ខេត្តកោះកុង៖ សំណង់ដ៏រឹងមាំមួយកន្លែងដែលគេដឹងថា គឺជារបស់មន្ត្រីថ្នាក់ខ្ពស់ម្នាក់នៅស្នងការដ្ឋាននគរបាលខេត្តកោះកុង កំពុងសាងសង់ដោយពុំមានច្បាប់អនុញ្ញាត និងមិនមានអ្នកណាហ៊ានប៉ះពាល់ឡើយ។
ប្រភពបានឲ្យដឹងថា សំណង់ដែលមានទំហំទទឹង១៦ម៉ែត្រ និង បណ្តោយ២៨ម៉ែត្រ ស្ថិតក្នុងភូមិចាំយាម ឃុំប៉ាក់ខ្លង ស្រុកមណ្ឌលសីមា ត្រូវបានគេបញ្ជាក់ថា មានម្ចាស់ឈ្មោះ យឹម ផេង ជាមន្ត្រីនគរបាលម្នាក់ ដែលមានឋានៈខ្ពង់ខ្ពស់នៅក្នុងស្នងការដ្ឋាននគរបាលខេត្តកោះកុង។
ប្រភពបានឲ្យដឹងទៀតថា សំណង់មួយនេះ សាងសង់ដោយពុំមានច្បាប់នោះទេ ហើយមកទល់ពេលនេះ គឺជិតរួចរាល់ហើយ ដោយគេពុំឃើញអាជ្ញាធរ និងមន្ត្រីពាក់ព័ន្ធហ៊ានទៅក្បែរឡើយ។ ប្រការនេះ បានធ្វើឲ្យប្រជាពលរដ្ឋរិះគន់ថា ហេតុតែគេមានអំណាច មានបក្ខពួក ចង់ធ្វើអ្វីសាងសង់អ្វី មានច្បាប់គ្មានច្បាប់ ក៏គ្មានអ្នកណាហ៊ានប៉ះពាល់ឡើយ។ ទងើ្វបែបនេះ ប្រសិនបើប្រជាពលរដ្ឋធម្មតាវិញ គ្រាន់តែកាប់ដីចាក់គ្រឹះសសរភ្លាម គឺមានមន្ត្រីមកសួរនាំបាត់ទៅហើយ ហើយបើសិនគ្មានច្បាប់វិញ គឺរុះរើដោយគ្មានហេតុផលទេ។
ជុំវិញបញ្ហានេះ លោក រស់ ស៊ីថា ប្រធានភូមិបាលស្រុកមណ្ឌលសីមា បានថ្លែងថា សំណង់មួយនេះ លោកបានចេញលិខិតផ្អាក២ដងរួចមកហើយ ហើយលោកក៏បានរាយការណ៍ជូនទៅអាជ្ញាធរស្រុកហើយដែរ ហើយមកទល់ពេលនេះ មានដំណើរការយ៉ាងណា លោកមិនទាន់បានចាត់វិធានការបន្ដទេ។
ដោយឡែកលោក ហាក់ ឡេង អភិបាលស្រុកមណ្ឌលសីមា បានមានឲ្យដឹងថា សំណង់មួយនេះ ខាងការិយាល័យដែនដីក៏បានចេញលិខិតផ្អាកកាលពីថ្ងៃទី៨ ខែតុលា ឆ្នាំ២០១៥ ម្តងហើយ តែលោក យឹម ផេង បានអង្វរខាងការិយាល័យដែនដីថានឹងរត់ការសាងសង់។ រហូតដល់ថ្ងៃទី២៣ ខែវិច្ឆិកា ឆ្នាំ២០១៥ ខាងលោកសហការជាមួយ និងការិយាល័យដែនដីស្រុកមណ្ឌលសីមា ចុះទៅហាមឃាត់ជាលើកទី២ តែដោយសារតែមានការអង្វរករពីលោក យឹម ផេង និងមានការយោគយល់ពីសំណាក់មន្ត្រីគ្រប់ជាន់ថ្នាក់ផងនោះ ក៏ទុកពេលឲ្យលោក យឹម ផេង ម្ដងទៀតដើម្បីឲ្យគាត់រត់ការ តែគាត់មិនព្រមរត់ការនោះទេ។ តែយ៉ាងណា លោកអភិបាលស្រុកថា លោកនឹងចាត់វិធានការជាក់ស្ដែង បើសំណង់នេះនៅតែបន្ដសាងសង់ដោយគ្មានច្បាប់បែបនេះទៀត។
ដោយលោកយឹម ផេង នគរវត្តមិនអាចទាក់ទងសុំការបំភ្លឺបានទេ នៅព្រឹកថ្ងៃទី១៧ ខែធ្នូ ឆ្នាំ២០១៥ ព្រោះគ្មានលេខទូរស័ព្ទ៕
ដោយ៖ វិបុល
