ខ្វល់នឹងគោលការណ៍ណែនាំរបស់សម្ដេចតេជោនាយករដ្ឋមន្ដ្រី ហ៊ុន សែន និង បទបញ្ជារបស់សម្ដេចក្រឡាហោម ស ខេង នោះទេ ។
សំណង់វីឡាធំស្កឹមស្កៃដែលកំពុងបន្ដសាងសង់ជិតរួចរាល់ជាស្ថាពរ នៅជាប់ ខាងលើមាត់បឹងព្រែកទប់រាល់ថ្ងៃនេះ ប្រជាពលរដ្ឋនិងមន្ដ្រីរាជការខេត្ដ ព្រះសីហនុអះអាងថា ជាកម្មសិទ្ធិរបស់ លោក តាក់ វណ្ណថា អតីតស្នងការនគរ បាលខេត្ដព្រះសីហនុ ហើយបច្ចុប្បន្នមាន តួនាទីជាសមាជិកក្រុមប្រឹក្សាខេត្ដព្រះ សីហនុ ។ សំណង់ភូមិគ្រឹះសង់នៅជាប់ របងវត្ដក្រោមជាប់ខាងលើមាត់បឹងព្រែកទប់ជាកម្មសិទ្ធិរបស់បុគ្គលមានទ្រព្យ មានងារជាឧកញ៉ា ។
ផ្ទៃរងទឹកភ្លៀងបឹងព្រែកទប់ដែលជា ប្រភពទឹកសាបទុកប្រើប្រាស់នៅទូទាំង ក្រុងជាប់សមុទ្រមួយនេះបានរងការ រំលោភបំពានធ្វើកម្មសិទ្ធិឯកជនច្រើន ឆ្នាំមកហើយ ហើយករណីនេះបានឈាន ដល់សម្ដេចក្រឡាហោម ស ខេង រដ្ឋមន្ដ្រី ក្រសួងមហាផ្ទៃព្រមានធ្ងន់ៗជាសាធារណៈមិនបញ្ចេញឈ្មោះទៅលើមន្ដ្រីរដ្ឋាភិបាលទាំងឡាយណា ដែលជាប់ពាក់ព័ន្ធសកម្ម ភាពរំលោភយកដីចំណីមាត់បឹងព្រែក ទប់ឱ្យដកខ្លួនជាបន្ទាន់បើចង់សុខខ្លួន ។
អភិបាលក្រុងព្រះសីហនុ លោក អ៊ី សុខឡេង បានឱ្យដឹងដែរថា នៅពេលរូប លោកបានមកដឹកនាំមូលដ្ឋាននេះឃើញមានសំណង់រឹងមាំផ្សេងៗមានដូចជា សំណង់វីឡា ភូមិគ្រឹះ និងការដ្ឋានក្រុមហ៊ុន លាយស៊ីម៉ងត៍ជាដើមបានសាងសង់នៅផ្នែកខាងលើមាត់បឹងព្រែកទប់ដោយ គ្មានច្បាប់សាងសង់ទេ ប៉ុន្ដែលោកមាន ចម្ងល់ថា អាជ្ញាធរអាណត្ដិមុនៗហេតុអ្វី បានជាមិនបានហាមឃាត់និងអនុញ្ញាតឱ្យម្ចាស់សំណង់ទាំងនោះសង់ល្មើសច្បាប់ទៅវិញ ។
លោក យន្ដ មីន អភិបាលខេត្ដព្រះ សីហនុមានប្រសាសន៍ថា អាជ្ញាធរមិន អនុញ្ញាតឱ្យចេញបណ្ណកម្មសិទ្ធិដីនៅ ជុំវិញបរិវេណមាត់បឹងព្រែកទប់ និង សកម្មភាពទន្ទ្រានយកដីចំណីមាត់បឹង ព្រែកទប់ទៀតទេ ។ ជាងនេះអាជ្ញាធរស្ថាប័ន ពាក់ព័ន្ធបានរួមគ្នាអនុវត្ដអនុសាសន៍ ពង្រឹងការពារបឹងព្រែកទប់ឱ្យស្របតាមការចង្អុលបង្ហាញរបស់សម្ដេចក្រឡា ហោម ស ខេង និងបទបញ្ជាផ្សេងៗរបស់ ប្រមុខដឹកនាំដោយយកចិត្ដទុកដាក់ ។ លោក យន្ដ មីន ដែលធ្លាប់ដើរហាត់ ប្រាណតាមផ្លូវក្រាលកៅស៊ូនៅជាប់ មាត់បឹងព្រែកទប់ស្ទើរជារៀងរាល់ល្ងាចពេលទំនេរពីការងារបានបញ្ជាក់ថា ក្នុង រយៈពេល៣ខែដែលរូបលោកបានមក ដឹកនាំខេត្ដនេះបានហាមមិនឱ្យស្ថាប័នណាមួយចេញបណ្ណកម្មសិទ្ធិដីនៅជុំវិញ បឹងព្រែកទប់ទៀតទេ ។
ទោះយ៉ាងណាលោកមិនបានបញ្ជាក់ថា តើនៅពេលណាអាជ្ញាធរ ឬរដ្ឋាភិ បាលរឹបអូសយកដីចំណីមាត់បឹងព្រែក ទប់ដែលរងការរំលោភធ្វើកម្មសិទ្ធិពីបុគ្គលមួយចំនួនកន្លងមកដាក់ជាសម្បត្ដិរដ្ឋ គ្រប់គ្រងវិញនោះទេ ។
បេក្ខភាពប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្ដព្រះសីហនុ អាណត្ដិថ្មី លោក នួន ប៉ុក មានប្រសាសន៍ថា ទីតាំងដីសង់វីឡា របស់ លោក តាក់ វណ្ណថា គឺម្ចាស់កម្ម សិទ្ធិនេះបានស្នើបណ្ណកម្មសិទ្ធិត្រឹមត្រូវពីមន្ទីរជំនាញខេត្ដនេះ ប៉ុន្ដែចំពោះសំណង់ នេះសង់មានច្បាប់អនុញ្ញាត ឬបែបណា នោះ ស្ថាប័នលោកមិនបានដឹងទេ ។
សំណង់វីឡាធំស្កឹមស្កៃជាកម្មសិទ្ធិ របស់លោក តាក់ វណ្ណថា ត្រូវប្រជាពល រដ្ឋខេត្ដព្រះសីហនុថ្លែងថា សង់មិនខ្វល់ បទបញ្ជារបស់សម្ដេចក្រឡាហោម ឧបនាយករដ្ឋមន្ដ្រី ស ខេង ពិសេសគោល ការណ៍ណែនាំផ្សេងៗរបស់សម្ដេចនាយក រដ្ឋមន្ដ្រី ហ៊ុន សែនទេ ហើយអាជ្ញាធរខេត្ដ នេះក៏មិនបានទប់ស្កាត់ដែរ ៕
ដោយ៖ ហេង នរិន្ទ្រ
