ភ្នំពេញ៖ កម្លាំងអាវុធហត្ថខណ្ឌដូនពេញសហការជាមួយកម្លាំងកងរាជអាវុធហត្ថរាជធានីភ្នំពេញ ចុះស្រាវជ្រាវឃាត់ខ្លួនបុរសម្នាក់ ដែលជាមុខសញ្ញាចោរជំនាញខាងលួចរថយន្តស៊េរីទំនើបព្រមទាំងដកហូតវត្ថុតាងបានជាក់ស្តែង គឺរថយន្តម៉ាកRangeRoverស៊េរី២០១៥មួយគ្រឿងផងដែរ ។

មន្ត្រីកងអាវុធហត្ថខណ្ឌដូនពេញបានឲ្យដឹងថា ករណីឃាត់ខ្លួនជនសង្ស័យខាងលេីនេះ បានធ្វេីឡេីងកាលពីវេលាម៉ោង១៥និង៤៥នាទីរសៀល ថ្ងៃទី១៥ ខែធ្នូ ឆ្នាំ២០១៥នៅចំណុចខាងក្រោយកាសុីណូណាហ្គារ ក្នុងសង្កាត់ទន្លេបាសាក់ ខណ្ឌចំការមន ។

ជនសង្ស័យមានឈ្មោះហេង ថៃ ភេទប្រុស អាយុ២៥ឆ្នាំ មុខរបរមិនពិតប្រាកដ ស្នាក់នៅផ្ទះលេខ១៩៨ ខណ្ឌ៧មករា និងដកហូតវត្ថុតាងបានរថយន្ត០១គ្រឿងម៉ាក RangeRover ពណ៏ប្រផេះ ស៊េរី២០១៥ពាក់ស្លាកលេខភ្នំពេញ 2AD-2622 ជារបស់ជនរងគ្រោះជនជាតិចិន ម្នាក់មានមុខរបរបុគ្គលិកក្រុមហ៊ុនស្នាក់នៅខនដូរមួយនៅរាជធានីភ្នំពេញ ។

មន្ត្រីអាវុធហត្ថដដែរបានបន្តទៀតថា កាលពីថ្ងៃបុណ្យអំុទូកទី១ត្រូវជាថ្ងៃទី២៤ ខែវិច្ឆិកា ឆ្នាំ២០១៥ មានហេតុការណ៌ភ្ញាក់ផ្អើមមួយដោយបុរសជនជាតិចិនម្នាក់បានបាត់រថយន្តម៉ាកRangeRover ស៊េរី២០១៥ ពណ៌ប្រផេះ ពាក់ស្លាកលេខភ្នំពេញ2AD-2622 ខណៈជិះមកចូលម៉ាស្សានៅចំណុចហាងម៉ាស្សាយីហោ(ឡាក់គី )នៅក្នុងមូលដ្ឋានសង្កាត់បឹងរាំង ខណ្ឌដូនពេញ ។ ហេីយបន្ទាប់ពីទទួលបាននូវពាក្យបណ្តឹងរបស់ជនរងគ្រោះ រួចកម្លាំងកងរាជអាវុធហត្ថខណ្ឌដូនពេញសហការជាមួយអាវុធហត្ថរាជធានីភ្នំពេញចុះធ្វេីការស្រាវជ្រាវរហូតមកដល់ថ្ងៃទី១៥ ខែធ្នូ ឆ្នាំ២០១៥នេះបានឮដំណឹងថាមានគេចង់លក់រថយន្តម៉ាក RangeRover អត់ពន្ធមួយគ្រឿងប្រេីល្បិចណាត់ជួបជនសង្ស័យ នៅចំណុចខាងក្រោយកាសីុណូណាហ្គារវេីល ក្នុងសង្កាត់ទន្លេបាក់ ខណ្ឌចំការ ស្រាប់តែឃើញរថយន្តម៉ាកRangeRoverមួយគ្រឿង ដែលបាត់នៅចំណុចហាងម៉ាស្សាយីហោ(ឡាក់គី)នៅក្នុងមូលដ្ឋានសង្កាត់បឹងរាំង ខណ្ឌដូនពេញនោះ ហេីយមិនទាន់ដោះស្លាកលេខចេញនៅឡើយដោយឃើញដូច្នេះទើបកម្លាំងជំនាញបានឃាត់ជនសង្ស័យរូបនោះព្រមទាំងដកហូតវត្ថុតាងរថយន្តរបស់ជនរងគ្រោះមកវិញតែម្តង ។

បច្ចុប្បន្នជនសង្ស័យ និងវត្ថុតាងត្រូវបានញ្ជូនបន្តទៅទីបញ្ជាការអាវុធហត្ថរាជធានីភ្នំពេញ ដើម្បីចាត់ការតាមនិតិវិធី ៕

ដោយ៖ ស ដារ៉ា